我路過鰂魚涌同男朋友食餐lunch，想搵間坐得舒服既餐廳享受午餐時刻，12點鐘倒路過此餐廳，本來餐廳外menu好奇怪，好似好多餐點都無價錢，不過男朋友想一齊試，所以就入左餐廳。
店員幾友善既，帶我地入座。至於餐牌同另一位食評家一樣講法，A-F午餐餐牌，AB都係沙律作主菜，C-F餐都無咩好食，但抱著嘗試既心情，我地叫左一平一貴，一個日式汁豬頸肉飯同埋一個和牛漢堡扒配飯。
前菜都還可以，蘑菇湯好多雜菇以及有松露香（食得出係松露油雜菇醬加左落忌廉湯），係唔錯既，亦係唯一一道菜我覺得正常。至於沙律係雜菜沙律，唯一不足之處係落吞拿魚肉（罐頭哥隻），同埋無任何沙律汁，我覺得完全好似食緊貓貓狗狗食糧咁無味。
主菜方面就真係極度失望，可一不可再。
日式汁豬頸肉飯（$96，唔記得影個樣，但係性價比極低）
日式豬頸肉非常遜色，以我口頭試既味道就係，廚師先將豬頸肉先白灼，然後將類似普通李錦記燒汁之類既汁倒落去炒一炒豬頸肉同雜菇，再配一碗日本米飯，仲要唔熱，係咁多。味道同賣相完全係只值普通$40午餐水準。
和牛漢堡扒配飯（$148）
最嬲就係哩道主菜，和牛漢堡排我非常懷疑係低品質和牛肉，因為好難壓成扒之後煎到無曬肉質乾曾曾，仲要無額外汁提供，一直好似食緊擦膠，我甚至去到後來係太乾咬唔爛吐番出黎。
至於放和牛扒對上既洋蔥同碎雞髀菇，雞髀菇無咩特別但唔夠調味，但係洋蔥仲係生既同埋切絲唔夠透切，界開左一條條但仲係連住做一大舊洋蔥。至於同碟既餃子味道就正常，煎得幾脆，睇下幾牛油粟米都正常。唯獨就係和牛漢堡排最失望。
由於主菜太差，對甜品完全無期望。
結果甜品一望我以為係雪糕糯米糍，結果係超級普通裡面係士多啤梨醬棉花糖。
飲料，無特別。
完全唔會再中伏入去食，亦都明白番點解間間餐廳排長龍，哩間一半滿都無。
