海港酒家

营业中

休息中

夜晚同屋企人去食飯8個人加個bb、叫左芝士焗龍蝦加伊面底、樓面重同你講加伊面要加48蚊、落完單屋企人重話成500蚊隻龍蝦、靈魂係個伊面度、好啦、龍躉兩食、一碟有（聲）味、另一碟唔新鮮、好（鞋）、雞又鹹到乜咁、由佢、龍蝦黎到冇伊面、搵反個落單既問、佢可以同你講冇落度、要唔要加反俾你、另上人碟伊面俾你、燥唔燥？睇反張單係加左48蚊、去櫃臺問啦、一個收銀、另一個應該資深d、竟然同你芝士係加48蚊、燥唔燥？拎住餐牌同佢講、上面寫住可選上湯或芝士、伊面要另加48蚊、又嘈完一輪、回應係、餐牌上有好多個龍蝦、可能有出入、問你燥唔燥、已經冇伊面食、重要攪咁多野、算、我同自己講唔好嬲、龍蝦要趁熱食、因為已經改變唔到d乜、點知重未完、埋完單覺得唔對路、問佢拎張單睇、計一計、原來張單唔知點解加左其他重複左既野、攪完一輪退反500幾蚊、我唸以後唔會再去

同屋企人食飯都係酒家多，呢間蒸氣火鍋好抵食，七百幾蚊四個人食都飽，有鮑魚，班，蝦，扇貝，蔬菜，肉丸，半隻雞，全部都好味好新鮮，係個扇貝差啲，之後個粥底真係好甜，有下次

同舊同事聚餐，由於大家放工時間唔同，就揀左去海港酒家傾下計，打下牌（最後變左用麻雀衾棉胎），玩到9點先開枱食飯～有個小插曲係有小小強係天花跌落枱，好彩個時仲未上菜...第一道，佢個乳豬脆係脆，但唔算好好食🤔 同埋有少少凍左...佢個龍蝦煎米粉就好好食！啖啖肉得黎，d汁配住煎香左既米粉，十分夾～帶子西蘭花都唔錯，仲有魷魚。元貝都大大粒，有一蚊咁大，配瓜一齊食，都幾鮮味～飽魚大係大，但煮得唔夠醂，雖然都夠味，但咀嚼得比較辛苦。翅都係咁，係咩特別可講之處。魚同雞幾好食，但就唔記得影相，雞片仲好香好脆，但伊麵好奇怪，係用保鮮紙包住🤔唔知佢係保溫/翻叮。最後上壽包反而大家好開心，熱騰騰咁上，而且好大一個。有奶黃同蓮蓉兩款餡。最後都有上西瓜，切得薄薄一片～

屯門商場唔係太多 我耐唔耐都會過去卓爾居行下 順便睇下有咩好嘢食而我又比較鍾意去飲茶 同班老友慢慢坐慢慢傾 海港 係一個唔錯嘅選擇裝修都算新淨 地方都企理 可能因為成日去啦 同啲侍應都有兩句 價錢又唔太貴 都幾公道 平平哋食每人四五十蚊流沙包和成日都會點 個流沙做得不錯牛仔骨比其他酒樓大份 味道都唔錯 啲肉唔會醃過龍'

我最鍾意就係去飲茶 鍾意佢食物選擇夠多 呢間酒樓 我每個禮拜都會去一次 貪佢環境舒適價錢又唔貴有兩款點心我特別鍾意食差唔多次次都嗌呢個炸豆腐表面炸得好脆 而中間仍然好滑 非常有豆腐味三文魚鰭同出面嘅好唔同 佢啲肉炸完仲係好滑 算係食過之中最好食嘅三個人食200蚊埋單 食物質素同環境都ok

物質素好， 乳豬燒鵝夠熱 ，份量也好。但內裡冷氣太大，凍得太緊要，食物太耐，一餐晚餐食了兩小時。一邊凍一邊等，扣晒分，失敗。大家記得穿羽絨才好來，沒有錯，是羽絨， 侍應 說冷氣是調較不了的。無言。

