影片
更多
2021-11-03
1582 浏览
話説聽到好多人都話呢間麵包店d麵包蛋糕好好味，我自己都經過見到都覺得好吸引，終於有機會去買嚟試吓，第一次去買感覺d服務人員態度都幾好，我都買咗好幾款麵包，麻薯波波、熱辣辣出爐芝士火腿包、朱古力牛角酥…麻薯波波外層感覺偏硬 內裡冇煙韌感，熱辣辣出爐芝士火腿包 熱辣辣食所以好軟好味，朱古力牛角酥甜度啱啱好 不過牛角酥有少少硬唔夠鬆，感覺上服務+味道都幾好唔算差，因為我仲想試埋佢d切餅 蛋糕，咁啱老公又差一星期就生日，所以順便訂埋生日蛋糕，訂咗個芒果拿破崙、另外又揀咗4件切餅…點知要攞蛋糕嗰日遇著8號風球，我見下午12點半都仲係8號風球就W’s app佢哋問吓啦…就話再有消息先回覆，直至下午可能3點幾4點就用電話聯絡通知要取消攞蛋糕啦，咁我就好自然話咁唯有聽日攞啦，不過我想早d攞，因為我有其他嘢要做又唔係住附近，對方話：都要晏晝3點後架啦，希望你明白諒解 整餅師傅聽日又有聽日d單要做，你訂個拿破崙又要你攞之前幾個鐘先可以焗架，(聽到呢到我個心諗咁點呀?)我都直接同對方講：其實我都完全明白完全諒解，因為天氣嘅嘢真係大家都唔想，對方跟住話：或者你可以過幾日先攞都得架，我即刻話：唔會過幾日架啦，係
真係覺得而家d人做嘢好奇怪(咁又係人哋打開門口做生意，使乜你教，你唔啱咪唔好幫襯)
當然最後第二日有攞到蛋糕啦。
芒果拿破崙 個人覺得麻麻地，脆脆偏硬仲有d𠝹口，4件切餅：Dark Chocolate Cake 、Tiramisu 好味 甜度適中 朱古力味好濃厚，芒果慕絲蛋糕 普通冇乜特別，Lemon Tart 好香好濃檸檬味酸酸地好清新但係超級甜。
老實講蛋糕同埋切餅收咁嘅價錢，一d都唔係平，個人覺得唔值，其實咁嘅價格質素好嘅有好多。
其實有以上嘅訂購經驗後都諗住少d去，點知有日屋企人經過話要去買d麵包俾小朋友，咁我就同佢一齊入去，夾完麵包埋單又 $ 2百幾(其實幫襯咗3、4次，訂蛋糕嗰次 $4百幾蚊，每次都 $ 百幾二百蚊) 今次收銀姐又話：有2個印花喎，不過有d麵包係唔計嘅所以冇印花(講真鬼知你邊d麵包計有印花邊d麵包又唔計冇印花咩) 我話：哎呀…我有2張印花咭喺屋企呀(2張印花咭各2個印花) 收銀姐即刻話：唔好意思！我哋公司係唔可以將d印花合併埋一張。我哋真係冇嘢好講。收銀姐問：咁而家有2個印花使唔使開張印花咭俾你哋？我哋話：唔使啦！唔要啦，要咗都冇用，又唔可以合併埋一齊。
(收銀姐咪盡責囉)
(老實講咁耐以嚟我哋真係未試過/未聽過喺其他有儲印花嘅公司買嘢話唔可以將印花合併埋一齊咪就係未聽過俾你哋聽吓囉) 我喺其他公司買完嘢通常佢哋都會主動問我有冇其他印花咭幫你合併埋一齊可以儲快d吖嘛😅(呢d員工咪倒米囉)
其實貴公司有儲印花嘅構思係諗住點呢？真係唔明(咁我梗係唔明啦，我哋呢d又唔係生意人識咩吖) 又想人買多d又驚人儲印花儲得快攞到你d禮物會蝕抵🤔非常奇怪。
其實唔係貪嗰幾個印花，講真我都唔會用得著，不過我覺得幾個印花使唔使咁…(只係我哋覺得少少幾個印花冇乜所謂但生意人就唔會係咁諗)
所以我諗都唔會再幫襯，試過就算，起碼人哋問有冇試過ABC Bakery d麵包同埋蛋糕呀，咁我都起碼有食過可以答下人吖😅
以上純粹個人意見，唔啱聽唔啱睇請勿理會。
张贴
