美味食店 (已結業)

收工後肚餓又未到食飯時間路過呢度就買d小食同朋友仔share左辣魚蛋($5)同台灣腸($6)個魚蛋用辣汁去浸真係好辣我同朋友仔都覺得辣到有d頭痕台灣腸有辣唔辣之分我地俾魚蛋辣親之後當然要原味外皮烤得幾脆入面d肉亦唔覺多肥膏粒都可以但記憶中之前去台灣旅行時個味道唔係咁架係特別d好味d呢不過算啦大大條成條司華力腸咁大都好抵食另外有朋友試左臭豆腐或者因為一早炸好又搬左入廚房入面炸已經再唔係以前經過時聞到o個種臭味聽講味道亦只係一般咋

琴日下午經過肚仔餓買個格仔餅同朋友仔兩份食醫肚因為我唔食牛油請佢一邊要牛油一邊唔要阿叔無因為只係幫襯8蚊又要求多多而黑面仲幫我將件餅一開二用兩個紙袋入俾我真係好好人格仔餅係淋身有d煙韌o個種唔係我鍾意既脆身型加左花生醬,煉奶同砂糖一齊食味道ok但略嫌醬汁少左dd

路過太子,十年人事幾番新,成利行辦館依舊,龍江大飯店已變成卓越纖體,遙望聯合,又突然諗起廿幾年大大百貨,每個周日流連玩具部的日子....水渠道花園街交街的臭豆腐,昔日臭到比人告過幾次,上埋報紙,間接打出個名堂.臭豆腐都話都明係臭,當然越臭越過癮.細細個幫襯街邊檔,十米以外已聞其臭.外表炸得金黃,越臭越正.呢味野,係唔會有中間路線.幾年無光顧,約左人早到,去隔離幹掉$10牛什後,過來整兩舊.企在十字路口,不聞其臭,似乎非好事.每件由$5加到去$6.臭豆腐炸定入袋,擺低錢即比你.拿上手還熱辣辣的.入口,外表仍脆,但一點也不臭,感覺如一個男人有男兒身也不要,走去做人妖.吃罷暗裏控訴:還我真正臭豆腐來!廿年來太子人面全非,連臭豆腐也今非昔比.可惜.

臭豆腐...又係一樣在香港有得食美國無的美食我次次去聯合廣場都會走去呢度買舊臭豆腐食。一年無食，Keep 到水平，依舊香噴噴。之後買左支綠茶"浪"口，去見我朋友的家人之後見朋友屋企人，一開口講野就俾人問係咪食左臭豆腐~~~足以証明呢間D臭豆腐的水準有幾高

6月19日，16:30在深水步完成任務一號-買充電，便到旺角繼續任務二、三號- 買迷你花盆和津味雲吞麵的辣椒油。完成後經過這店，雖然有兩次不快經驗，決定仍給她最後一次機會。幸好水準終於返來了！色：金黃，不會焦黑，外皮通透。香：接到手香氣撲鼻。味：發酵足夠，入口滑而味道濃郁。

5月26日，19:00service team 醞釀兵變，急忙到花墟買硬件來鎮壓。趁機再吃至愛臭豆腐。色：唔夠鬆起和通透，底部焦黑。香：拿上手沒有香氣撲鼻，咬破了香味才湧出。味：幸好細嚼時，感到仍保持那獨特的味道。整體有點失望，可以落"至正榜"。

早幾日去太子搵背囊，見行開倒不如食一食臭豆腐先～唉，點解比之前縮左水同埋有「番炸」之嫌，因為外皮無之前咁鬆脆（雖則熱辣辣），亦都無之前咁好味，失準添！

有時都會食下.講真臭就唔覺得佢臭,不過好脆,而且價錢合理($5,出面多數貴過佢)最鐘意劈兩劈豆辦醬.

