T吧 (已結業)

今次到逸東酒店T Bar係應朋友之約，試下佢個下午茶。喺酒吧食afternoon tea ? 冇錯，我初時聽都以為朋友講錯，但原來真係有(佢同事試過)，好啦既然佢咁有興致咁一於去試下，其實本人已經有成年冇試過去酒店食afternoon tea set，今次見佢平平地就試下啦！

當日都唔係太多人，可能因為係平日，環境都幾舒適，感覺唔錯！嗌左一個二人afternoon tea set，個樣都ok啦，當然俾得呢個價唔好expect會係超華麗精美。加$20有花茶，試左個荔枝薄荷茶，幾特別所以想試下，味道幾清新，但如果荔枝味再多返少少就更好喇！

其實佢呢個以花做主題嘅下午茶都算有心思嘅，每樣item味道都ok，我自己特別欣賞個薰衣草三文魚醬三文治卷同埋個玫瑰忌廉！

都係嗰句啦，以呢個價錢 ($268 /2人用) ，有呢D食物同環境，我覺得都值嘅，尤其環境十分舒適，絕對可以過一個愉快嘅下午！