牛壹台食x可可豬外賣專門店 (已結業)

在家工作令我有更多機會試吓屋企附近嘅餐廳，今日就去咗九龍灣商貿區幫襯呢間新開嘅牛壹台食。其實之前都有試過同集團嘅餐廳，味道係唔錯，而家係屋企附近開咗呢間外賣專門店，就有機會試吓佢哋嘅台式食物。第一次試，當然揀番啲傳統啲嘅台式美食，呢個紅燒牛肉麵湯底非常濃郁，麵質亦夠彈牙。佢嘅牛肉仲好好味，大大件又夠腍身，肉質嫩滑又有牛味，老媽子都讚不絕口。另一款台式美食當然係滷肉飯，呢個古早味滷肉飯比平時見開嘅較多汁，而佢嘅肉沫主要係切肉，所以仍充滿咬口，而且仲有蔬菜同醃蘿蔔，味道更加豐富。跟餐仲可以優惠價追加小食，我就揀咗海苔鹽酥雞，鹽酥雞外脆內軟，如果可以有更多海苔就更加吸引。而我就最鍾意食麻辣鴨血，入面除咗有五大件鴨血之外，仲配有豆腐同蔬菜，小辣嘅麻辣汁令我可以一食再食。黑糖珍珠鮮奶茶嘅茶底又香又滑，不過珍珠就唔夠Q彈。金桔檸檬茶都充滿茶香，冰凍而少甜嘅檸檬茶絕對解渴又怡人。