樂園大排檔 (已結業)

聖誕期間，大學同學相約聚會，決定去陳根記食小菜，但去到先知爆晒人，要等好耐。所以即時轉場去左隔離的樂園大排檔，雖然都要等，但唔使好似陳根記咁誇張。我地一行13人，都叫左好多野食，上菜都幾有效率，好快就到。點左必點的蟹子芥末手撕雞。個醬真心正，夠多又夠惹味，加埋啲青瓜絲，火腿絲，蟹子又卜卜脆。炸蠔餅好大塊，略油，蠔仔都幾多，炸到脆卜卜，都係好食。豉椒炒蟶子個人覺得偏濕，而且有少少沙，雖肉厚，但質素一般。個金銀蛋時菜我鍾意，清清地，健康又好味，湯撈飯都好正。甜酸豬扒甜甜酸酸好好味，送飯又係好啱。個茄子煲火喉好夠，熱辣辣好好味，又係送飯之選。檸檬雞炸得香口，但雞就有啲鞋口，椒鹽九肚魚好燙口，好滑嫩好好食。一行人好似狂風掃落叶咁清晒枱面上的小菜，食得好滿足。個人覺得其實味道同陳根記差不多，價錢差不多，但唔使等位，絕對食得開心。