香港燒味堂 (已結業)

呢間燒味舖，開張一個月試咗兩三次，啲嘢食質素真係無得頭。即使午市最忙既時段，嘢食嘅質素有少少浮動，但仍然跑贏同區大部份所謂嘅「高級燒味舖」。而且仲未提佢哋啲飯嘅價錢，下午茶最平$42就食到個燒味飯，仲要跟埋小食有嘢飲。即使午市去食飯都只係$45一個單拼飯，簡直係同區超值之選。我暫時試咗燒鵝、油雞、腩叉，同埋燻蹄。燒鵝夠味又夠肥，油得嚟又唔怕太肥膩，啲皮又夠脆，外賣飯盒$45都食到咁嘅燒鵝，都唔知邊到可以搵到咁嘅質素。油雞就夠色又夠香，肉質嫩口，隻雞啱啱好熟，保證唔會靭，咬落去既有雞肉嘅肉汁，仲有啲豉油嘅甜香味，實在難得。至於腩叉，其實佢地係用燒腩仔嘅腩肉，但係用叉燒嘅做法嚟整，出到嚟夠哂甘香，但係會有少少膩，唔係個個啱食，不過呢一款唔係度度有，值得一試。到最後個燻蹄，第一啖食落去雖然一般，但係㗳真啲又食到佢哋用咗酒去浸啲燻蹄，雖然用酒去浸係基本中嘅基本，不過呢間係我食過咁多間燒味舖入面，唯一一間可以食到呢啲多層次嘅味到，十分推薦大家試一試。美中不足嘅係佢地出餐嘅時間需時，唔似其他燒味舖即叫即有。不過個人嚟講都明白嘅，畢竟每碟都係精品，可以理解。