Burger Mate

营业中

休息中

同老公咁啱行過見新開，一於試吓，點知有驚喜，點咗個芝士雞肉漢堡同洋蔥圈，漢堡包好食,爆汁,又大又平,洋蔥圈外脆內軟，炸得啱啱好，值得推薦👍🏻必定會再來😋店家都好貼心有手套跟埋，呢個疫症時期用啱哂，又唔會整污糟對手💯

今日中午經過呢間burger 店。比簡約的裝修吸引左。店內既選擇唔係話好多。但基本既款式都有。與同行既朋友分別點左芝士burger 和磨菇burger。。 眼見朋友食磨菇burger 好juicy。。食到d汁都流哂岀黎。。我食既芝士burger都好香。。但食多幾啖就會開始覺得牛肉偏咸。。但本身個burger係好大份。。所以女仔食完一個飽就一定會好飽。。另外薯條都係粗身既。。即炸既薯條都不過不失。。如果未試過既朋友。就一試無妨。。PS：同朋友講開一人之境呢首歌。唔知係咪店員聽到。。就立即播左呢首歌。如果真係聽到我講野而去播。。呢份貼心就值得加分。。

係啱啱新開嘅舖頭，經過見到環境唔錯，就同朋友入咗去試，只係想講真係好好味，個burger真係好足料，性價比好高。burger嘅肉味好夠，好juicy！一咬落去啲汁就會爆出黎😍 個人鍾意cheese burger同洋蔥圈😋 朋友就嗌咗個chicken burger，都好好味，一樣都係咁juicy！雖然舖頭入邊嘅位唔係好多，但食burger來講算係唔錯嘅😌 但佢好似淨係收現金啊😢 大家去之前記得帶定錢啦！

只此一次，下不為例，我自己是一個漢堡迷，每一星期總會食3次漢堡包，所以食漢堡包次數多過食飯，前幾日經過尖沙咀，見到有新開漢堡包，想食又心思思，就買左個chicken Steak Burger 黎試，但真心失望，肉質好鞋口同似未熟，如果用呢個價錢食呢d質素既漢堡包，不如我去M記食2次漢堡包，員工好似唔休做咁，冇笑容，如果新開張一定會好落力，但唔覺得佢地特別落力，冇笑容，死氣沉沉咁,一d活力都冇，是一個不愉快經歷

路過俾小店門外相片吸引，即管試下佢個經典牛肉漢堡啦，外賣一個包都俾個大紙袋，打開原來仲有紙巾和即棄透明手套，打開盒見到個包賣相普通，點知一食落去漢堡扒超Juicy，配埋啲醬汁無得輸，$66蚊都覺得物有所值，每咬一啖都醬汁流出但細節位係個包有塊紙接晒，加埋手套基本上唔會食到成手成身係，好細心。值得推介！估唔到我俾第一個食評，要讚店主夠真實。（P. S. 啤酒不是店內食物）

尖沙咀📍新開Burger店🍔又來尖沙咀覓食啦😚今次依間係誤打誤撞入咗去嘅意外驚喜🤓店面唔算太大 Burger嘅種類亦唔多 叫咗個好Basic嘅雞肉漢堡連埋汽水$70 價錢都算偏向貴 不過份量就非常充足痛足料 有洋蔥酸瓜蕃茄生菜同芝士做配料 加埋大大塊嘅雞肉 特別嘅係個雞肉唔係一般嘅雞肉 而係有特別香料嘅雞肉 唔係太識形容係咩味 有啲似係印度香料嘅感覺👨🏻‍🍳炸洋蔥圈 $25炸得好香脆 點埋茄汁食簡直係一流😚不過可惜份量少咗啲 如果多番啲就好啦整體上依一間burger店都唔錯！但係完全冇佢嘅資料😂可能都真係啱啱開咗冇幾耐 大家有興趣可以去試吓🤣Burger Mate (尖沙咀)地址：尖沙咀金巴利道78號金輝閣地下A號舖食物：👍🏿👍🏿👍🏿👍🏿環境：👍🏿👍🏿👍🏿👍🏿價錢：💰💰服務：👍🏿👍🏿👍🏿👍🏿性價比：👍🏿👍🏿👍🏿👍🏿*滿分=👍🏿👍🏿👍🏿👍🏿👍🏿*

行過金巴行道 見到呢間新開既burger抱住試一試既心態🤔估唔到咁Juicy完全唔會話太乾 太多醬 太咸廚師話麵包係每日人手製造👍🏻連啲牛肉 羊肉都係自家製好fresh🤤薯條係粗薯條 有口感 不過不失啦下次會再幫襯