1
今次嚟到銅鑼灣登龍街永光中心嘅囍筷大排檔，源自於坪洲呢個小島上，店舖延續坪洲主店主打新鮮海鮮，店主每日從坪洲攞新鮮活海鮮，保證顧客可以食到坪洲原味道，餐廳保留咗坪洲鄰舍氛圍嘅熱鬧感同埋人情味，同客人打成一片，亦為客人慶生搞氣氛。餐廳裝潢以懷舊港式大排檔氛圍為主，係一個好地道嘅體驗。
脆皮芝麻雞
囍筷大排檔嘅招牌座之一，雞肉外皮炸至香脆，雞肉鋪滿芝麻，外層滿口芝麻香，香氣四溢，內裏保持鮮嫩多汁。
口水花甲王
每日坪洲新鮮花甲，花甲肉質肥美，加上餐廳嘅秘製麻辣汁，麻中帶鮮，開胃過癮，麻辣加鮮甜充滿豐富味覺體驗。
乾迫粉絲蝦煲
粉絲用砂煲鍋迫至乾身，砂煲鍋保持熱力同埋溫度，粉絲爽彈入味，粉絲吸收咗海蝦嘅鮮味，再搭上芫荽，非常惹味。
懷舊炸大腸
炸大腸炸至外酥內軟，油脂香氣濃郁，係好懷舊嘅香港街頭小食之一。
鍋塔蝦籽豆腐
蝦籽豆腐炸至金黃色，再加上醬汁喺鍋度燜煮至入味，口感外脆內嫩，蝦籽濃郁嘅鮮味同豆腐豆香結合，好鮮美。
琥珀糖合桃
琥珀糖合桃外層香甜酥脆，內層爽脆，帶有核桃香同埋焦糖味道。
