永華麵家 (已結業)

今日下午同男友黎呢度食個luncheon,2點半舖頭仍有8成滿,果然厲害!由於我地吾太餓,只系叫左一碗雲吞牛根麵$30同桑寄生旦茶$14.雲吞牛根麵---size不算大,一碗5粒雲吞,細細粒,皮薄,蝦及豬肉餡十分有鮮味!牛根夠腍夠入味!麵無鹼水味,有咬口,以咁既食物水準,$30絕對貴得起!桑寄生旦茶---見到牆上既介紹話加左普洱,個人認為味道只屬一般,茶味可再濃郁點;首選還是西環"源記"service就一般啦!在場見到好多人食豬手撈麵,相信亦不錯!有機會會試試.

5月4日，19:15到銅鑼灣換贈品，再到電腦城買墨，這樣安排，便可順理成章試名店。要了雲吞麵：湯底：幾鮮甜。雲吞：有五粒，粒粒不同，全是蝦比肉多，但有些竟有肥豬肉而無瘦肉，開邊小蝦有雪味，最後一隻鹼水味極重，破壞了整碗麵，大鄉里見識了肉丁雲吞。麵：爽而鹼水味不重，麵上臺我便把它徹底撥亂，仍未覺有濃濃鹼水味。酸蘿蔔：太多糖精了，水記比它好。最滿意竟是那荔枝紅茶，由於等了10分鐘才有麵吃，茶添完再添。這價位，這樣水準，若不是特色手打麵，我定送上個"哭臉"。下次一定要試華南。

最後都係要換，原因後話啦。這裡最近被電視台訪問過，原因是師傅有30 多年做麵經驗，在搓粉時加入鹼水和鴨蛋，再以大碌竹昇打壓，比一般粉麵店的鹼水麵來得爽口彈牙，上星期二放工後有點時間試試。一來到已被檯上的酸白蘿蔔吸引著，這是中和麵的鹼水，但當然要叫左主菜先啦，見著的湯麵都幾細碗，對於想食真的既，份量緊係不足，於是俾多十五蚊叫個雲吞撈麵。送上來的時候不覺得乜特別，但食落第一啖時候好特別，麵不似一般麵店既爽口，亦唔係好似係超巿買一包包蝦子/蛋麵既質地，可以說是介乎兩隻之間，而雲吞的質素都係高一班，有兩粒中蝦及少少豬肉，雖不是好大粒，但質素我覺得又不錯，同其他名店有得fight。但食食下點解的鹼水味越來越重呢？或者係呢度既style，但我再一再底時比之前更重到食唔到，於是放棄左，同埋complain，事後解釋番係該排客人太多，要做多的，使到好多時都係即日做，即日賣，但係這樣鹼水味便不能隔一夜慢慢淡出，如果湯麵會好少少，於是換過去，食河粉撈，都係第一次食。雲吞當然冇變啦，河粉好明顯茶過油，幸好凍左既時候都唔會chi住曬。有機會的話一定會再黎叫撈麵。

宵夜唔知食咩，見十一二點仲甘旺，就撞左入去。好耐唔黎，竟然走曬樣。湯淡，面淋，皮厚，雲吞內有大塊瘦肉煮到鞋曬。聽說師傅整親手要休息。唉！唔通哩味野將來真系會失傳？

