朋友生日，原本系去一间食海鲜嘅餐厅，但因为店内有只大米奇，当咗自己系猫咁响店内行嚟行去，所以转地方，嚟咗呢间《泰象泰国越南餐厅》。一直我对食泰国菜嘅感觉都好一般，唔系话太啱我嘅胃口，但系食过《泰象泰国越南餐厅》嘅泰国菜，一改以往对泰菜唔好嘅印象。我哋4个人，点咗泰式串烧、泰式炒西兰花、咖哩炒海鲜、咖哩炒蟹、冬阴功汤同生虾刺身6样嘢，我最钟意系泰式炒西兰花、咖哩炒海鲜同冬阴功汤，我钟意佢个汤清得嚟又有冬阴功酸酸甜甜嘅味道。《泰式串烧(猪、鸡)》，难得串烧嘅猪系唔硬，而且肉质就鲜嫩，冇雪藏嘅臭味。《泰式炒西兰花》，佢泰式嘅酱汁同西兰花好夹，西兰花炒得好夹脆而且唔会太硬。《咖哩炒海鲜》，炒得好有镬气，加上铁板上，令到每件海鲜嘅咖哩香气迫人。《咖哩炒蟹》，好大只蟹，啖啖肉，咖哩味好香浓，但咁样炒蟹就有少少浪费咗只蟹。《冬阴功汤(中)》，头先提及过佢个汤好清澈，好多料，加上酸酸甜甜嘅味道，令人胃口大开。《生虾刺身》，正常嘅生虾刺身味道，冇话特别惊喜。今次系少有食泰菜完全冇叫到炸嘢，可能因为咁令我对泰菜改观，除咗炸嘢，泰国仲有好多唔同嘅美食。…查看更多
