尖東小廚

营业中

休息中

【油尖旺區】【尖東小廚】講吓呢間尖沙咀嘅小菜餐廳，不過係喺尖東噴水池嗰邊，行去紅館都相當方便，所以會納入 1am紅館 系列嘅。之但係我去呢晚紅館就冇 show，餐廳裏面就真係門可羅雀，計埋我呢個客，夾埋好似得三張枱有客。呢度個租應該唔平㗎喎，所以真係要諗諗計。我就做「飛來蜢」，只係一個 walk in 客人，簡簡單單叫個餸食碗飯咁嘅啫。叫完嘢食之後都好主動送碗例湯「蓮藕章魚煲唐排」畀我，唔錯，碗湯都唔差，唔係茶記例水嗰隻。而我叫嘅就係小菜系列裏面 $158 嘅「冰鎮咕嚕肉」，貪佢夠特別，可能有驚喜。結果上菜見到個樣都幾靚，除咗有大量嘅冰，仲有啲生果，例如藍莓同士多啤梨，反而冇咕嚕肉常見嘅菠蘿，有趣。味道都正常嘅，啲肉都掛汁。加 $15 要碗「白飯」送吓佢，再加 $9 飲杯「凍檸茶走甜」，埋單 $182，一個人食白飯小菜都唔平，尖咀價囉。。。（地址：尖沙咀科學館道14號新文華中心地下82號舖）#1amfoodie #foodie #hkfoodie #thatfoodiething #hkfood #food #instafood #yummy #foodlover #delicious