燒肉LIKE (德福廣場1期)

营业中

休息中

果日經過德福商場見到有食店大排長龍,  原來系燒肉Like岩岩開左分店.燒肉Like黎自東京,賣點系一人一爐燒肉, 已經進駐台灣、新加坡等, 2021 年終於黎到香港, 第一間香港分店向沙田新城市廣場.宜家德福開左分店, 當然搵機會試下今日黎食午餐, 睇到餐單, 燒肉套餐最平$48就有, 有牛、豬、雞，同埋日本和牛、牛舌、橫膈膜、豬腩肉, 仲有壽喜燒，坐底後用QR 落單, 可以叫自己想要既部位同份量，由50g至300g都有, 套餐仲有湯同飯, 飯都有得揀, 有100g/200g/300g,  想要咩就慢慢揀😎我叫牛小排同牛板腱, 肉質好唔鞋有牛味, 加埋日本米 , 平時唔系食好多飯既我都食晒200g 飯🍚, 仲有幾款醬汁揀, 覺得幾好味同埋坐得幾舒服又無限時🏆想食可以Gulu  app 早D 攞定非, 希望下次再黎水準可以保持🎉

星期六下午三點幾，見門口冇乜人就排隊試下，等十分鐘已可以入座。地方都幾整潔，坐位傍有個籃比客人放手袋什物都幾細心。叫咗“小牛排＋牛板鍵 200g” 兩份套餐@＄128，之後再加 120g 和牛扒 ＄150。所有肉都已預先醃製醃料，味係比較重，但啱我口味，牛肉質素一般，和牛扒就麻麻比較韌，應該叫多一個套餐比較抵食，白飯分大中細三個份量可以選擇，我揀咗大碗，口感唔錯，溝啲枱面供應調味料，可以好快食晒一碗。一人一爐都幾好玩，油煙吸落底層所以冇油煙味，呢方面令我最欣賞。唔食牛嘅話，可以選擇雞肉或者豬腩肉片，價錢亦比較經濟。掃描 QR code 自己落單，埋單只收電子貨幣不收現金相信係大趨勢。提提大家，店內沒有免費茶水供應。

肉質好，加餐嘅日本米亦好唔錯！而且好多款醬汁可以揀，款款都好好味！肯定encore! 重點係：抵食！冇限時，坐得亦幾舒服。另一最好：通風做得好！食完離開餐廳，頭髮同啲衫完全冇燒烤味！員工好Nice，有兩樣嘢佢哋都表現到好細心。佢哋有啲放袋嘅架放喺椅邊，我哋見到入面污糟，職員即刻好醒目同我哋換咗個新嘅。出去俾錢嘅時候，收銀哥哥唔小心將張單撕爛咗一個邊位，佢不停講唔好意思，其實好少事，但感覺到員工嘅熱誠，全部都好有禮貌！唯一一定我要講嘅，就係佢哋個湯超級油，可能放得太多麻油落去，其他嘢都超好！

見到呢間新開嘅日本燒肉店，平日兩點都要等十幾張台，好彩都好快等到。最平 $48 就有 100g 牛五花套餐，豐儉由人，掃描 QR code 落單，夠曬方便。我就叫咗 $78 200g 牛五花套餐。每人面前一個細燒爐。套餐有海帶湯，飯可以揀分量，我呢碗係 300g，另外可以揀沙律或者泡菜。牛肉好肥美，啱曬燒肉用！估唔到無煙燒肉都咁好火！！可能因為啲牛肉油脂好高，滴落個爐度所以咁大火，嚇咗一跳哈哈 大家燒嘅時候要小心啲呀。有好多款醬汁選擇，我覺得最正係蒜蓉醬油同辣味增。新鮮又多汁嘅牛肉，夾埋日本米煮嘅飯一齊食，超滿足！ 沙律都好新鮮~覺得呢度好抵食，牛肉又靚，經過會想再黎！唯一可以挑剔嘅係張凳坐得唔係幾舒服。

星期六一起身見時間仲早，先十一點到諗起呢間嘢試業開12點，就立即準備出發去食個當早午餐….其實去到都只係11點50分左右點知門口已經企滿人所以佢11點55分到都已經開始俾人入去佢係需要手機喐QR code下單，同埋單都係自己出門口一定要用電子形式付款的所以如果唔熟電子，唔熟手機運作嘅人，特別老人家，可能就未必嚟食得咁容易😅整體上，員工服務都好好而且可能新開，地方，餐具🍴等都仲幾乾淨每個客走，都有員工拎籃工具去清潔消毒….而每個位都齊備濕紙巾提供….唯一係叫得燒肉，其實佢迭擇唔多而且樣樣肉，就算和牛都好重調味醬料 預先醃得太咸太燶味根本都不太用得上枱上嘅調味料食完都好想飲水 幾唔健康食咁咸😅但一人一爐形式燒烤，係幾好玩嘅而且佢標榜自己用日本米佢碗飯可以有3個 大、中、小 份量揀呢個service我覺得幾好，等細食嘅人不用浪費！同埋，碗飯都真係幾好食