米亭 (已結業)

店鋪為於食店林立的福榮街，主打雞湯米線。同一條街上，已有3-4間稍有名氣的米線店，店家要做出成績看來不易。12:00 左右到達，店舖已坐滿食客。兩款不同套餐可以選擇，分別在於用餃子或肉食作為主食。兩款都可以配上其招牌特式湯底。  是次選擇了白菜餃子加上海麵配上特濃雞湯。雞湯味道較弱麵條比較粗身，未能吸收所有雞湯的精華餃子形狀飽滿，菜肉比例平均，皮不厚，看似是自家製作比起主食，隨餐送的兩款涼菜，卻意外地令人驚喜麻醬蓮藕及菜脯相當惹味，蓮藕爽口，菜脯亦沒有死咸，令人一口接一口按社交平台 分享餐廳可以免費獲得是日小食一款是日免費小食是金絲蜜椒雞翼雞翼剛剛炸起，配上蜜糖，甜味及香脆同時在口腔爆發如作下酒菜，實在一流

米亭，don’t stop，個名又幾特別，我諗餐廳希望我地對佢地既食物食唔停口，牆上既poster都幾勵志，好似有咪停去追求理想生活咪停去追求突破咪停食喜愛的東西簡直係我既左右銘我既咪停美食終於到啦，右上黃色既係雞湯味，而左下淡白色既係豆乳豚骨湯濃郁既雞湯浮游著十隻韮菜餃餃開俾大家睇下先，入面有好多韮菜包住d肉，餃子皮仲可以包埋d雞湯一齊食，正西洋菜餃真係比較少有，值得一讚係餃子皮好滑，係少數餃子鋪可以做到咁滑，真係會食唔停口另外仲叫左個套餐，有前菜、小食、飲品，都只係$48，真心抵食

深水埗福榮街近來很多新餐廳開張逆市開張，這間米亭設計風格很獨特，顏色鮮明，門面招牌很吸引到眼球，進入餐廳前很多顧客已經填好菜單，所以晚市時段都不需要等候太久餐廳選擇非常多，有餃子 麵食 主菜 炸物 小食，另外套餐還包特色飲品，組合配搭非常多，我們選擇了很久才有心水。 套餐是整盤上菜的，看起來挺工整，餃子和湯底應該是剛煮好的 熱辣辣，不留神的話很易燙傷，豆乳豚骨湯底比較像中湯，可惜今晚雞湯賣光了，無法比較一下，選了上海麵後只有5隻餃子，有點美中不足。幸好套餐的小食很討人喜歡，青瓜木耳鮮甜爽口，適合主食前開胃。而我最愛的是另外點的秘製醬脆手撕雞，醬汁不會過咸搶味，雞肉上面除了有青瓜絲外，還有蓮藕片和粒粒脆炸，加起來口感非常特別，香脆爽滑，與外面吃到的手撕雞完全不同，非常建議試試這款小食。最後結帳每人大約$70-80，價格算是深水埗區中上的餐廳。

同老公去深水埗買嘢，之後例牌去食油渣麵，經過街頭見到有間新開的米亭，主打餃子，見到餐廳門口餐牌套餐都好抵食，喜歡試新野的我們，立刻入座試試。全日套餐有6樣選擇，用環保餐牌寫好就交比員工就可以。米亭炸豬扒，大大塊豬扒即叫即炸，香脆可口，肉質鮮嫩，點沙律醬食更好味。特濃雞湯用大量雞和雞腳熬製16小時而成，骨膠原豐富，鮮甜美味，湯底揀咗BB辣，上海麵掛湯後又滑又香甜。帶少少辣度更惹味。小食涼伴雲耳爽口帶酸辣味。飲品升級加8元飲雪碧。另外追加小食：金絲雞翼，即炸上枱熱辣辣，皮脆肉嫩又有汁，加咗甜甜的蜜汁好好味！溏心蛋又香又滑。餃子套餐：芫茜黑豚肉餃，用上新鮮本地黑豚肉做餡料，粉嫩的黑豚肉程一粒粒狀態，口感紮實母豬羶味。配不同新鮮蔬菜都好好食。豆乳豚骨湯，用大量雞腳、豬骨、豬肉、無糖豆乳熬製16小時而成，比雞湯更稠濃，味道帶胡椒香和豆乳香，鮮味十足，涼伴雲耳爽口，豆漿冰凍

