高橋 (已結業)

前日經過Mikiki, 正當想食日本野但壽司店過左飛，周圍行見到呢間新開高橋拉麵，一見到門面有塊大牌有沾麵食，就即刻轉軚黎試下！事關本人非常喜歡吃沾麵，去到邊間日日餐廳，餐牌一有沾麵，一定會點左先算！😌見有其他食客話東京銀座食過，我地之前都只係食過香港幾間唔同拉麵店嘅沾麵，其實對我黎講都好好味，今次見發酵味噌咁特別，就即刻點左！因為屋企人事前食左野，加上8點幾見餐廳唔多人唔肯定好唔好食，所以今次晚餐點得唔多...先來個發醇味噌拌麵即係沾麵 $69，新開張仲有優惠減$10👍😌！餐牌話個汁好味要加白飯$16，最鍾意食日本米就一於加！的確冇令我失望！麵質係有彈性有咬口嘅質感，個汁除左有鰹魚味，仲有好濃嘅味噌味😋，有d 肉碎，如果可以加粒流心蛋就好！撈白飯其實都好味，只係嫌碗飯細碗左d，及對我黎講碗麵辣左d... 但我地最後連汁都清晒！👍 細沙律$20，蔬菜新鮮，唐揚雞5件$39 真係好抵，大大舊肉，仲要外脆內嫩，清晒！店內一貫日式設計，侍應後生，服務算細心，最緊要竟然唔使加一感覺物超所值👍，下次一定會再幫襯！😌