影片
更多
2013-08-31
708 浏览
去農村開日本餐廳等發達，其實真係唔難。只要鋪面裝修靚靚，掛幾塊寫日文嘅布同板，門口放個日本酒擺設，啲茂利就會以為任何上枱嘅都係日本直送美食。尋晚我同男朋友就係咁樣上咗當。喺餐廳樓下見到張剪報，睇落似係報紙訪問，話有多年經驗嘅日籍師傅駐場。睇落好似唔錯喎，於是我哋就摸上去試下。入到餐廳，裝修幾好喎。地方寬敞，每枱之間都有一段距離，咁嘅格局喺放題餐廳嚟講非常難得。客人唔多，得四五枱，主要坐喺門口一帶。餐廳播住up beat澎湃嘅音樂，仲有天空之城同龍貓嘅remix版㖭，加上聲浪之大，我差啲以為自己去咗劈場。坐低嗰吓，即刻有女侍應嚟話會先上一個刺身拼盤，嘢食可以慢慢畫，嘢飲就去自助飲品吧自己拎。佢態度殷勤有禮，令我哋就咁墮入天仙局。叫咗幾樣壽司、軍艦同沙律，我就出去飲品吧打個轉。汽水有好幾種，重有熱水同茉莉花茶㖭，之不過綠茶欠奉。為咗彌補不足，店方另外放咗三桶睇落新奇好玩又刺激嘅飲品任君選擇。我呢啲大鄉里出城，實在少見多怪，忍唔住影低其中一桶公諸同好。埋到位，都仲未知道伏已中，兩個人繼續黐黐呆呆坐埋一台，熱切期待上菜一刻。說時遲那時快，刺身拼盤一個箭步，華麗麗咁登場鳥。諗返真係有少少後悔，我
尋晚我同男朋友就係咁樣上咗當。喺餐廳樓下見到張剪報，睇落似係報紙訪問，話有多年經驗嘅日籍師傅駐場。睇落好似唔錯喎，於是我哋就摸上去試下。
入到餐廳，裝修幾好喎。地方寬敞，每枱之間都有一段距離，咁嘅格局喺放題餐廳嚟講非常難得。客人唔多，得四五枱，主要坐喺門口一帶。餐廳播住up beat澎湃嘅音樂，仲有天空之城同龍貓嘅remix版㖭，加上聲浪之大，我差啲以為自己去咗劈場。
坐低嗰吓，即刻有女侍應嚟話會先上一個刺身拼盤，嘢食可以慢慢畫，嘢飲就去自助飲品吧自己拎。佢態度殷勤有禮，令我哋就咁墮入天仙局。
叫咗幾樣壽司、軍艦同沙律，我就出去飲品吧打個轉。汽水有好幾種，重有熱水同茉莉花茶㖭，之不過綠茶欠奉。為咗彌補不足，店方另外放咗三桶睇落新奇好玩又刺激嘅飲品任君選擇。我呢啲大鄉里出城，實在少見多怪，忍唔住影低其中一桶公諸同好。
埋到位，都仲未知道伏已中，兩個人繼續黐黐呆呆坐埋一台，熱切期待上菜一刻。說時遲那時快，刺身拼盤一個箭步，華麗麗咁登場鳥。諗返真係有少少後悔，我呢個鄉下妹居然無影相，白白浪費一個上面書曬命嘅機會。要知道當晚嘅刺身拼盤非一般刺身拼盤可以媲美，我為佢改咗個名－後現代建構主義刺身拼盤。師傅刀功精湛，冰上鋪嘅每一塊三文魚、吞拿魚、鮑魚、希靈魚、劍魚腩、帶子同油甘魚，大細厚薄大不相同，形狀毫不一致；甜蝦嘅大細長短亦有所差異，有啲仲係得半截嘅㖭。望住呢件五花八門嘅藝術品，我呢個大老粗居然毫無憐香惜玉嘅心，就咁一口吔咗八分之一件帶子落肚。
就係咁，我就受到日式料理神嘅懲罰。
時間彷彿喺嗰一剎那停止，味蕾上嘅腥味陡然爆發，軟綿綿嘅帶子小姐輕輕黏上我條脷，難捨難離。我突然諗起以前上邏輯堂時助教講嘅一番說話：「好嘅日本餐廳會喺刺身下面鋪層冰，但係唔代表有鋪冰嘅都係好嘅。」
我飲啖忌廉梳打，繼續挑戰其他佳麗。吞拿魚切到藕斷絲連，三四個斷層連住上；希靈魚三尖八角，腥味層出不窮；劍魚腩同油甘魚，食落其實差唔多味。成盤嘢就只有三文魚同鮑魚放得落口，所以其他佳麗就一直瞓喺冷宮上面，最後為咗唔好留低咁多廚餘，我就同男朋友一人一件輪流食埋佢。