認真小編食過大大小小唔同嘅所謂花膠雞湯，其實近呢年香港都好多自稱濃厚花膠雞湯店，其實冇一間小編真係食過好印象深刻或者係食完之後覺得一定要再encore嘅，但係呢間位於深水埗嘅米廳，今日小編就係由中環特登走去呢度買外賣，雖然返到Office已經係冇咁熱但係個質素仍然係超曬班，超班嘅原因其實有四點如下：1）個雞湯係非常之濃厚同埋唔油膩，你係唔需要做任何嘅調味，小編就咁第一啖飲嗰個湯呢已經係覺得非常之夠味，絕唔係味精，好足料飲得出有層次嘅雞湯，因為小編媽咪都係一個非常之叻煮花膠雞湯嘅人，咁我成日都覺得只有屋企煮嘅雞湯先至係真材實料。但係食過今日呢個米亭嘅雞湯之後我就覺得佢可以媲美到我媽咪嘅水準2）個花膠絕對唔係平時喺出面食嗰啲唔知乜鬼嘢花膠係食得出真係花膠嚟嘅因為佢真係有骨膠原，你係食到㗎佢亦都唔係百瀨晒㗎、佢真係正常花膠顏色，有少少淡黃色嘅花膠，而唔係出面d鋪頭唔知比d乜膠你類似鱈魚膠既物體咁。3）另外佢嘅溏心蛋大家都千萬唔可以錯過，其實溏心蛋係好容易食到就算唔係拉麵店、其他賣花膠雞湯或者一啲麵舖or小食店嘅地方都會有，但佢地個溏心蛋係真係溏心蛋黎 佢係流心架！大家睇到個圖片就知道我冇講大

一開門企喺門口，諗住等員工安排入座。等咗30秒冇人理會，但係明顯見到兩位員工望到我。咁唔緊要我就開聲，講咗句唔好意思，兩位員工繼續無視，都幾肯定佢係睇到，然後特登唔理。其實如果打開門做生意，希望員工質素會正常啲。如果係唔歡迎客人嘅話，不如唔好開門。 我唔係要求啲咩熱烈歡迎，只係想可以企咁耐會安排一下入座。試諗吓你去食嘢俾人當透明人係咩感受，少少禮貌都冇唔知係點樣培訓員工。真係失望至極。希望會有改善。

今日去深水埗買hard disk, 上網搵食，見到新開嘅小店米亭評價不錯，便決定支持下小店。店內有幅好大嘅漫畫油畫。套餐有兩款，餃子套餐$58up,其他$48up我們點了兩個set, 因為都不太餓，所以沒有點麵食，淨餃子。韭菜豬肉餃子，麻醬蓮藕，惹味蝦醬，菜甫，咸甜味都適中，湯底加八蚊嘅豆乳湯，餃子🥟皮薄，脹卜卜，韭菜味都好正想要濃味點嘅湯底就推介酸辣湯(加八蚊)，bb辣都幾辣，酸味變得不太岀，鐘意食辣嘅話會覺得過癮。芫荽豚肉餃，芫荽控必選，咬下入口juicy，滿口芫荽香，配酸辣又確實好醒胃。飲品點了柑桔酸梅湯同杞子六花茶，冰凍又大枝，酸梅湯開胃，六花茶清熱下火，味道都唔錯。

經報導轉載，知道深水埗有一間米線出哂名個湯底濃。今日轉登入去食。我入到去間食肆，見到個壁畫好似林長棍畫風。我點咗黑毛豬豬扒、上海麵、濃湯底、蝦醬、雲耳、菜甫、凍豆漿。等咗12分鐘先有得食。黑毛豬豬扒賣相滿分。豬扒上面加咗層香料。但肉質太乾身，我放入湯麵泡。入口有歐陸風味。麵質好彈牙。上海麵較粗。個湯好濃好甜。個湯值滿分。建議將蝦醬、雲耳、菜甫加入湯底。湯底會帶點微辣咁就更美味。加埋杯凍豆漿咁就係人間美食。

