頂好海鮮酒家

营业中

休息中

😱 早前 “洪爺” 江湖飯局不歡而散, 老友 “意大利長介” 決定喺 “頂好海鮮酒家” 擺番餐和頭酒.🥢 餐廳入口係彌敦道, 直接落地牢一層, 傳統中式酒樓格局, 裝修少少殘舊, 但光猛闊落, 大堂一眼睇唔唒, 至少二十張枱吧. 今晚安排廂房, 除咗用餐嘅圓枱, 另設一張六人長方枱, 用嚟放下袋呀雜物等等, 又設大電視唱卡啦Ok.🥰 “電視台美女” 多番推介 “頂好”, 今次麻煩佢搵老闆寫菜.滷水生腸太白醉鮑魚砵酒薑蔥瀨尿蝦炒球荔蓉帶子盒滋味小炒王鴻運乳豬, 半隻, 伴海蜇清湯蘿蔔蝴蝶腩菠蘿咕嚕第一刀蟹肉扒豆苗XO醬火鴨絲新竹米粉生煎包美點, 糖水🐚 滷水生腸. 老友 “長介” 點名嘅前菜. 生腸大大碌, 以形補形, 爽口, 略嫌唔夠滷水味. 🐚 太白醉鮑魚. 夠大隻喎, 有嚼口, 唔靭, 用刀叉切, 酒味適中, 過關啦.🦞 砵酒薑蔥瀨尿蝦炒球. 薑蔥非常惹味, 蝦身起肉, 加炸粉炒球, 好食! 可惜, 浪費咗瀨尿蝦滑捋捋嘅口感, 蝦頭蝦尾原汁原味同樣精彩, 哈.🤗 荔蓉帶子盒. 我唔鍾意食芋頭, 但鍾意食芋角. “荔蓉帶子盒” 異曲同工, 表皮酥脆, 以原隻帶子作餡料, 真係啱啱熟,

難得大家同學仔一年聚會一次緊係要食餐好，今次唔例外都係來頂好，因為可以book房，可以坐幾個鐘大家慢慢傾偈，又講返細路仔時候嘅嘢😂係尖沙咀又方便大家咁就繼續揀呢間。今次已經寫好菜單，一嚟就有得食。先來一個頂好五小碟俾大家開開胃，然後天麻白术燉石頭魚湯，個湯好鮮甜好醒神，煲過湯嘅石頭魚肉及魚皮仍然好味好滑，超驚喜好啱飲；避風塘鮑魚，夠林又入味；薑蔥生蠔好多薑蔥，煎到脆卜卜唔錯；油泡大明蝦球，紅紅綠綠蝦又爽脆；蟹肉扒豆苗，好多蟹肉封住啲菜；薑蔥陳皮蒸虎彬斑，好滑好有魚味；脆皮燒雞真係燒到脆卜卜香噴噴。仲有飯麵甜品，超級滿足的一晚😀

估唔到天氣熱辣辣咁快就立秋，亦都估唔到咁快就有奄仔蟹食。同事食過好食，強烈推介，所以昨天星期日就同屋企人過去食。四個人食飯叫咗兩隻奄仔蟹，經理亦都有推介我們食奄仔蟹，佢話好多膏好多人客食過都話好正。咁我哋就叫咗兩隻試吓。用鹽燒。因為我哋覺得鹽燒味道香口濃郁，食落應該更加惹味。老實講都唔知真係靚唔靚，所以四個人叫兩隻試吓先。如果好食下次再嚟過。碟蟹一上枱，就望到滿滿蟹膏，金黃色，真係食指大動。馬上落手食，食蟹一定要落手食，一啖咬落去，啲蟹膏就好似雪糕咁，滑一滑，係黃金雪糕，好香口，連啲爪都食埋，唔好嘥。大家都覺得今餐應該食左正宗黃油奄仔蟹。侍應比盆熱茶我們洗手。服務都算唔錯。食到熱辣辣正宗黃油奄仔蟹大家都好開心。

中午嚟到頂好，叫了平時都會食嘅傳統點心 - 燒賣、腐皮卷、芋角、XO醬煎腸粉、粉果，水準一直都保持到，有種懷舊味道。今日見同事食燒味飯，我口淡淡反而想試吓鴨腿湯麵。燒鵝食過都不錯，我諗鴨脾應該唔會伏! 上檯時個湯麵原來好似炸醬麵咁-----湯同個麵係分上. 隻鴨脾放響幼麵上面(仲有條菜心)，有一 盅燉湯，湯顏色比較深色，估唔到入面有什麼材料。我個食法係: 飲一啖湯，然後食一啖麵，之後再食一大啖鴨腿肉。個湯好香帶甘味，鴨脾juicy 唔會UN，幼面彈牙有咬口無梘水味。整體感覺好正，覺得自己好似好識食咁😆呢樣一啖嗰樣一啖。食呢款麵，真係要慢慢一啖一啖食，滋滋陰陰咁，先至食到呢種經典感覺。

