金香南亞小廚 (已結業)

元朗食日本嘢出名，但泰菜都唔弱㗎！今次我哋就試咗呢間「金香南亞小廚 」，門面好似一般茶餐廳咁，唔似食泰菜，但食物質素真係唔一般呢！我哋叫咗酸辣鳳爪、金柚沙律、蝦皇宮、馬拉盞炒通菜同埋豉椒炒蟶子，仲有兩杯飲品，珍多冰同生薑茶。五碟餸中只係酸辣鳳爪略嫌唔夠入味，其餘均做得十分出色，尤其金柚沙律同蝦皇宮；金柚沙律內的鮮蝦好彈牙，唔似雪藏貨，仲加咗大量炸蒜，好香口呀！蝦皇宮用上六隻大蝦加伊麵底，個汁好重椰子味，正呀，一啲都唔辣，甜甜哋好開胃，蝦頭仲有少少膏添！其餘炒通菜同蟶子都唔錯，我哋去嗰陣接近鋪頭關門，但絕對無馬虎了事，贊啊~一定會再幫襯！