天氣涼了少許，最適合食蒸氣火鍋；一直是這店的忠實粉絲 叫了超多東西，但掛住食，沒全部影相就憑記憶回想一下啦：蠔 - 超大隻，成隻手咁大，好新鮮刺身 - 以酒樓來說，夠新鮮花膠 - 不錯鮑魚 - 蒸得剛剛好，好吃雞 - 偏瘦及細隻原條龍躉 - 大大條，又滑豚肉 - 普通淮山 - 大大條，好食芥蘭 - 普通粥底 - 南瓜排骨粥，好好味食到超飽，絕對會再encore可能因為客人多，所以坐得比較迫，不過樣樣都好新鮮，好抵食，這裡食蒸氣火鍋，係唔會有待應專門服侍，不過沒所謂啦，自己食自己蒸都好好玩

老媽子想食蒸汽鍋, 又唔想去太遠, 就喺屯門搵下啦, 不過唔多選擇,見呢個海港集團都好似ok 咁。4人餐!樣樣有D , 用料都新鮮, 但就覺得有D少少孤寒。好似蟹咁, 得一隻, 4人分。其中一款係魚頭,得D 骨, 如果係魚類 起碼都有D 肉啦.. 唔係咁多人食魚頭嘛。菜心得10條。其實所有用料都新鮮只係感覺入面配料類別爭D。另外刺身始終唔敢喺酒樓食, 所以三文魚,帶子都係蒸左佢。 先蒸龍蝦, 餐牌上嘅預定時間非常之剛剛好, 由於本人老豆係固老石山, 所以佢堅持要我地每個時間都加多一分鐘。哈哈。D 蝦 唔知點解四人餐係五隻, size 就同任食邊爐嗰啲咁上下大。貝殼類好ok, 冇沙, 新鮮有鮮甜味又爽口。蟹係好新鮮, D 蟹膏超香又頂曬角。 可惜得一隻, 有兩位只可以食蟹蚶。魚頭只得我老媽子一人獨享, 佢話好食雞件好食, 蒸完都仲好滑又入味。 我等左成晚就係呢個粥... 果然不負所望。全晚精華所在, 鮮味都不得了, 每人飲左兩碗 仍然可以打包走。整體都其實抵食嘅。 因為佢係全包套餐,除開二百幾蚊位啫。

屯門海港假期冇下午茶，未到1pm來了，很多人已經等位，好彩也不是等了好耐。之前新開來了一次，感覺麻麻，所以一直沒有再來！！我們叫了些點心。粟米蝦丸，這個賣相好靚，夠吸引，金黃色的粟米粒，入面包住蝦膠，好爽口，口感豐富，大大粒好味！勁多粟米，好甜蟹子燒賣，一口一蝦，啖啖也是蝦，好爽口，好味，唔會食到肥豬肉，好好味！！超級大珍珠雞，有兩隻，真的有點大。有些肉粒，咸蛋，味道也幾好，唔會好濕及咸。不過糯米實身了些。咕嚕鮮淮山，等了一段時間，仲以為漏單，後尾來了，顏色是咕嚕肉的顏色，淮山切了好似腸粉的大小段，仲有車厘茄同埋鮮果，有哈蜜瓜，菠蘿，青椒，味道酸酸甜甜，鮮菠蘿最好味，十分甜，其它的就有點格格不入。係健康有創意的。

一家8人有兩老有小童，分享晚飯不快的經歷，落了單好耐見仲未拎返長單返來都奇怪，要追兩次等了25分鐘才話剛入了單，仲要入漏單，我直接找入單小姐check，部長見到我好似想幫我跟進，但個部長話一陣先幫我落，我即刻話我等咗成半個鐘你仲話一陣先再入，咁我幾時先有得食，入單小姐知道自己入漏單就補鑊即刻幫我入，部長見狀即轉身走咗，身為部長處事散漫，又無禮貌無歉意，超差。叫咗8人餐$1888套餐份量少，味道一般，唔抵食，仲加咗兩份餸，埋單要$22XX, 進食途中有兩隻蒼蠅飛來飛去，心裏已覺得呢間酒樓很污糟，未試過酒樓食飯有蒼蠅，又唔係大排擋，無下次...