由於屋企有老人家，平時好少出街食飯，通常一家人都係屋企食，或者打邊爐，或者斬料，買啲燒肉或者叉燒返屋企一齊食，總之都係簡簡單單! 最近媽媽講咗幾次，叫我哋同佢出去食晚飯 。諗咗好耐，最後決定帶佢返去好多年冇去食過嘅頂好 （老人家的回憶）。一早寫定餸，盡量叫啲媽媽鍾意嘅餸菜，最緊要係林啲易食啲。最驚喜，其中有兩款菜，分別係清蒸東星斑同埋蒜蓉豆豉帶子蒸豆腐。條東星斑真係好滑好鮮、豉汁帶子豆腐好惹味。兩個餸都係好好送飯。睇落好簡單，但係唔知點解個蒸魚豉油同埋個豆腐汁都可以咁惹味。

父親節一家人食飯，離不開去酒樓食飯。今年都係繼續選擇頂好。一早BOOK好檯唔駛等，仲可以坐入房，環境OK 一大隻乳豬燒到熱辣辣、燒豬皮脆卜卜、豬肉甘香、連啲燒乳豬骨都有味。一人兩三嚿夾吓夾吓，成隻乳豬話咁快就消滅咗。最後連個乳豬頭都要攞返屋企煲粥😃第二碟係上湯龍蝦伊麵，真係冇得輸，都係啖啖肉，龍蝦爪就要用鉗小心處理，唔好嘥。西芹菜遠炒斑球炒得好靚，休漁期食到靚魚真係唔容易，好彩食到條星斑😋最後上既山賊醬燒汁牛肋骨又林又惹味，送飯食一流。食物正！個老闆成日都好熱情，又風趣。氹到我爸爸都唔知幾開心😁

明明Book左位，但係去到等左好耐都唔比位，仲要有枱都唔比位，問極都話等一陣，係都話要等上一張枱埋單先，但個客仲加緊茶，睇落好似仲未想埋單咁，如果上一張枱仲要飲多半個鐘，咁咪要企係到等多半個鐘。咁book枱黎做咩。如果只係留個張枱比第二批客嘅話，應該就要同上一台客講要埋單啦，有客等緊。如果唔係甘我walkin 都得啦。正一垃圾酒家，只係想做遊客生意，唔歡迎本地人。奉勸各位如果book左位嘅話要小心d，記得準備定plan b，因為就算book左位都未必食到。

以前的確有水準，但今日同屋企人飲早茶，叫了4款包括皮蛋瘦肉粥、蒸粉果、蒸叉燒腸、蒸排骨；第一款上枱「皮蛋瘦肉粥」淡口無味又唔夠料，同侍應反映，出奇地叫我哋加胡椒粉，然後有第二位同事過嚟話：我哋啲皮蛋瘦肉粥係咁㗎啦，有咩問題？咁你想點呀？之後蒸粉果同蒸叉燒腸，糊口難食。雖然皮蛋瘦肉粥最好有取消，但侍應態度極差。

天氣真係好熱，尖沙咀搵個地方可以坐耐啲食個下午茶嘆吓冷氣，決定走落去彌敦道間頂好。門口唔係好覺眼，要落幾級樓梯級先至到。由於係下晝2:30所以唔算多人，坐落靜靜地都幾舒服。叫咗兩個頂點：蝦餃+燒賣；中點：潮州粉果+牛肉球+叉燒包+鹹水角。下午茶時段點心有少少優惠。鹹水角好鬆化、叉燒包都幾大個，都可以講係皮薄餡料多、潮州粉果，韭菜好香花生肉好脆、牛肉球個喼汁好似有啲鹹、蝦餃多咗少少胡椒粉，減番啲會好啲、燒賣好彈牙好好食。坐咗兩個鐘，伙計冇催我哋走，唔話得。埋單時仲送咗碗綠豆沙俾我哋食。諗住送都唔慌有咩特別，又估唔到，綠豆沙入面有臭草，非常香。下午茶時段都有糖水送真係好！

天氣真係好熱，尖沙咀搵個地方可以坐耐啲食個下午茶嘆吓冷氣，決定走落去彌敦道間頂好。門口唔係好覺眼，要落幾級樓梯級先至度。由於係下晝2:30所以唔算多人，坐落靜靜地都幾舒服。叫咗兩個頂點：蝦餃+燒賣；中點：潮州粉果+牛肉球；點：叉燒包+鹹水角。鹹水角好鬆化、叉燒包都幾大個，都可以講係皮薄餡料多、潮州粉果，韭菜好香花生肉好脆、牛肉球個喼汁好似有啲鹹、蝦餃多咗少少胡椒粉，揀番啲會好啲、燒賣好彈牙好好食。坐咗兩個鐘，伙計冇催我哋走，唔話得。埋單時仲送咗碗綠豆沙俾我哋食。諗住送都唔方有咩特別，又估唔到，綠豆沙又臭草味非常香。下午茶時段都有糖水送真係好！

