眾志堂

营业中

休息中

最近發現原來眾志上一層都有飯食。今日又入來中大做嘢，所以去試試。去買飯，個阿姐全程用普通話。妖！哩度係香港囉！食物質素比樓下好一點，價錢亦貴啲。但深圳式服務真係離譜！

星期六夜晚諗住簡單食，落左眾志堂食個快，睇睇廚師推介，有咸蛋肉餅飯$39，由於想食健康d,當晚得返唔多選擇，4寶飯同肉餅之間，揀左肉餅飯。一去到拎飯，個蒸飯用膠碗裝，已經心知不妙。 埋到位放入口，個肉餅應該係超市冷藏冰格果種，一放入口，個肉餅係濕既，唔係juicy果種，貼住肉餅既飯都係濕到溶既, 但膠碗底既飯係乾到變飯焦，一碗飯有多個層次真係唔簡單。咁既情況，個肉餅冇豬味冇咬口已經唔出奇，成個飯得舊咸蛋比較似樣。 飯堂既肉餅飯絕冇下次，下次都係食返此飯堂最正既燒味飯，完。

入到嚟幾闊落，有不同食物嘅選擇，差唔多九點幾嘅時候，可以嗌宵夜選擇。有豬肉丸粥，可以再加腸粉，加上有甜醬辣椒醬，令到腸粉口味更加豐富。可以再嗌埋燒賣魚蛋，豉油王炒麵，這些港式食物。

眾志堂為學生教職員提供早午晚宵夜一日四餐。我比較喜歡港式早餐，只需$28，有蛋、配料如午餐肉的湯粉，還有多士和熱飲，一定夠飽。午餐有燒味飯、廚師推介如魯肉飯和漢堡包餐，價格由$30至$40不等。宵夜則有中式點心供應。而一樓的眾Cafe，午餐時間提供和風美食，有壽喜燒定食、湯拉麵/稻庭烏冬、日丼定食和咖喱丼定食，價錢會較地下的食品高。今次選擇了照燒雞扒湯稻庭烏冬$49。湯底有兩種選擇：黑蒜醬油和豬骨湯。我選擇了豬骨湯，有一片日式魚卷、一條蟹柳、海帶和粟米粒，稻庭烏冬採用冰烏冬，比普通烏冬彈牙，而且份量不少照燒雞扒則中規中矩，有芝麻在雞皮上，雞皮有點脆，雞肉也有醃味，肉質不會很硬，以學生飯堂來說，質素還好

嚟咗CU幾日,好似仲未去試過眾志堂1樓嘅”眾Cafe”,於是趁今日喺附近上堂就去試吓食啦😃👍🏻去到嗰陣大概係1330,發現真係好好好多人🥲但既然一場嚟到,就唔理咁多,食咗先!因為排隊係用點餐機,用電子支付俾錢，所以成個流程都好順暢😆之後亦都係等咗冇耐就即刻有，好佩服啲姐姐啊🤩🤩我就點咗一個$49嘅”照燒雞扒丼定食”(其實當時點餐我係撳咗”少飯”,可能姐姐/師傅眼大睇過龍,俾我嘅都係正常份量嘅飯🥲)成個飯係不過不失的～價錢喺CC can嚟計應該都算正常😀下次會去再食😁

先講下環境啦眾志堂一樓裝修算寬敞冇地下嗰層咁學生餐廳嘅感覺雖然唔係裝修非常靚但都算係乾淨舒服座位唔算太擠 同埋有啲四人檯算係坐得舒適一樓餐廳嘅壽喜燒真係唔錯份量同肉質都幾好不過湯底偏甜啲如果你鍾意鹹啲嘅味道，就未必啱啦另外 餐廳有提供到醬汁點牛肉增加到啲食物嘅層次感·食物賣相都幾好擺盤整齊 望落幾好有食慾不過 如果你講究啲可能會發現擺盤略顯簡單 同行朋友有幾份都見到啲蔬菜都洗得不算太乾淨但以呢個價錢同間餐廳以往質素黎講都算係抵食啦～

星期五，早上要入中大做啲嘢，順手吃埋午飯才走。諗住平平地，又唔駛出去同人迫。都知道cc can 頺飯早已成為絕響，但都應該平過出面嘅。這一餐，三餸米線$46，飲品加$2，油菜加$10，盛惠$58。飲品叫了菜蜜，淡某某。米線浸到腍晒一夾就散，完全無米線要有的爽滑口感。三餸叫了腩肉、墨丸，還好的。但片頭就無乜味兼唔結實。同樣價錢，去譚仔一定好好多。中袱了！