朋友係深水埗返工，今晚接佢放工順便附近食晚飯，放工時間條街都好迫，見到米亭似係新開同都整潔，就決定食呢間。我地兩個人都叫左餃子套餐，朋友叫左白菜黑豚肉餃米線配特濃雞湯，我試左一啖覺得雞湯好濃郁，好似飲緊老火湯甘，唔錯唔錯。而我就叫左莞荽黑豚肉餃湯米線配秘製酸湯，餃子咬開滿滿莞茜，調味剛好，鐘意食莞茜既朋友仔可以試下，而秘製酸湯有點偏酸，叫左BB辣但食落好似小辣，米線係我鐘意食既幼米線，吸湯能力一流。配菜麻醬蓮藕、涼拌雲耳都唔錯，另外仲有君味蝦醬、米亭菜甫可以調味。最後小食叫左米亭麻辣手撕雞，夠麻夠辣，非常惹味，整體味道比想像中要好，環境乾淨企理，性價比高，大家可以支持下呢間小店。

今日收工同同事睇下有乜嘢食, 見到米亭個餐牌有好多選擇, 所以入去試下新嘢.坐低見隔離枱嗰塊豬扒成寸厚, 跟住我又嗌咗一個自選上海麵餃子套餐再加24蚊要再一個燒豬扒.上菜時都對版喎, 先講豚肉豬骨湯真係好濃但係好甜, 但唔知點解咁落去咗少少藥材味.套餐係有五隻西洋菜豬肉餃子再加一個麵, 前菜加主食,和一支豆漿.略嫌佢個主食比較少嘢, 分量較適合女士, 醬汁燒豬扒上枱時, 聞到一陣好香的bbq燒烤味, 豬扒邊燒到焦香豬扒有咬口, 肥瘦適中.最後性價比就唔係太值, 因為唔夠我食.

係深水埗既福榮街近呢幾年開左唔少食肆，令人諗起如果要搵好野食就一定會黎呢條街，今次就試左呢間餃子店～午餐方面有兩款，$58蚊呢款可以揀6隻餃子或者5隻餃子加麵，感覺上揀少一隻餃子就有返個麵食下就抵食啲，但佢如果要揀多啲唔同既餃子口味就要加錢，如果樣樣都加啲應該都要$70先走得，感覺就有啲貴喇～韮菜黑豚肉餃配上海麵（$58），餃子既size唔算大隻，而內餡韮菜同豬肉既比例都算正常，但份量的確唔多，如果揀哂6隻餃子我諗就未必夠飽😅值得一讚既係佢個豆乳豚骨湯，味道真係似自己煲而唔係開粉，味道比較清甜亦唔會太濃，配合餃子食的確係唔錯，而雲耳味道都正常，不過不失咁啦～總結呢間餃子店味道算唔錯，但以呢個價錢嚟講個份量的確有啲少，會比較期望可以將啲餃子包得大隻啲咁樣個滿足度就好好多啦～

今日要出深水埗買露營用品，記得有一次經過呢間米亭已經好想試，難得座位舒適亦有唔同款式的餃子可以選擇。豆乳豚骨涉湯米線，湯底有啖啖的豆乳味，清香鮮甜，米線份量好多又有咬口。餃子方面我揀咗紅咖哩芝士豚肉餃，芝士味十分突出，而紅咖哩的底味就有泰式的感覺，食到檸檬葉的味道，好特別的味道，唔錯唔錯。而小食我就揀咗醬脆手撕雞，份量又係好多，其實係麻醬手撕雞上面再加咸黃蛋脆餅，卜卜脆的口感再加上無敵的麻醬，唔會出錯的組合，好味!仲有不同的涼菜和醬菜，涼拌雲耳好開胃，蝦醬好惹味，菜甫爽脆，再加埋豆漿，好香豆味而且又滑，成個套餐好completed。男朋友揀嘅就係香辣湯底，辣味夠湯頭香；而餃子就叫咗炸韮菜黑豚肉餃。炸的餃子又係另一種感覺，即叫即炸非常香脆，而且餡料爆汁，好香的韮菜味。小食就試咗秘製脆汁豬扒，可能係即製的關係最後先上枱，只要好食嘅真係等下都無所謂，肉厚香濃，再加上面頭的脆片，味道口感都十分討好，滿意!