下晝又在灣仔區工作，食左粥，工作一輪，正是打道回公司的時候，路經此地。見有位，亦之前在留言版同各食友討論過這裡的雲吞麵，擇日不如撞日，就來試一下。近兩點，人客已漸少，很容易找到位。叫了一碗雲吞麵，沒有其他。如舊式麵舖，這裡有一樽樽的醃蘿蔔給客人吃，原意是中和鴨蛋麵的鹼水味，不過記憶中這裡的都是沒有鹼水味的，所以這味是齋吃的了。醃蘿蔔爽脆，略縑切得碎了一點。這一味醃菜，水記的比這裡好，而最好的是深水步劉森記，那裡的醃大紅辣椒，又酸又甜又辣，正到暈！麵上檯，雲吞在底，麵在面，正統規格，不是黃枝記那些，一看便知唔對路。份量比正式的多一點，麵完全沒有鹼水味，又有油香，真的如惡男兄所言，不太夠爽口彈牙，但麵身味道幾好，可以彌補缺點。湯底是蝦味濃郁，說沒味精是騙人的，但雲吞湯有多少味精，有幾奇呢？雲吞算大粒的了，肉多蝦少，肉亦以肥肉佔多，咬落味道及口感不錯，仍有水準。一碗五粒，幾夠份量，加埋之前的鹹雞粥，很飽了。埋單23蚊，是貴版的雲吞麵價錢，但始終是人手壓的竹昇麵，在香港已買少見少，單吃那份技術也不止廿多元，在日本已經是「文化遺產」的了，不可不試。當然如果覺得肉刺又覺得不明所以的話，大可去食番十

永華手打竹昇麵，彈牙很有口感，而雲吞是傳統的口味和大小，只是小小的一隻，個人較喜歡羅富記的雲吞，但永華的麵就明顯較出色，雖然質優但二十三蚊一碗就實在太貴，而且裝修較舊，座位比較了一點。磄水方面當然不及老字號源記，但價錢也相當，間中食也無妨。

星期六又要返工, 做到一隻"劇", lunch 都冇乜點停過手, 又倦到痺. 都係要食多的野補充下.打算特登係灣仔落車睇下的電腦書同DSLR.又記得上次去永華麵家摸門釘, 今次終於入左去.話哂都叫做老字號舖, 侍應都有返咁上下年紀.坐係收銀最近一張椅, 好奇怪呢張枱的椅特別矮.要左碗雲吞麵, 都唔駛兩分鐘就有得食.用左一個普通食飯碗上, 老字號係唔同的, 的麵係上面, 雲吞係下面. 雲吞有四粒.先吃麵, 竹昇麵的確唔錯, 有彈性, 但不會要用牙用力撕開. 係頗出色的.雲吞size做得剛剛好, 唔會細到牙罅都攝唔到, 又唔會大到好似湯丸咁.吃下去肉較多, 應該是六成豬肉四成蝦. 我較喜歡吃多少少蝦(但不是全蝦肉, 如果咁不如食蝦餃~ z_z), 淡淡的楜椒味, 唔會蓋過肉味和蝦味.湯沒有鹼水味, 又沒有過多的楜椒粉味.整體水準不錯, 買少見少的竹昇麵真係要試下.難得服務上佳, 收銀的伯伯多謝都講左兩次, 唔該一次.$23當然比其他店貴, 但也值得一試的.

一條'冷' 睇完'藉著雨點說愛你' ，由銅鑼灣行到灣仔都無嘜心水．記得呢間鋪啲 竹昇麵唔錯，求祈一餐啦．叫咗一碗雲吞麵，碗麵細細，幾粒細雲吞，一箸麵，廿三元，唔平．竹昇麵彈牙，有咬口，無鹼水味，唔係咁多鋪頭食到呢個水準．雲吞細細粒，蝦肉豬肉各一半，唔同食開果啲乒乓波全蝦肉大雲吞，睇個人喜好邊樣好食啲 啦．因為一啲事攪到常春藤小姐唔開心，我都無嘜心機同胃口，一個加大碼男人，一碗'細蓉' 都可當晚飯喇．希望佢快啲開心番，咁我都安心啲，可以食多幾味，寫多幾句．

雲吞麵原來就應該是這樣! 麵跟湯都是極品!雲吞的水平可以再好一點,但現在的水準,在別的地方也都已經很難找到老師傅年紀已經很大了,有機會請儘快試試!