一星期需要上2-3節Master課，食得最多就係呢間有未圓湖的眾志堂，除了景靚，但食物都是冷冷的，似是擺了一段時間。要我評價，漢堡包、薯條最安全，而粉麵味淡，飯類偏冷。

今日嚟到香港中文大學嘅cc can食下午茶～～下午茶三四點嘅時間其實都唔算太多人～呢度嘅下午茶選擇都幾多，有最出名嘅頹飯🤣炸物🤣粉麵等等而我就叫咗吉列豬扒配薯條$26😃😃大學嚟講都算幾抵食🍥🍥呢度嘅員工姐姐都幾好人，幾有人情味🤩🤩同埋都係即叫即炸嘅所以都等咗大概10分鐘左右🤪🤪而呢個餐呢都包括左一杯熱阿華田😆😆都係即沖㗎喇🙌🏼食落個豬扒都香脆～下次嚟都會再試吓其他嘅下午茶餐

今日專登去香港大學睇紅葉，打打卡，影靚相， 影到肚餓就去附近一間茶餐廳醫肚，嘆個下午茶，呢間位於中文大學水池旁邊既餐廳，食物唔貴之餘，如果坐喺餐廳外邊嘅露台位置，風景真係一流。美式芝士牛肉漢堡包 + 凍檸水漢堡包大大件，仲配埋薯條，好抵食，香濃芝士加上牛肉漢堡嫩滑多汁，一啖咬落去，牛肉汁爆晒醬，口感一絕。西多士拼薯條 + 凍檸茶西多士塗上厚厚的牛油及香甜的糖漿，既邪惡又美味，令人流曬口水，多士夠厚又煙韌，讚。

中大食堂平就出曬名，不過都有例外，就係眾志堂。作為山腳餐廳，眾志堂食物既價錢普遍黎講都比上山餐廳貴兩到三蚊。不過眾志堂又有樣好，就係佢出餐的效率奇高，今日六點dinner time 去食飯，由點餐到出餐都只不過用左三分鐘，而且地方大，座位多，可以俾人從容地食完個快飯去上六半堂。今次點左個38蚊的豬軟骨拉麵，加兩蚊多杯熱飲。眾志堂比較便宜的選擇之一。食落冇得彈既就係佢既性價比，鳴門卷切得算厚，豬軟骨又有兩大塊，真係小確幸。不過略嫌不足的就是拉麵非常之冧，如過硬翻d就好了。

CC Can Lunch hour 超多人，我就坐左出戶外，對住湖境食飯。是日午餐燒煵配紅腸、咸蛋🥚燒味飯、凍檸水，燒煵皮夠脆，食落去索索聲，五塊紅腸都有一定厚度，味道😋😋，一洗中大只有伏飯頹飯。

今日挑起條癮，諗住返中大行吓懷念一下行咗一陣就肚餓，就跑入CC can食個下午茶朋友肚餓所以食過叉燒燒肉飯，冇黎一排，啲燒味好食咗，叉燒有肉汁，唔會太乾，燒肉個皮仲脆，鹹味啱啱好，比得上一般燒味店不過，我食的漢堡薯條就出事，麵包生菜芝士都正常，但係塊漢堡扒就出事，簡直係乾過牛肉乾，非常奇怪，一啲肉汁都冇，剩係得個乾字至於薯條，又凍又乾，唔知搞咩，見到隔離枱都係食過呢個餐，嗰個人同我有眼神接觸，好似明白大家都中伏嘅感覺

買咗中大cc can做早餐同午餐 🌦▪️燒味河粉（叉燒 燒鴨）👍🏻夠曬平 如果係崇基書院學生出示學生證仲有折添啊！雖然平但個味道都唔差，湯底都唔淡㗎，份量多，燒鴨舊舊都好多肉，肥瘦肉都有。👎🏻燒鴨好食過叉燒，叉燒基本上都係瘦肉，同埋比較乾～▪️沙嗲牛肉腸仔米粉👍🏻分量夠食😆沙嗲牛肉重沙嗲味，其他就正正常常，勝在十分抵食😆

一場嚟到香港中文大學, 緊要試試佢嘅飯堂出品啦,我點左肥牛小鍋米線, 一拎到返埋位, 即刻讚嘆牛肉量多得驚人, 成碗都係牛肉, 而且啲牛肉一啲都唔差, 應該都係用上等嘅牛肉嘅,配料方面有蔥花、咸菜、花生,而湯底充斥八角、牛肉香味,對一班大學生嚟講都算係一個唔錯嘅選擇。價錢方面亦相當大眾化, 30多元就可以食多,呢個價位巿面上真係好難食到。順帶一提,加配熱飲係唔需要額外收費, 就算係加凍飲都只係加三蚊咋, 實在抵到爛😄