嘉嘉好宴會廳 (已結業)

其實好少幫襯嘉嘉好外賣，我哋大多數都係幫襯佢隔離嘅牡丹金閣，點知嗰日好夜唔想叫家姐煮飯，於是乎就買外賣返屋企。 本來係想食雙餸飯，點知去到我哋又改變主意。家姐想食燒味飯，而我就俾佢啱啱拎上枱嘅焗豬扒飯吸引。 焗豬扒飯跟一個汽水$35，雖然話就話係啱啱焗起，而我返屋企嘅路程只係5分鐘，點知拎到返去啲飯已經係暖嘅，不過啲豬扒好入味，我覺得OK。 反而我家姐嘅燒腩仔飯完全唔掂，啲燒腩仔硬崩崩不特止，仲要仲要冇俾豉油或者醬汁，乾爭爭(攪到我家姐自己加豉油)，啲飯完全係凍嘅，好後悔！ 不過價錢嚟講咁真係平到飛起，燒腩仔飯$26，我個焗豬扒飯加嘢飲$35。其實我之前食過佢哋嘅外賣蒸飯係OK㗎，下次外賣，應該幫襯佢哋嘅蒸飯就好了。