尋晚落開太子，途經呢間以「臭」閒名的小食店，見臭豆腐陸續炸起，當然不能錯過，整番件先。唔知係唔係間舖刻意經營，行到附近已經聞到陣炸臭豆腐味，所以唔使慌搵唔到，而的幫襯時又有都幾多人買臭豆腐的。由細到大吃臭豆腐得一個方法，就係將辣醬同甜醬塞落臭豆腐裡，然後一路行一路食，一來可以降低豆腐入面的溫度，二來可以將醬料混在豆腐中而不損表皮的香脆。呢度的臭豆腐都唔錯，外皮好脆，而入面幾軟滑，唔會好油膩，5蚊一件係好抵食，喜歡臭豆腐的實在不容錯過。以前掃街最常吃的食物已經全部入晒舖，只有呢樣還可以保持水準，其他如鹵水生腸/雞什、豬皮蘿蔔牛雜及炸大腸等已經變得全無風味，實在可惜得很。尤其是炸大腸，如果大家知道有邊度有水準的，煩請在「飲食講場」單聲，我一定會去試，最基本要求係同以前的街邊檔般，要成條豬大腸生炸，而客人買時才切開的。

上週六下午,又逛花墟,忍不住又買了含羞草和薄荷葉(跟上次品種不同),買完便到這裡吃臭豆腐,剛炸妤的-辣咀,感覺一流,皮脆,咬破後,濃郁的香味洶湧出來!那熱辣辣豆腐混入了豆板醬,很滋味!吃完一件,走不到一條街便回來吃第二件,題外話:我喜愛種花,但不專業,家中已有二十棵不同種類植物,家人開始投訴!

落開太子睇軍袋，袋就睇唔成，變相走去飲飲食食。有傳哩檔臭豆腐「哂家」，又話超臭好好味，路經我又唔覺好勁鞦喎！走過去試一試先，五蚊一件，眼見嬸嬸一件件預先入好，心諗「唔方好食啦，炸定哂，一定淋哂，真失望！」，點知．．．．一到手，果種濃烈臭味真係．．．正（「喉擒」到我都唔記得影張相添）！加埋辣醬一咬，果真外身香脆，內裡軟淋淋（如佢地門外貼o的報紙所講一樣），仲係熱o架，真係好鬼正，好耐都未食過好味道o既臭豆腐喇，只此一家；或者你地會覺得我有少許「誇」，但真係好難搵到唔係番炸又番炸實舊舊o既臭豆腐，對本人黎講哩度真係「掂」。（獎門人教落：臭臭豆腐邊個食，你唔食，我要食，大啖大啖匿埋食．．．．哈）

下午和太座及小魔怪分手後，依照丈魔怪(女兒)的指示到花墟買薄荷葉樹苗後，便到這裡吃臭豆腐，果然名不虛傳，很夠味和外皮炸得很鬆。但可惜不夠熱，應該是星期日預計生意特別好，所以炸定很多和包定。下次weekday 再去，應有機會試到剛炸好的。

呢間舖仔o既臭豆腐唔單止o係旺角出晒名, 應該可以話係全港出名. 呢o的都係拜傳媒所賜, 間接幫佢地做o左宣傳; 佢地亦都好識利用傳媒, 話自己特別安裝o既抽氣系統, o係炸臭豆腐時唔會擾民咁話. 老實講, 佢o的豆腐o既「香味」o係我未行完條"金魚街" (通菜街) 就已經聞到, 足以證明佢地o的臭豆腐o既「功力」是何等深厚!其實大家都唔洗「臭」色變, 因為呢度o的臭豆腐離遠聞到係好攻鼻, 但拎到手上食o既時候, 反而唔多覺臭味o既存在. 講到食味, 呢度o既臭豆腐係有一定水準, 個外皮夠鬆脆, 裡面軟豆腐o既質感真係好似cottage cheese, 有自然o既豆味同甜味, 而且每次o黎食佢地o的豆腐, 唔係新鮮炸起就係保持得好暖, 從來唔會凍冰冰. 5蚊一件, 好抵食o丫!