平時食日本菜韓國菜多，間中黎個家族飯局都唔錯，可以去酒樓品嚐一席席既中菜。可能平日關係，客人唔算多，上菜都好有效率。招牌醬燒雞，賣相唔錯，雞皮燒得夠脆，夠香夠味道，如果肉質可以再嫩d就perfect喇。帶子福建炒飯，配料十足，蝦、帶子、冬菇...加埋雞蛋炒過既飯，睇見都想食。入口都無令人失望，配料口感豐富，飯又炒得夠乾身，粒粒分明。蟹肉海皇燴燕窩，一見到仲以為係翅，真係估你唔到，入口味道都好似去飲食既翅咁。歡樂大蟠桃，個名好正，聽到都覺得歡樂，我好鍾意食飲宴既壽包，覺得食過壽包就好似得到祝福咁。呢間壽包都唔錯，蓮蓉夠多又唔太甜。酒席黎講算抵食，份量都夠，不妨一試

今天來卓爾居探朋友，來屋苑樓下酒樓吃午餐，對屋苑酒家沒有期望，但這酒樓質素不俗。麻辣雞絲粉皮 (4/10)味道過辣，粉皮太厚身。咸菜豬肚湯 (6/10)本以為特價，沒甚麼期望，但也足料，夠味，不是一味的咸櫻花蝦薄餅 (7/10)賣相滿分，味道合格，們人喜歡香口的，若然再煎得更透徹會更好。甜薄餅 (6/10)微暖，椰絲太多，加多些花生更美味。櫻花蝦三文魚炒飯 (8/10)賣相十足又夠足料，炒得夠香口！鮮茄魚腐湯 (8/10)蕃茄和魚味夠出其餘點心也合格。甜品還有燉鮮奶，楊枝甘露，也都不俗。

今朝起身同細佬落街飲茶我地全部都叫點心食叫左燒賣，牛肉球，鮑汁鳳爪粉果，馬拉糕，鮮竹雞紮我既食評係點心溫度係有但係味道一般，一般既意思係味道五夠未，我認為可以再濃味d,服務態度一般，因為等待點時間較長。

同家人星期日飲茶，之前都只食過晚餐，第一次同家人嚟飲茶，訂咗位都要等40分鐘，同唔訂無乜分別。今次坐大門對正嘅開放式房間，無咁嘈，還可以，寫好點心要落單，叫極都無人理，終於有阿姐嚟喇，又問埋d九唔搭八嘅問題，擾攘咗5，6分鐘先落到單。上點心嘅速度一般啦，但點心質數還要多加改良呀！味道一般！紅油抄手係先整熟雲吞，最後先加醬汁，碟底仲有水，醬汁只放中間，無掂到醬嘅淡茂茂。薄罉煎到燶晒，味道就還可以。其他點心都不過不失，但無特別好食。

平日放假, 扮下乖仔, 朝早同爸爸媽媽去飲早茶, 揀左去卓爾居間海港。 平日都好多人去飲茶, 多數係公公婆婆去嘆一盅兩件, 不過等左陣就有位。茶芥$8/位, 之後搵阿姐加水都幾難下。有個早茶孖寶6揀2, 都係$18.8, 好抵食。 柴魚花生豬骨粥 - 粥煲得都幾綿滑, 有幾粒花生同一舊仔豬骨, 鹹鹹地味道都可以, 呢個價錢算係咁。粟米雞絲腸 - 腸粉皮就厚左d, 不過都幾滑下, 入面d雞絲少到唔多覺, 粟米就有幾粒, 好過齋腸小小。排骨鳳爪飯 - 有幾粒排骨同一隻鳳爪, 雖然個碗淺淺地, 食落飯既份量都唔少, 早餐夠晒飽肚。鮮竹牛肉球 - 一籠有3粒, 牛肉都算幾彈牙, 淋左喼汁實好食。另外仲叫左幾碟點心 XO醬炒蘿蔔糕$17.8 - XO醬都幾辣幾惹味, 蘿蔔糕比較腍身, 夾起有d散, 味道搭救番。蠔汁叉燒包 $15.8 - 一籠3個, 叉燒餡都算幾多又唔肥, 包都幾鬆軟, 岩岩蒸起熱辣辣, 都幾唔錯。珍珠雞 $23.8 - 一籠2個, 料都幾足下, 味道就不過不失。早茶埋單平均每人都係$35, 都算係幾抵, 服務同食物質素未算係好好, 以價錢取勝。