玩到攰攰地，上岸買野飲嘅時候發現，原來附近有間餐廳喺正個沙灘上面，之前黎嘅時候都無留意到！喺口渴又肚餓嘅情況下，不如就試下呢間餐廳啦。
行到去門口見到個招牌寫住黃金高力餐廳，細問之下原來呢間餐廳只係開左業一年左右，所以我先無印象，哈哈！同時發現自己原來成年無去過沙灘，時間實在係過得太快...
入到黎岩岩好日落，見到幾塊超大玻璃對正個黃金海，波光粼粼閃閃生輝，望住呢個景食飯人都relax啲。
不過到我記得要影相嘅時候，個天已經黑哂了lol 張相咩都睇唔到添XD 不過用眼睇依然都係好靚嘅。
餐牌都算多野食揀，有唔同嘅set，我同朋友一人嗌左一個set,一個茄茸天使麵同紐西蘭羊架。
跟餐一個紅湯一個白湯，個紅湯係多料嘅，但係個香湯出奇地creamy! 問問侍應，佢話個湯原來係大廚自己每日用新鮮嘅蘑菇、忌廉同秘密香料配方打磨而成嘅，奶香味濃得黎亦都有一粒一粒嘅蘑菇口感，我俾十個趣！
首先上嘅係我個海蝦茄茸天使麵，因為我對海鮮敏感，所以就轉左做雜菜。個麵都幾出色，茄味好夠，而且份量都大份，岩哂我呢啲黑洞。
然後上嘅係我個朋友嘅羊架，首先佢有三塊，份量都算係多嘅，最出色係個羊架好厚肉，仲要啖啖都好juicy，食肉獸絕對唔可以錯過。
侍應話佢地雖然係新開，但係個大廚已經有二十幾年做中西餐嘅經驗，好想試下挑戰自己嘅舒適圈,去新嘅環境，做一啲新嘅嘗試。而呢度啲侍應都好好態度，我問極野佢地都好細心答我，欣賞欣賞！
好開心又發掘到新餐廳，喺呢個海邊望住太陽日落嘅景象，應該係忙裏偷閒入面最舒服嘅一件事。
