富臨皇宮 (已結業)

同朋友食飯人又多，最怕傾傾下比人趕客，又唔想排隊等位，去連鎖集團酒樓就係我既選擇。波士頓龍蝦細隻咗少少，不過經典煮法配伊麵底索哂龍蝦味，龍蝦湯又會打個芡令伊麵掛起湯汁啖啖惹味👍🏻生煎菜肉包1碟6隻，可以一人一隻，包皮厚咗少少，但個底煎得香口又沾滿香蔥，熱辣辣上碟彌補不足。德國鹹豬手好大隻，肉質嫩夠，店員細心幫我地剪碎方便進食值得加分花膠北姑鵝掌煲唔洗100蚊，鵝掌炆得好軟身，冬菇大粒而且超級厚肉，花膠佢地做得較爽口挺身不過我鍾意食煮得較淋既口感，少少扣分。瑤柱金菇扒豆苗不過不失，真係好鬼大碟😳燉湯最驚喜，足料又夠火候，將材料既味道逼哂出來，每個人分到一碗仲有剩。樣樣小菜都太大碟結果眼闊肚窄食唔哂🙈埋單每人百幾，又有龍蝦食，宜家出去食晚飯呢個價幾抵食。