「LE-TA-SU 一人一锅」作为日式火锅店，除咗牛同海鲜之外，难得佢哋都为素食者留咗一个位置，仲系 vegan 嘅添。🌱12 种野菜套餐 $78，包括有莲藕，甘笋，粟米，本菇，金菇，绿毛菜，心内美萝卜，大白菜，油麦菜苗，甘笋，南瓜，冬菇。两款可选汤底都系全素嘅昆布汤底，一款写住「回甘味」，我冇问店员，但睇返佢哋 社交平台 应该系除昆布外，仲加咗绿茶茶叶嘅意思。🍵主食可选白饭，赞岐乌冬（加 $6），或葛丝（加 $6）。前菜/锅伴可选烧豆腐 4 件，或芋丝（加 $5）。可追加单品，饮品同甜品，单品全部都有肉我就唔 show 出嚟喇，呢排我悭紧钱所以亦冇追加任何嘢。😂我太太叫嘅系非素食套餐，但佢嘅野菜盛合就有得拣 LETASU 野菜盛合，或本地农场野菜盛合㖞 （加 $9）。12 种野菜套餐果啲菜应该唔系本地农场菜嚟嘅，不过单点 $38 亦可以试到（如果未售罄的话）。个汤清清哋得嚟都有啲鲜味，加咗绿茶叶系有啲甘甘哋嘅茶味，而且茶叶可以当埋菜咁就咁食。蔬菜都几新鲜，份量够多，食埋白饭系非常够饱。☺️酱料方面，日式火锅落胡麻酱一定冇错㗎啦，大路之选。真汉子亦都试咗柚子醋，有啲似食紧沙律汁，唔可以讲系钟意，叫做食厌咗胡麻酱嘅另类选择啦 😆。另外佢哋有蜂蜜酱油但我冇试到。豆腐虽然叫烧豆腐，但食落冇咩味，我亦都唔敢肯定系咪已经熟咗，不过我系就咁点胡麻酱食，感觉似街食到嘅胡麻酱豆腐，都几好味。我相信佢哋都系预人可以摆埋落锅度煮嘅。😀叫呢个餐佢哋会摆低个 vegan 牌，相信系响加汤时识别，因为佢哋会另外加滚水比你。呢个安排都几细心㖞。😊餐厅环境几舒服，位与位之间都唔会太迫。个炉嘅控制台响枱边，望落好似有几段火力可调较，但就算较细咗啲水都系滚到弹吓弹吓，令人有啲无所适从。😂限时食 75 分钟，收加一，只接受电子支付。我哋去嘅系沙田店，唔知系咪所有分店都有提供呢个素食套餐，大家去之前记得问清楚先呀。😙…查看更多
