影片
4290 浏览
嘻嘻，又有uncle请小肥试新地方，真系口福不浅。今次决战新潮潮州菜馆，双潮之「潮厅」！唔知uncle系咪VIP呢，定系潮厅服务本身就系咁好？我地当晚个饭局长时间都有两三位姐姐仔或哥哥仔斟酒，加水，分𩠌，换碟。经理哥哥Remy亦不时巡视打点，所以XO仔不忘把握机会向佢了解一下潮厅o既运作。据Remy哥哥所讲，潮厅个老板好注重私人空间，所以设计潮厅o既间隔时，讲明唔要有大厅，全部要做房，而且不设最低消费。唔计间K房，潮厅只系有四间房招呼客人，每间大小不同，最细𠮶间都可以招待四个人。我地当晚𠮶间系最豪华最大间o既，既有私人洗手间，亦有酒吧，更可同K房打通。间房好够光猛，企理，舒适，不过坐耐左就觉得个冷气唔系好够，就算开到尽，连平时怕涷o既姨妈同姨丈都要宽衣，小肥同大肥就当然系不停滴汗啦。席上共十六人，坐得都好松动，似乎坐多四五个都冇问题。房中最特别o既就系个自动转盘，如果开左，就会一个速度慢慢转，冇得加速或减速，只可以停，所以转紧时夹𩠌，真系手快有，手慢就要等佢转。好彩大部份食物都系姐姐仔帮我地分埋，所以个转盘郁唔郁都冇乜所谓。 潮式大红蟹：XO仔由细到大都对蟹敏感，所以冇份食。不过，依味𩠌就成功地取悦大肥爸爸啦，仲话同中华总商会𠮶个有得fight，叫我一定要喺openrice度表扬！佢解释，个蟹唔难煮，最重要系货源好，因为Ｄ蟹靓，蟹肉就自然会如此鲜甜肥美。爸爸特别欣赏个蟹容易食，佢完全唔需要用到蟹钳。烹饪有两手o既妈妈话：只要将煮熟左o既蟹放入冰水浸一阵，啲蟹肉就唔会黐住个壳，食起上黎就唔洗咁多功夫啦。 卤水鹅肝拼盆：去到潮州菜馆当然系要食返啲传统潮州菜，试下佢啲Chinese Kungfu啦！XO仔对依个拼盆基本上好满意，尤其系个卤水鹅肝，真系觉得中国厨艺绝不比法式料理逊色！潮厅o既卤水鹅肝肥厚得黎唔硬兼唔粉，口感非常实在，而且食完唔觉好溜，不过就好难同法式香煎鹅肝o既脆皮软心比较，因煮法不同，只可以话系各有千秋。长辈们怕胆固醇，所以都要就住黎食，不过佢地大多喜爱拣食卤水猪脚仔同猪耳，因两者都好香脆入味。XO唯一对个拼盆o既鹅肠有微言，因为鹅肠比人去哂肥，食落去几爽口都已经唔系𠮶回事。 潮州红烧大鱼翅：鱼翅每碗份量都好足，真系好有睇头，绝对唔失礼！个汤底亦好够味，似乎用足料黎肴，只系个人觉得偏咸，不过，好彩加左两滴醋中和返，味道变得更香浓。 黄金虾蟹枣：首先要赞个𩠌够热，因为就算姐姐仔帮我地分埋先上，入口时𠮶两粒虾蟹枣仲好热辣辣！虾蟹枣都炸得又香又爽口，食得出佢加左幼细o既马蹄粒黎做出依个效果；伴碟o既炸米饼网都几得意，只系可能用油多左，所以唔够脆。另外，每人只碟上都已分有甜酱，卫生得黎客人又唔洗排队等转盘点汁，真系好周到。 盐烧海「鱼立」鱼：拣饮择食o既XO仔唔系好食中式烹调o既鱼，因为怕骨，好多时都唔食鱼，或者只系食鱼皮。咬左一口，觉得依味盐烧「鱼立」鱼个鱼皮非常香脆入味，明知大肥劲钟意食，小肥就好孝顺地比哂爸爸！ 芝麻炆鱼鳔：细老见识少，从未听过「鱼鳔」系乜。XO一向求知欲强，又唔怕羞，所以就问左姐姐仔两句，佢就话我知「鱼鳔」等同鱼肚，即做花胶之材料。第一次食鱼鳔，口感好似点心「棉花鸡」入面o既「棉花」咁，爽口得黎又好软棉棉。潮厅用芝麻黎炆唔知系咪想玩fusion呢？个人觉得个味道似花生酱多过芝麻酱，有少少怪怪地咁，所以建议师傅用返个传统茨汁效果可能会更受欢迎。 咸香走地鸡：可能小肥食得太多鹅肝啦，食到依味已经食唔落要中场休息。虽然冇食到，不过见到鸡骨间带鲜红色就知只鸡系新鲜，而非冰鲜o既。 糖醋干烧伊面：每人一份小圆饼形o既两面黄，简单精巧，烧得亦好香热脆口。每人一碟私人糖醋，食得干净卫生，份量又刚刚好，好恰当o既单尾。 翻沙金银条：因为XO仔约左女仔食完晚饭去跳舞，所以唔可以食得太饱，只好选择唔食依味较油o既甜品。睇相（分开上载）都睇得出个翻沙金银条做得好够干身，而且姨妈亦觉得个味道唔会太甜，应该几唔错。 法式甜品荟萃：依味甜品系师傅为晚宴特制o既。睇相未别睇得到，不过个甜品系杯中有杯，甜品中有更多甜品。问一问姐姐仔先知原来底杯中黄色幼粒只系装饰，唔食得o既。而面杯入面除左有相中可见o既士多啤梨，黑梅，蓝梅同栗子之外，其实仲有云呢嗱雪糕，朱古力慕丝同一粒糖喺中间，无论味道或口感都好有层次，可以自选成越食越甜，即由外食至内，又或者系甜淡中和，好啱小肥口味！Remy哥哥解释，人少时，𩠌菜可以例牌咁叫，不过人多时，佢就会提议帮客人度身订做一个套餐，价钱就用人头计。当晚个菜单有翅，大概每位一千蚊左右，酒水加一另计。私人房黎计，有翅，有蟹，又有水准，一千蚊位其实都可以算系合理。小肥有人请，个心当然仲觉得抵啲啦！后记：1)据说，潮厅并非酒店内之餐厅。小弟上过Cosmo酒店网页查证过，真系冇被列入在酒店餐厅内。2)潮厅个开瓶费好特别，因为佢唔系续枝计，而系每个人头计，每位一百。3)K房包房费为HK$5,000，当晚小肥都试过，唱左一首歌。可能人少，𠮶度个冷气又OK wor，而且可以用pad pad点歌，尚算先进，只不过音响就有待改善啦！
继续阅读