陳漢記 (已結業)

食咗十幾廿年嘅粥麵舖，終於都到咗光榮結業嘅一日。以前踢完波或者收工都會去食碗麵或者食碗粥，味道都真係唔錯。啲員工嘅服務態度一向都幾友善。尤其是喺天寒地凍嘅時候，呢度啲嘢食真係暖到入心。今次光榮結業梗係要捧吓場啦！特登揸車入大埔懷緬吓過去，排隊排咗九個字就可以坐低嘞。兩個人叫咗煲仔飯、豬膶粥、白灼鵝腸墨魚鬚同腐乳通菜，食落啲嘢食水準算係保持到，飽到一個點。希望老細可以考慮喺第二度再開過第二間，到時一定去再幫襯！