Beef Mania (已結業)

中午時份，同老婆試下呢間野，第一次幫襯，我叫左個西冷定食，老婆叫左個牛舌定食，從來都冇相機食先既習慣，拎到埋檯即刻食，飯 … 兩碟都係凍既，西冷、牛舌 … 如果 1-5 分，5 分係熱，我比 2 分佢，大佬我唔係食壽司呀，熱既飯最多都係起個飯煲度筆出黎姐，好難嗎 ? 唔知係咪時下既人個個都要相機食先，仲要玩一輪手機先食，所以凍定熱都分唔清楚，我呢 d 老鬼就從來唔會咁做，連食物最基本既熱都做唔到，食野最緊要新鮮滾熱辣，呢間野冇下次喇。

相信大家成日都會去Donki買下零食咁~行得攰嘅時候可以喺入邊搵吓嘢食而荃灣海之戀Donki入邊嘅foodcourt，都真係好多嘢食㗎！首先介紹吓呢間Beef Mania-豚肉燒肉丼($58)燒肉丼黎講，價錢算平之餘亦都好食，大家如果肚餓嘅話就可以試吓~可惜佢冇set,所以我哋都冇專登加錢～雖然位於food court，亦都唔使怕唔夠位！好快就可以等到張枱-位置：荃灣海之戀商場2樓(荃灣西站C出口）Don Don Donki 海之戀店 Food Court

我真係好掛住🇯🇵，疫情前一年起碼去9次，無諗過會有呢一日出現🙈今日係星期一，專登同老公請左假，諗住平日人少少去行下街扮去旅行咁緊係一定會去「DON DON DONKI」啦，到左食飯時間，我地係DONKI 內的food court 搵食，老公就選左和牛專門店既Beef Mania，Beef Mania主要食品是以和牛同埋豚肉為主菜，咁當然質素都係好架啦，餐牌其實主推丼飯和烏冬，款式都唔少架老公就選左呢個自家製牛魔王丼，再加罐提子🍇芬達，盛為$76，其實咁既價錢食到日式和牛丼飯，當係思鄉一下，都唔係貴吖而店內仲有很多期間限定選擇比大家，有選擇困難症既你一定頭痛到不得了味道同埋質素都唔差咁當然同係日本食到既心情同感受係而家感受唔到的但算吧！寄望疫情快D遠離世界，可以早日回鄉🇯🇵

去左Donki買餸 太餓去左Food Court食Tea🤣好多餐廳揀 其實好多間都想食🤣見呢間圖片幾吸引諗住試下🤣 款式都唔少 揀左好耐揀左價錢上比較平既牛舌丼🙈.牛舌丼$68🐂👅份量對女仔黎講岩岩好 男人就應該唔夠食😂 牛舌份量都唔算少 薄切 燒得幾香幾惹味😋 唔韌 牛味都算濃😋 如果多d醬汁撈飯就更加正 仲有碗味噌湯 無乜特別.食Tea黎講份量就岩岩好 但如果係Lunch/Dinner就唔多夠飽🤣🤣🤣

海之戀商場2樓 激安之殿堂美食廣場有間 吃牛的日本餐廳 - Beef Mania。看看餐單 見到有極上和牛丼、自家製牛魔王丼、牛舌丼 和 「西冷牛扒丼」，通常我唔會揀最高價的 又唔會揀最平價的，選中價價錢的比較穩陣，見到個「西冷牛扒丼」應該ok，要$99　 我還加錢轉set。「西冷牛扒丼」個米飯就唔錯，飯粒分明，但個西冷牛扒就真係麻麻，顏色就似五成熟，但入口咬極都咬唔開，好韌，好韌！

今次已經第二次再來，上次試左個牛橫腹肌丼（牛柳）夠曬juciy，今次再黎試試其他來到簡左個牛魔王丼，見其他食評都評價麻麻地都有啲驚會伏結果都係抱住冒險既心態叫左個，味噌湯一樣都係好濃味足料，牛丼食落口好香口，又冇其他食評講咁韌咁，始終都係橫腹位，有啲筋位燒到咁香都算認真吾錯，另外醬汁都好加分、甜甜地有啲黑椒幾特別，撈埋日本飯食都好可口（飯上面有啲炒過既洋蔥都好香甜），肉有啲多 差啲食吾曬下次再試其他

