興興 (已結業)

其實我之前都黎過幾次，雖然d 野食麻麻地，不過個醉雞窩真係幾好食

今晚初二同朋友黎打邊爐，我朋友唔食牛，所以叫既全部都係$28-$58 既料，叫左5-6樣，計埋個醉雞窩$128, 埋單要$480.

平時因為一大班人黎食每人唔過$150 所以唔會check 單，今次我個fd 又有check 單，計晒全部野$358, 佢計多左成$130.

老闆娘拎張單過黎仲笑笑口咁話今日加埋一，但加埋一都唔會過$400，之後我地叫佢過黎喺我地面前計一次，點知佢無啦啦話今日加三！！！

然後佢話櫃枱嗰度貼左張紙寫住加三, 個員工仲話我地一入黎有同我地講，我聽到對眼都差d 跌出黎
1. 櫃枱張紙真係大到得一部iphone 咁大貼喺櫃枱面度，唔係棟起身，仲要係用原子筆寫，唔走埋去根本睇唔到 (最衰唔記得影低)
2. 我同個fd 4 隻耳入黎都冇聽到要加三

我都明哩幾日要開工你d 伙計都要加人工，但我平時幫襯加一都唔洗無啦啦加三真係好襟計，但一樣還一樣，張紙真係超鬼祟，唔行到埋收銀枱都睇唔到，而且我地埋單係叫佢過黎埋，所以我地正常佢唔講張紙喺嗰度我地一世都唔會知哩個訊息

我覺得如果佢地大大張A4 紙貼喺門口用雙頭筆寫住初一至初三要加30%, 咁就減少左好多爭拗，依家食完先同我地講櫃枱有寫，即係明屈，同信用咭d 條款有咩分別，定係半熟客真係易搵笨d

老闆娘仲拎部計數機過黎同我地計，原來佢全部野都係round up 咁計，e.g $128 就計$130, 即係$28 既野變相就加左一，其實我都唔明，計數機撳$130 同$128 都係要撳3 次，唔明點計要round up 黎計，你話心算就話嗻

而且咁樣真係唔係好老實囉，明明碟野寫$28, 你又收$30, 即係博人唔check 單，咁唔通隔離枱食個碟頭飯$58 你收人$60？佢話次次都round up 咁計，即係我同fd 之前黎食幾次一直都係咁比佢搵笨架嗻，假設我地叫20碟野即係變相收多左我地$20？

老闆娘同我地講話原本今日唔做打邊爐添，講到好似皇恩浩蕩咁破例比我地咁，但我地一入黎第一張枱兩個麻甩佬已經打緊邊，而且我地一坐低伙計已經問我地係咪要醉雞窩

酒樓坐得舒舒服服都係加二，一間茶餐廳竟然要加三，重點係張紙勁鬼祟，咁有爭議既地方一係我地入黎嗰陣問句我地今日加三你地o唔ok, 食完先同人講我覺得始終都講唔過

因為我有個fd 好鍾意黎食所以我冇當面爆佢當比下面，但嗰日我個朋友真係超級嬲，我都覺得我當日咁鵪鶉好對佢唔住

最後老闆娘收左我地$400, 仲好霸氣咁話請我地食都得，個問題唔喺幾錢度囉，如果我地知你加三都照入黎咁就心甘情願啦，自己抵死啦，但依家我地係唔知情，依家比$400 當加一都比足面你添，平時連加一都唔洗

咁樣做生意，我如無意外都唔會再去食