炊二哥圍爐 (已結業)

平時打邊爐就打得多啦，又真係未試過呢個圍爐煮茶，之前聽朋友介紹呢一間圍爐，今日終於有機會試到啦，入到去個環境好舒服唔會太嘈，成間餐廳都以紅色為主題好有食辣嘅氣氛。我哋一坐低侍應就拎咗圍爐煮茶嘅餐前小食，包括紅棗花生栗子南瓜同埋一壺茶，叫我哋放喺個網上邊輕輕整返熱佢，非常之有特色。最重要梗係唔少得個火鍋啦，我哋嗌咗個小辣滑牛肉火鍋，唔係講笑，小辣都已經非常辣，而且麻度十足，好適合平時鍾意食辣嘅朋友，但如果唔係好食得辣嘅朋友，建議都係試吓小小辣先。同出邊食開嘅火鍋唔同，呢度你揀一個湯底佢就會預設晒好多唔同嘅食材，而且份量非常之多，兩個人真係唔係好食得晒，咁多嘢食材之中，我最鍾意食嘅就係滑牛肉同埋巴沙魚，佢哋都係入口即溶，非常之滑，而且非常夾個湯底。除咗個火鍋，我亦都非常之推介試吓佢哋嘅串燒。我哋嗌咗個牛肉、五花肉同埋小香腸串燒，啲肉嘅調味啱啱好，你會見到有好多嘅辣椒粉同埋醃料喺啲肉嘅上面，而且佢哋都會放喺一個爐上邊唔怕啲肉會凍。仲有最後一樣就係佢哋嘅拇指小籠包，細細個一啖一個，真係好特別好有特色，喺出邊應該冇咩機會試到，建議喺度就試一試啦。