輕鬆一下 (已結業)

放假同個fd第一次行葵涌廣場，唔熟路都唔知去邊度食野，唯一見到呢間野咪試下囉...望餐牌款式好多，再望埋四周圍環境，好污漕...叫左兩個麵，一個擔擔麵，一個豬軟骨+雲吞。坐係近爐附近，見住佢整左碗擔擔麵出黎，跟住就叫左個女仔唔知拎碗麵去邊度加醬，但個女仔岩岩見佢用手(無帶手套)倒垃圾...最後放係我面前...我個fd話眼不見為乾淨...處處都係咁...但我真係好難接受果度咁污漕既環境...再說佢地整既麵都唔好食，不聞不類...無下次！

10 July 2006 (Mon) - 晩飯呢日冇乜謂口，因為晏晝食得太飽！平時黎開葵芳都好鍾意黎呢度食，因為呢度啲小食幾好味！但係今次．．．．今次叫咗燒賣，腸粉，煎釀三寶，魚菜翅(三溝)，豆漿同好友share食，但係樣樣都好似唔係好熱咁，涼涼地．．．　魚菜翅就味精好勁！而嗰度個阿姐又好唔識做，兩杯豆漿黎到我哋面前時，我哋見到其中一杯有啲污漕嘢喺杯邊，問佢係咩黎既，佢望一望居然話係菜黎啫，跟住仲用其中一支飲管liu走啲菜渣，然後比返同一支飲筒我哋．．．．好噁心呀，我哋咪話唔要啦，我哋只係要一杯豆漿夠啦，然我自己行去攞飲筒，我哋share飲．．．．真要命！雖然就算叫佢換比我哋，佢都係會走入廚房liu走啲菜渣比返同一杯我哋，但係都好過佢喺我哋面前liu，好核突．．．

之前1年前早上7點我見多人吃,我試下吃火腿公仔麵-吃得很好味煎蛋牛油飽-我鍾意蛋白,我不喜歡牛油飽,喜歡多士,下次我會叫烘凍檸水-飲得ok之前4年前我試過吃魚肉菜湯-吃得不錯可惜價錢很貴,我少去吃

在葵芳工作了差不多兩年，發覺這小店是長期滿座的。上週四，達文西密碼上映，我和男友買了7:00票，之前就來試試這裡的食物是不是真的那麼好~　男友叫了紅燒牛肉雞翼上海麵，看似很大碗，但其實份量不算特別多。我試了一口麵，麵質很稔沒有吸引力，牛肉與雞翼也是普通水準罷。我自己就要了腸粉、魚蛋及粉果，味道可以，卻沒有特別出色的感覺。　吃完，覺得味道一般，像大牌檔的環境，但價錢又不是特別便宜。不懂為什麼有那麼多人來吃?

有次同朋友去呢度食野，求其叫叫左碗麻醬，覺得好好食呀。今次係第二次食，碗裡面有清湯+小小炸菜+豆板醬+麻醬。而豬排係炸架，同埋會分碟上。可能本身好鍾意食麻醬，所以覺得好好味...

由於我在葵芳返工, 好多時都會在這家食店食lunch,我次次都會叫炸雞翼米線, 都好好味, 但多d味精, 因次次返到公司都要勁飲水, $19有2隻炸全翼, 都ok啦

過葵涌行街，貪平就黎呢道食。叫了墨丸河同炸雞翼麵，墨丸17蚊有5粒、好抵! 炸雞翼都有好多件，不過好似炸左好耐咁，腍哂、一0的都唔脆唔香口，叫滷水雞翼好過。碗仔翅同生菜魚肉都okay，想過下口隱都幾好。不過食完個麵已經半飽，最後係食唔哂既。黎得呢道食，對個環境都冇乜要求，一貫的迫同多人，食到成身熱哂，一0的都唔“輕鬆”=P。食物水準okay，想食平or 趕時間都食得過。

唔知係咪附近無得揀，又或是有風水物作祟，無論任何時候都咁多人，以獨行俠食客為主。上星期有日出黎食晏，無乜要求是但放d野落肚：菜翅- 全名"碗仔翅加菜"也幾足料，應該出現的材料都到齊腸粉燒賣好普通，無特別凍央評語同上整體來說一般。

今日放工同BF 黎食野,依然係勁多人,食左碗仔翅($11)同腸粉($5)碗仔翅好多料好厚身,食完勁飽腸粉好多花生醬同甜醬,幾好味lee度除環境外,d小食都ok既,好似炸雞翼五香牛肉麵同炸雲吞($5有3粒)都係我至愛,不過衛生程度方面就唔係甘好羅,次次食麵,碗邊都係肥淋淋,好似未洗乾淨甘.

此類小食店我經常幫襯, 常到...差不多一星期食幾次. 此店的擔擔麵曾被讚賞, 但我食過之後唔鍾意, 尤其是果種花生醬太多的汁...我好怕果種鞋鞋地的口感.將此類小店稱為"炸垃圾"店並無貶意, 只是統稱有好多煎釀三寶賣的小店, 雖明知食物營養價值頗低, 但依然日日口痕去食下.一坐低就亂叫:腸粉- 差! 甜醬用了太多酒來開稀, 似食酒多過似食醬.三寶- 冇魚蛋! 有d失望. 油左d, 個豉油汁又唔夠厚(唔夠厚就chi唔到上d三寶)碗仔翅- 太多料太厚獻, 好辛苦至食到一半炸濕豆腐- 老公叫, 味道好似ok.加罐可樂total $30, 唔算貴. 我咁細食都有本事在荃灣一個人食"炸垃圾"都食到$50埋單先至算離譜.

d 飯好大碟~~ ok~~我飲左過魚肉湯~~裡面有隻昆虫~~唉~~荼餐廳間間都有ga la~~我遇到只怪我唔好彩~~

魚旦都唔掂！！我幫襯了一次後都冇再幫襯了解

就係因為呢間野搞到個商場cheap 晒, 雖係多人幫親. 魚肉翅都$13, 豆漿一D 味都冇! 一句講晒CHEAP !

由一間舖變兩大間，真係越做越大，因為無時無刻都咁好生意。腸粉、辣魚蛋同燒賣仲要加埋辣醬同甜醬係我必食之選。仲有碗仔翅同上海麵都係唔錯選擇，又平又抵。如果趕時間就最好o黎依度食，因為真係好多人又好迫，食完要立即走人。

真係好多小食, 炸o野, 魚旦, 魚肉碗仔翅, 連上海麵, 擔擔麵都有~ 我最鍾意佢個擔擔麵, $16~ 唔正宗o架, 只係花生醬同辣椒油加落一大碗炸菜肉絲上海麵度, 不過我好鍾意食~ 不過依度坐得唔舒服o架, 兩個舖位都可以坐滿晒, 幾迫, 仲要係無pen椅~