我好鍾意食廣東式既炸醬麵,差唔多去親麵鋪都會叫.食得最多算係呢度.呢度D炸醬麵個醬唔係紅色,唔駛驚有蘇丹X號.個汁係好傳統,係用甜麵醬煮出黎,夠辣,又有冬菇絲,加埋D手打竹昇麵,好好食.付上既湯亦好靚,帶大地魚同蝦味,同有一陣清甜,唔知係咪有羅漢果.

對我來說, 永華的淨麵是super sized! 有2個正常麵餅咁多, 我好肚餓都只可以食得下60%. 如果呢度d麵真係咁有心機人手壓出來, 我只可以講句, 唔好意思! 我浪費食物!另加芥蘭一碟, 老闆好細心咁問: 上湯還是蠔油? 我選上湯, 湯清味濃冇味精, $28都值.

同朋友o係演藝學院睇完節目，順道過黎食番個靚糖水至歸家。十點幾黎到，店內都有七成滿，不愧係老字號。五個女仔叫左三個桑寄蓮子茶、一個桑寄生水、一個陳皮紅豆沙同桂花蓮子羹﹝你冇數錯，我地五個人叫左六個糖水，個紅豆沙係俾五人分食o既﹞，外加一份蝦子柚皮﹝靚女老友食量大，冇計﹞。蓮子係一貫o既鬆化，每碗桑寄蓮子茶都勁多蓮子，大家都食得好滿意。我叫o既係桂花蓮子羹，雖然話係羹，但其實係好清o既桂花糖水，桂花香味四溢，配上勁多o既鬆化蓮子，一碗26元雖然唔平，但都叫物有所值。紅豆沙充滿陳皮香，雖然稀稀地，但都煮到起沙，味道唔錯。個蝦子柚皮雖然都整得好腍好入味，但味道太鹹，個人認為唔及桃花源恰到好處o既鹹香。相比源記，我比較喜歡呢度o既蓮子，顆粒更大，味道亦較佳。不過價錢相差一倍，個人認為源記絕對係更抵食﹝呢度就係物有所值﹞。

我之前都會一家來食...因為我地成家都好鍾意食架d麵夠爽,紅豆沙起沙無豆,蝦子柚皮好軟入曬味~仲有d 放在桌面個d酸蘿蔔..連唔食既我都夾左幾件食呀~我爸最鍾意食豬手麵我媽最鍾意飲桑寄生蓮子茶我最鍾意食水餃麵同陳皮紅豆沙我兩個妹最鍾意雲吞麵同紅豆沙湯丸唔好以為我地好似好大食咁,其實真係好大食but又唔肥喎食飽左散下步,行下街...咁就食幾多都唔怕喇! 呵呵~呵~

星期一晚打完波，來這兒宵夜。叫了雲吞麵，一向標榜竹昇打麵的她，麵質當然彈牙，不過我卻嫌麵條太有勁，吃下時總是頂住頂住，下不到格。吃完麵，見有甜品，順便要了碗桑寄生蓮子蛋茶潤潤，幫助消化。這碗蛋茶真係教我意外，清清甜甜的，蓮子鬆化，一點也不覺溜，也沒有飲"糖水"的感覺，相比起麵食，個人認為甜品更出色，有點衝動提議老闆以甜品做主打，

做完手作仔，見時間己晚，就同學生女去附近的永華食個輕便晚餐。九點半過後，店內仍有唔少食客，可見江湖地位依舊。兩個女仔叫左一碗筋腩麵同一碗豬手麵，再交換餸 食。兩碗麵一如既往，是細細碗，麵的份量不多，餸 卻是不少，底下墊了些生菜，食完其實還是幾夠飽的。麵的質地很好，煙韌得來又很爽口，腩仔是保持水準，牛腩同牛筋都炆得好稔好入味，豬手的外皮很爽脆，一粒粒骨仔咁「損」都幾過癮。值得一提的是這裡免費奉贈的醃酸蘿蔔，少少辣，配濃膩的牛腩是剛好！價錢不算便宜，但仍是物有所值的。