合家歡 (已結業)

尋晚出咗尖沙咀食團購雞煲,由於honey食得辣但唔鍾意食重慶麻辣,我地喺買飛嘅時候已經打算會order醉雞窩,但到落order時知道重慶雞煲都有唔辣,個老闆又話一場嚟度梗係試吓啲招牌嘢,所以到最後就放棄咗醉雞食返重慶喇! 佢個重慶雞煲汁底係我之前食過咁多次最"杰"嘅,好夠味,好好味; 之前食嗰啲雞煲嘅任飲都只係汽水啤酒,但呢度係包埋冷熱咖啡奶茶檸茶嗰啲,坊間真係幾少見; 呢度啲人好nice,清一色男士但個個都好細心,喺叫佢幫手影相嘅時候仲主動開包新嘅濕紙巾抺手,佢話”唔想整肥妳部機呀!”; 仲有佢呢度居然有農心辛辣麵任食,一般最多都係見過出前一丁咋! 佢話就話食兩個鐘,但喺未有新一輪(佢話10點先係下一輪)客人嘅時候,佢係唔會催你走,只係唔可以再落order,仲會叫你慢慢食添,咁當然自己都要自律唔好太過份啦! 我地7:12pm入坐,9:50pm離坐,足足食多咗半個鐘,雖然佢有叫我慢慢食咋,但其實喺埋單前我都有啲唔係咁放心架,事關佢團購度其中一項條款係”超時每一小時加收每位$38”,好彩最後佢都只係收我$20就算咋! 真係抵讚J