朋友在韓國生活已經幾年冇返嚟香港，今次返嚟佢好簡單，只係要求食充滿香港味道，尤其係想食菜心😄。我選擇帶佢去比較方便嘅尖沙咀食飯。揀咗四個餸菜：叉燒拼燒鵝、蒜蓉粉絲蒸蟶子王、山賊醬石鍋蠔、上湯芹菜粉絲菜心。有燒味有海鮮有菜心，相信都會合佢心意。叉燒好林好入味、燒鵝好香皮好脆；蟶子王果然係王，真係好大隻，個蒜蓉粉絲超入味，直情可以送一碗飯食；朋友話幾年都未食過菜心，心諗酒樓叫菜心好似有啲戇居，聽經理推介，果然好食過自己屋企整啲菜心，上湯加入唐芹，菜心煥然一新；最驚喜係石鍋蠔，隻隻蠔都肥嘟嘟，石鍋一上台已經有聲，感覺特別熱辣辣，鍋底墊咗好多大蒜，跳出左薑蔥生蠔煲嘅味道。大家都滿意。

同朋友相約去尖沙咀the one茶聚，但十点時間太早，酒樓都未開，朋友就話去頂好啦。呢間酒樓在尖沙咀起碼有40年歷史，要落地庫入酒樓，昔日好多明星幫襯嘅地方。入到裏面，有好多空抬，食客不多，装修都係好舊式個隻，地方尚算闊落，給人感覺係普普通通，点心中点$30，大点$36，頂点$42，茶錢$18位，價錢唔算便宜，侍應招呼一般。我哋叫咗雞包仔，蝦腸，潮州粉果，鲜蝦腐皮卷，粥同牛肉等，都係一般飲茶嘅点心，無幾耐，点心送到，鮑螺應該係罐頭個隻，粥味道不過不失。牛肉食落有陣怪味，唔新鮮，經投訴后取消咗。蝦腸蝦大隻，但略嫌粉皮厚同唔夠滑，味道祇屬一般。最後，埋單連加一，兩個人飲咗二百幾，呢間尖沙咀稀有的舊式茶樓，给我印象係食物好一般，下次應該唔會再嚟。

母親節就到又係一家人食飯嘅時間。今年提早一個星期，揀咗去尖沙咀食晚飯。因為係母親節嘅緣故，所以叫餸都係要就晒母親大人。叫咗頂好四小碟：叉燒、牛𦟌、海蜇、雲耳。四小碟越食越開胃。之後有個招牌杏汁豬肺湯（不過唔記得影相）個湯好濃杏汁味，湯料入面有好多豬肺，可能係唔使母親大人洗豬肺，佢食得特別開心。之後有荔蓉帶子匣，帶子出面包左一層厚厚的芋頭茸，鍾意食芋頭嘅朋友一定會愛上。乾煎茄汁大花虎蝦，我就唔扮斯文, 一於落手食, 覺得特別好味。清蒸東星斑，條魚非常滑。脆皮焗燒雞真係食師傅，屋企個油鑊點都整唔到咁好食。之後仲有菜飯麵甜品，甜品係綠豆沙同埋香酥餅。成餐飯真係合曬母親大人何車。

同老公帶四大長老去呢間老牌酒家食晚飯，平日唔多出街嘅老豆都講得出頂好個名，原來呢間酒家响尖沙咀䇄立好多年，仲好多明星食客!(老闆都成日响電視出現，所以熟口熟面)由於四大長老有鍾意食肉有鍾意食海鮮，所以我地做細嘅就儘量安排啱佢地口味嘅菜式。菜膽螺頭燉豬𦟌湯 - 入口鮮美、滋味濃郁，响街都享用到家的滋味蘿蔔糕炒蟹 - 蟹肉好鮮甜，用料上乘，但蘿蔔糕先係靈魂，索咗蟹汁好正燒雞 - 肉質鮮嫩多汁，香味誘人，雞有雞味蒜蓉粉絲蒸蟶子 - 蒜香味濃，蟶子味道鮮美，食得出好新鮮，粉絲係精華所在翡翠帶子桂花蚌 - 帶子爽甜、桂花蚌𡙁脆芝麻餅 – 最後小點作結，口感酥脆，為晚餐劃上完美句號總結：燒味及海鮮都值得推介，用料新鮮、價格公道，值得再去!

已經三年冇返香港，今次朋友帶咗我去尖沙咀頂好海鮮酒家食晚飯。地點彌敦道都幾方便，原來酒樓在地庫，感覺有點懷舊味道。朋友訂咗一間房，一大班朋友敘舊，有一間房真係好舒服，有私隱度、又唔會嘈到人。返嚟香港一定要食海鮮，叫左：薑蔥炒蟹、避風塘瀨尿蝦、清蒸彬斑、翡翠帶子花姿片，碟碟都好新鮮好味道，薑蔥炒蟹連啲薑蔥都食晒，水準真係唔錯。最重要係冇被劏感覺。燒味都好食：燒雞皮脆卜卜，雞肉又熱又滑，燒腩仔皮都係脆卜卜。好耐好耐冇食過一餐咁好味的唐餐。同朋友講好，下次返嚟香港都一定會再去食。