咁岩放假約左朋友行完激安見攰攰地想坐底食野喇行到激安food court見到有間幾特別既燒肉丼飯行過去望下 就已經比佢既油香味吸引住😍作為食肉獸 緊係想試下喇😂望見餐牌始終因為係food court 款式吾算多但竟然有牛橫腹丼賣（牛柳）價錢仲要好親民 $99 因為一般出去食呢個部位都要成兩舊幾水買完之後搵左位坐底 同其他food court 一樣 環境冇咩特別 大多都係行完激安食野既 取餐後發現佢係跟埋味噌湯 味道都吾錯 有啲豆卜海藻蔥花咁 都叫做細心個飯食落去 十分有驚喜 佢係切左厚片既牛柳 煎到半熟 非常軟林 另外佢有配埋香辣免治雞肉係入邊撈埋黎食相當惹味 仲有甜香既燒肉汁 同平時食開既好吾同 十分抵贊👍🏻手勢不錯 可再戰😋

西冷牛肉丼，跟味僧湯。湯都算okay, 但牛肉真係唔得，參考圖片是有點厚度的，但實際上是薄切，雖然未有顯現師傅刀功但賣相已經唔得，味道很一般，未至於無味但一定唔值依個價。無下次

Beef mania,嘅牛舌飯真的名不虛傳，賣相非常吸引，而且牛舌爽口牛味香濃，成個牛舌飯好香，一食停唔到口，價錢仲要唔貴，60幾蚊食到咁優質嘅牛舌飯真係邊度有。

同朋友行完Donki，腳都軟，去food court坐下醫下肚！見到間牛肉飯好似唔錯咁，即管試下啦！七十幾蚊一個牛肉飯，一碗麵豉湯，再加幾蚊要左杯凍奶茶，米係日本米，口感唔錯，牛肉唔算韌，朋友覺得個汁幾好味！um.... 七十幾蚊嚟講，下次可以試其他野～而且個人比較喜歡吉x家🤣🤣🤣感覺上抵食好多！

話說好耐好耐都冇出街食貨，因為瘦情關係，同埋屋企新成員加入太忙！今日難得有少少時間就去左食個牛丼。見佢有個西冷牛扒丼就試下。首先個set包碗面豉湯。個湯係幾好既，夠熱。但係個牛扒丼就真係⋯⋯⋯首先個丼唔熱！牛扒又唔熱⋯⋯係暖感覺已經唔好。個飯好細，岩女仔食！男仕應該唔夠飽！食個主角先，牛扒冇牛味⋯⋯冇肉汁⋯感覺係一舊厚既肥牛（冇左肥高）佢配埋洋蔥同燒汁醬，成個飯得尼兩隻味！可以講話唔抵食，唔好食！如果真係要食既⋯⋯叫其他！$99蚊 有更加多選擇

Don Don Don Donki🎵🎶就到食飯時間行完Donki，就順便係food court食晚餐😸（其實陣油煙味好鬼勁🤪）兜左個圈經過呢間餐廳Beef Mania煎緊牛舌香噴噴好吸引。。一於就試佢！..牛舌丼·$68薄切嘅牛舌有10幾塊，牛舌一處理得唔好就非常韌，呢道就有啲啲韌都偏爽口，屬於可接受範圍😊牛舌煎得幾香有少少牛肉味，飯嘅份量女生應該好足夠，但醬汁真係偏少，啲飯未食到底已經感覺好dry食唔落🤦🏻‍♀️ 加咗啲味增湯落飯道🤣如果醬汁多番真係會加好多分！整體感覺中規中矩💁🏻‍♀️.

讚1. 調味其實幾好，個汁係有少少辣咁，同其他牛丼店好唔同，相當有特色；飯亦煮得幾好，唔會太爛，圓身米入口仲煙煙韌韌咁，唔錯彈1. 牛丼主角點都係牛，太！韌！啦！最奇係每一片都有一半係好易咬得開，另一半就韌到咬到咬唔開，塊塊都係咁，最後食剩一半2. 價錢實在係貴，近七十銀食Food Court，仲要個水準其實麻麻，肉痛3. 呢個唔關間鋪事，係個Food Court問題，滴水有啲嚴重噃

去咗荃灣Donki 個food court，呢個場極難揾位，等左一輪，終於搵到位但要同人搭枱，嘢食就揀左呢間試吓，叫左個豚肉飯，跟一個麵豉湯，嘢飲要另外加錢，叫了杯凍綠茶。豚肉薄薄的但都有豚肉香味，應該是不錯的材料，飯是日本米但不夠熱，醬汁偏少，於是成個飯整體就算不上好食了，麵豉湯正常可以咁啦，杯綠茶亦沒有什麼特別......考慮到價錢及只係food court 嘢，中規中矩啦，唔會話好吸引想回頭嗰隻囉！