餃子，麵食總是百吃不厭。 今天又在深水埗福榮街（玩具街）買砌圖，模型。 行到攰搵到這間『米亭』 吃餃子， 餐廳內籠裝修幾新淨，似係新開。有單點，亦有全日套餐。 睇相全日套餐都已非常吸引，有飲品，小食，前菜，配菜，餃子和麵食， 超豐富而且只售$48～👍😋 慳咗時間諗點嗌仲要咁抵！選了這個芫茜豬肉餃， 豬肉和芫茜比例啱啱好！ 餃子肉餡唔係塞到滿， 還有空間也充滿湯汁，豬肉鮮甜冇過份嘅調味， 也吃到芫茜嘅香氣， 感覺很有家的味道。豬骨湯底也夠清甜， 味道純淨好似自己屋企煲一樣，無添加味精，喝光了也不感到囗渴。小食： 金絲蜜椒雞翼推介之選，外皮炸得香口， 沽上微甜嘅蜜椒醬汁而裏面仲好juicy， 有驚喜！小食：涼拌木耳木耳厚身，夠爽， 少少酸醋味好醒胃～👍小食：溏心蛋🥚🥚好入味， 流心蛋黃好香滑 ， 帶有醬油和酒香。😊小食： 麻酱蓮藕片沾上薄薄嘅麻醬，蓮藕片十分爽脆，口感味道非常正！醬菜也可選兩款， 也真是夠周到。辣菜脯又爽又脆又辛辣， 加入上海湯麵味道大大提升。👍 惹味蝦醬也確實惹味， 蝦米炒得好香，少少辣， 加添一點令人胃口大增！！另一款白菜豬肉餃 選取了雞湯底。 這款雞湯湯底也令人飲上癮

好耐無去過深水埗搵食，一向喜歡食餃既我，見到有間未食過的餃子店，就去TRY TRY其實第一眼吸引到我的唔係餃子，係店內的一幅手劃既壁畫，既有本地色彩，又有日式漫畫風！非常吸精！用嚟打卡一流手繪壁畫的另一邊就放左餐廳既招牌菜，感覺好似展覽廳展覽咁，咁樣介紹食物，又真係幾別樹一格！餐廳定價很親民，一個套餐有小食，主食，涼菜，飲品都係幾十蚊，而且點餐用格仔紙選擇，一目了然，非常易睇！由餃子到湯既配合有好多不同既選擇，有辣有唔辣，有雞湯，豬骨湯揀！落單之後，辣味撲鼻而來的招牌小食麻辣手撕雞，好快就送到嚟，呢碟涼菜幾惹味，雞肉嫩滑得嚟又帶點辣，配上脆口的花生粒，添加了不少口感！套餐擺放得很整齊地送到檯上，賣相非常吸引，雞湯的香味令人胃口大開，加上爽口又開胃的木耳，我都忍不住馬上起筷！除了清甜的雞湯味道不錯外，配上皮滑肉甜的西洋菜餃子，呢個組合真係無得輸！可能適逢西洋菜當造味道不但唔苦，還帶點甜味又有點爽口同行既朋友就叫左個重口味既韮菜黑豚肉餃子，韮菜味濃郁，而且秘製酸湯令人印象難忘！另外脆口的麻醬蓮藕片，也是非常推介！2人埋單先係百幾蚊，非常抵食！

喜歡吃餃子的我們，今天就來到深水埗這間「米亭」吃午餐。一個套餐的內容十分豐富，要選擇吃什麼，就要有六大步驟。我們一行二人叫了兩個套餐，我們選擇白菜黑豚肉餃配米線，特濃雞湯，金絲蜜椒雞翼，涼拌青瓜配米亭菜甫。雞湯十分濃郁，餃子大大粒，十分足料。雞翼配上蜜糖甜甜的，很好味道，而且炸得很香口，很正。涼拌青瓜酸度很足，很好味。另外一個叫了米亭和牛餃配上海麵，湯底選了秘製辣湯bb辣，小食叫了秘製脆汁豬扒，涼菜選擇醬油醃漬牛蒡，醬菜選了米亭菜甫。餃子牛肉味很香，咬下去湯汁很多，而且也很大粒，份量十分足夠，配搭上秘製辣湯，酸酸辣辣的，很開胃。豬扒是即叫即炸的，配上脆脆片，配搭很新鮮，而且豬扒也很鬆軟。令人感到驚喜的，就是飲品是原樽上，我們叫了杞子六花茶和柑桔酸梅湯，六花茶不會太甜，有點甘但也不會苦，可以清熱氣。酸梅湯酸酸的，可以去油膩。