城意

营业中

休息中

之前呢间葡国餐厅新开张时已经有留意，但望到餐牌觉得价钱唔平所以无试，今次同同事试过之后又觉得性价比唔错㖞！午市餐牌有17款选择，价钱由$70到$228，每日亦有一款特价午餐，比其他日子便宜$8到$30不等。所有主食包任食沙律吧！！仲有餐汤及饮品。自助沙律吧有菜，蕃茄，车厘茄，青瓜，螺丝粉沙律及薯仔沙律，另有千岛酱，橄榄油及意大利黑醋自行加配。选择唔算好多，但蔬菜新鲜，个有薯仔沙律好好味，都算有质素。餐汤系忌廉甘笋汤，杯装上，几香浓好饮。① 葡国香煎脆皮鸡扒配香菌忌廉汁，薯条 $88② 烤湿式熟成猪鞍扒，薯条 $148薯条可免费改成意粉，上餐时见到系茄汁烩扁意粉有惊喜，份量亦好似比薯条多。两块扒都厚身大块，肉质嫩滑有肉汁，完全唔柴皮，正！猪鞍扒个汁就太水，无咩味，不过唔点汁就咁食都已经好好食！③ 开心果朱古力蛋糕 $38④ 伯爵茶炖蛋蛋糕 $38本身食完沙律加主菜已经够饱，但见到甜品柜啲蛋糕又好吸引，于是跟餐加配左2件Amor蛋糕，价钱唔算平但上盘卖相更靓，味道唔会太甜，都可以接受。埋单唔使加一，对比同区其他西餐厅，其实都唔算贵，而且食物质素同份量仲更胜一筹。