三藩市餅店 (已結業)

原本對糕點意慾唔係太大，行過路過都未必會望，週日喺佐敦行街，居然會俾呢間餃店吸引、仲要消費埋，對我地黎講都好稀奇，完全係被賣相弰誘。三藩市餅店除左糕點、糯米糍、奶油蛋糕，主要供應麵包。桂花糕一共有5種口味，包括原味、椰汁、玫瑰、杞子、杞子龍眼，每件一律$8。比起一般糕點大，約手心大小，以保鮮紙扎緊，好似舊番梘，幾可愛。原本只係想買兩件過口癮，但店員話買四件有盒，另一半就傻傻的為左個紙盒買多兩件(暈)。椰汁、玫瑰、杞子、原味桂花糕 $8/件一共買左四件，杞子桂花糕口味最正常，口感軟嫩，傳統糕點清香，杞子份量都多；椰汁糕帶淡淡椰味，甜度適中。玫瑰味好明顯係賣相行先，單靠花瓣好難做出咩味道，甜度亦唔自然。反而原味太淡，印象模糊。糕點即日食會比較鬆，隔夜兼雪過會實啲，影響口感。