鬍鬚安火鍋菜館 (已結業)

呢間位於土瓜灣嘅鬍鬚安係區內為數不多嘅打邊爐專門店，店入面有好多唔同嘅湯底俾人選擇，包括海鮮、牛骨、胡椒等等。秋意越來越濃，所以筆者就選擇胡椒牛肚作為湯底，除左主角嘅牛肚，仲有番茄加左係個湯入面，微辣嘅黑胡椒胡椒加埋煮到爛融融嘅番茄簡直係一絕配。筆者之後叫左美國牛肉片，切工唔算差，大部分都非常之薄，只有一兩塊零零舍舍厚，不過都無太大影響，薄牛肉片只需要淥幾秒就ok，再加埋辣椒豉油帶翻牛嘅鮮味同埋胡椒特有嘅香氣，令筆者忍唔住叫多牒！響鈴亦都係必食嘅打邊爐食品，建議可以係食肉之前落，令到個響鈴唔會吸收咁多肥油，當然如果你追求味道遠遠大於健康就唔洗理啦。另外呢度有唔同嘅釀豆卜，特別嘅包括蝦滑、鯪魚肉等等，款式多樣，味道都唔錯，值得一讚嘅係個餡料都比較多，食起上黎感覺會比較滿足。至於金菇肥牛卷就比較普通，而且份量唔多，同埋點完豉油就即刻俾豉油嘅鹹味蓋過左金菇嘅味道，但如果咩都唔點味道就會太寡。最後不得不提，呢度嘅片頭非常好食，係即叫即整，送到上檯面嘅時候仲係非常辣口，酥脆嘅外皮包住彈牙嘅口感，但係調味略顯有少少淡，所以筆者建議可以配埋豉油一齊食。