海鮮站 (已搬遷) 新店位置

初次幫襯。見朋友慶生大曬海鮮相，心思思來試一次。是日推介是奄仔凍蟹，兩隻$488，好大隻（以奄仔黎講）。奄仔就是處女蟳，未交配過的雌蟹，勝在啲糕柔軟嫩滑，通常油鹽焗。始終未食過凍奄仔，所以問老闆娘有冇單一隻，竟然有！但細隻好多$218。點知有啲喜出望外，好多糕，唔腥，而且糕好滑，似咸蛋黃雪糕。好味。此外點了：- 白酒煮青口：只是一般，個湯底淡啲 (唔記得影相)- 椒鹽單骨雞翼：超乾身，脆、香。好味- 籠仔芥蘭：完美生熟度，配金蒜同甜豉油，好味- 龍蝦湯泡飯：我個人偏好干邑味重的龍蝦湯，所以略嫌不夠濃，而且其中有一隻蜆唔新鮮有腥味；飯煮得太黏，不宜做泡飯；湯量太少，最後幾啖食白飯，建議可加散點龍蝦湯。不過標價超親民，一客$86，而且有蜆肉、蝦肉（部分疑似隔夜翻炸多次至乾硬）、蟹肉等，算抵食，但嚴格來說普普通通。最後，我很在意牆上那些不倫不類的英文翻譯（職業病）... 店主可以花幾百蚊揾個人執一執嗎？粿條是A Wrapper；金沙骨是sand bone。難怪在遊客區卻只有香港人和少數內地人光顧。