接落嚟嘅選手係火炙壽司。黑椒吞拿魚因為帶住濃濃腥味，所以無論點乾點硬，我都仲可以知道自己食緊魚。至於芝士鰻魚同芝士帶子嘅質感，簡直難以形容，加上卡夫芝士霸道嘅味道，的的確確為味蕾提供一次新體驗。神秘嘅係所有火炙壽司上枱嘅時候都係凍嘅，似乎間餐廳係用冰火燒嘅，今次又學到新嘢喇。
完咗火炙，輪到軍艦同沙律。海膽軍艦非常正常，入口嗰刻我差啲感動到喊出嚟。辣味三文魚無魚味，不過有辣味，至少交咗一半戲。層紫菜係全餐廳最新鮮嘅食材，多少可以包實入面舊酸到不行嘅飯糰。
我哋叫咗冷豆腐沙律、中華沙律同蒜味墨魚仔。冷豆腐沙律其實就係一般沙律菜加細細粒嘅豆腐淋上日式芝麻醬所製成。入面嘅百福豆腐滑到呢，簡直繞樑三日，令我哋完全唔記得剪報話啲豆腐係自家製嘅。墨魚仔同正常日本食肆提供嘅無咩分別，當然如果無雪咁耐而搞到啲醬汁起粒粒就天衣無縫啦。
正當我以為日式料理神比我嘅試鍊已經告一段落嘅時候，佢又再次顯靈鳥。個中華沙律貌不驚人，頂多係少啲芝麻，顏色再鮮豔啲。點知一入口，嘩！忍唔住要將佢即刻出口。嗰種曖昧嘅口感同奇妙嘅味道，仲奇異過奇異種子呀。男朋友見我驚魂不定，即刻放一大扎入口，咁又做咗個轉口港喇。
你知啦，食放題有嘢食剩要罰錢㗎嘛，打死都唔好俾個中華沙律滯留啦。於是我男朋友同一個男侍應講個中華沙律變咗，可唔可以收咗佢。個侍應呆一呆，即係拎走個中華沙律，走咗入廚房。
呢個時候我哋都仲未識死，反正錢係咪都要俾，一於同佢死過。男朋友話食日本嘢就好似食女咁，食熟嘅總安全過食生嘅。聽落又好似有幾分道理，於是就畫咗幾樣串燒、爐端燒，加多個冷麵同牛骨湯。
落咗單無耐，先前嘅男侍應再次出場。佢非常客氣咁放低一個中華沙律，好有禮貌咁道歉，話換咗個新嘅俾我哋。我咬咗一啖，再嘔返出嚟，真係一山還有一山高呀。
等咗無耐，各樣熟食紛紛上場。廚房非常貼心，每樣嘢都保持室溫，費事我哋熱親條脷。個豬頸肉落咗好多鬆肉粉，放入口嗰下真係唔知自己食緊咩。雞中翼非常純粹，無醃無燒，入口就知道係煎嘅，上面仲有點點血漬。燒一口豆腐變咗唔臭嘅炸臭豆腐，而芝士豆腐就變咗打邊爐嗰種芝心丸。冬菇食落無咩唔妥，不過望落似係俾唔知咩咬咗兩啖咁樣。好彩牛舌同一口牛肉尚算正常，所以之後再叫多咗兩客。
牛骨湯個味道同出前一丁隻東京醬油豬骨湯一樣，不過話晒係餐廳出品喎，點會淨係得湯呢？所以湯上附送幾堆漂流嘅唔知咩肉粒。我望住個湯，我望唔透，我真係唔明點解隔離啲客人會食得咁開心，仲話啲嘢食有幾新鮮幾好味。
最後嚟嘅係冷麵。個醬汁帶有沙律醬嘅質感，但係帶住一股辣味。配上硬身嘅麵條、青瓜絲、粟米粒同蟹柳絲，個冷麵靜靜等待下一位勇者嘅挑戰。
當我默默同兜麵作戰嘅時候，男朋友去咗洗手間。到我開始懷疑佢跌咗落馬桶浸死咗嗰陣，佢終於笑騎騎咁死返嚟。原來佢去廁所之前特登去咗廚房門口打個轉，發現嗰位所謂專誠喺日本請返嚟嘅日籍師傅講嘅廣東話仲流利過唐英年，睇怕都嚟咗香港四十幾年囉。入到去廁所，佢就發現幾桶汽水棟喺入面，唔知間餐廳係唔係用可樂洗馬桶嘅呢？
去完廁所，自然會用梘液洗手。撳咗兩下，發現梘液個質地幾別緻喎。一望，見到啲梘液適合油性髮質，原來係護髮素嚟嘅。睇嚟呢間餐廳真係好體貼，甚至連客人嘅手毛都會細心呵護。
罷了，罷了，呢個時候我哋先識埋單走人。每位連加一盛惠二百四十蚊。落到去大堂，我再望兩眼份剪報，「X你，廣告嚟嘅喂！」去到呢一刻我先至明白，懲罰我嘅從來都唔係日式料理神，而係豆腐火腩神。
张贴
