津味小廚 (已結業)

今日好肚餓，下晝又冇嘢做，就去咗呢間餐廳食晏嘞，過晒飯市，得一兩枱客，見到呢個特餐有好多嘢食，於是就叫咗一個一路睇電視一路嘆吓嘞，個特餐有： 例湯：竟然跟中式例湯，奇怪，主菜好似係西菜喎，唔通冇人煲？中湯唔得，冇味，好似飲緊水！ 薯仔什果沙律：唔係掛，真係好少喎，不如你唔好比好過嘞，得三啖，味道就幾好，但係都冇用！ 雞扒豬扒珍寶腸蒜蓉汁意粉：好彩主菜唔係咁少，都幾大碟，雞扒煎得幾香口，幾好味；豬扒好硬，好似咬緊一疊紙咁，珍寶腸可能放咗好耐，吹到乾晒連皮都變晒色，層皮真係韌到咬唔開咁濟；最好係意粉唔係煮到稔晒，仲有啲 al dente 嘅感覺，蒜蓉汁好濃好好味，分量亦剛剛足夠撈晒成碟意粉，唔錯！ 凍鴛鴦：太甜，咖啡同茶味都好淡，唔得！下次試吓一坐低聽到其他客都叫嘅咖喱先得！