景福茶樓 (已結業)

之前搭巴士時常經過此店，似是很舊而不起眼的店，店鋪面積窄長而細，竟然是茶樓？很久沒有寫食評，因為太忙，食完便算！不過這間一定要寫！因為少油，較健康，值得推介！9/7/2009 三人行，六点九到達此店。我們点了香片、一湯、三餸、一炒飯及一支啤酒。沙鯭芥菜湯 – 湯很鮮甜，唔腥，滾完湯的魚仍然滑，好味噃！荷葉蒸雞 – 有雲耳伴著，雞肉質很滑，但味道咸了点，要扣分呀！釀刀豆 – 第一次見刀豆，外表似很濶而扁的荷蘭豆，釀了魚肉在內再煎香。清得來香口，口感豐富，魚肉和豆配合得很好，少油，好味!欖角蒸黄花 – 用了豆腐泡as stand，看起來兩條魚兒還在游泳似的。魚肉很滑，欖角令魚的味道濃郁，豆腐泡也索了欖角味，又是少油，不俗！咸魚雞粒炒 – 上枱立即聞到芳香樸鼻，炒得很乾身，不油！咸魚和雞粒的份量十足，冇呃秤！咸魚不会太咸，正！不過如果菜粒再多点便perfect!!隔鄰檯是一家四口，見到他們点了蝦仁炒蛋，炒得好靚而不油，下次要試下。服務態度唔錯，they are so nice!! 很多人買外賣，客似雲來。最後要一提便是toilet！沒有厠紙提供也算吧！為何沒有洗手梘液？店主，請改善！

我每一個月總會去一次的飯店~嘻嘻~伙計好親切~可能自家店~~d人會nice d~我每次必食係魚香茄子煲~~呢度既味道係唔辣~~肉碎一陣陣咸香味~~~good!琵琶豆腐我每次都會叫~~~下次去食之後再寫返篇食評~嘻嘻~

景福茶樓是一間家庭經營的飯店, 店內亦沒有什麼裝橫, 更可說有一點簡陋. 未必人人可接受. 但這裡的一份親切感, 在其他地方是找不到的. 而她的食物亦很有家的感覺.在這裡我必叫的是沙孟魚滾芥菜湯, 這個湯在別店很難飲得到, 而她的沙孟魚十分新鮮, 每個湯亦用上了半條十分足料, 芥菜亦十分嫩, 而湯亦㷛得很清很滑. 小菜方面亦很不俗, 而且份量十足. 這裡的蘿蔔牛腩煲十分美味, 牛腩牛味濃, 而且不會乾身, 肉軟嫩滑, 蘿蔔沒有渣而且清甜, 而汁料亦適中, 味道不會太重.其他小菜如涼瓜肉碎炒旦, 椒鹽骨, 蝦醬蒸豬頸肉等亦十分出色. 而這店的服務十分體貼, 令食客食得很輕鬆, 而我吃完更有一種幸福的感覺.

上星期六去朋友屋企玩，到六點鐘已經打哂鼓，本來諗住叫pizza，不過有人口嚨痛，冇得食好彩，卑我地搵到間正野~間餐館裝修麻麻，幸好衛生程度可接受。不過我們一行三人都要搭, 冇得獨佔一張...問老闆娘，佢話忍耐下。我地心諗，使唔使咁巴閉呀^~^我地叫豉汁蒸倉魚，咸魚煎肉餅仔同小盤菜，全部都冇令我地失望呀, wakaka!倉魚好滑，仲滑過阿媽蒸個D，其實老闆娘向我地推介過好多魚，佢話全部都係新鮮，不過我地對魚的知識有限，所以剩係叫識既倉魚, hehe煎炸野不嬲係我至愛，既然已叫蒸魚，當然要叫D香口野!肉餅仔煎得香口，加上細細件易入口，又開胃，我竟然一8人獨食六件! 最後係小盤菜，上個陣，原來先發覺買相好靚!有魚餅、蝦、蟹柳同大量雜菜，先六十蚊，抵!可惜我住得遠，如果唔係我實會幫襯多D!

這家不起眼的小店在西灣河街市對面, 這是一個名符其實食"小菜"的地方. 因為她提供的款式不多, 沒有一排排的游水海鮮, 也沒有甚麼出名的招牌菜, 翻開餐牌最貴的小菜也不過五、六十元, 最適合一家大細懶得煮飯落街食的地方. 店子不大, 大大小小的檯加埋才十張左右. 內裡的格局已告訴我這裡雖未算歷史悠久, 但十零廿年的舖齡則肯定有, 而且很可能是未裝修過的, 再加上很有禮貌的店員, 感覺十分親切. 一行兩人點了兩個小菜- 南乳齋煲($40)及椒鹽沙魚孟($50). 齋煲材料十足, 可惜味道很淡, 差不多沒有南乳的香味. 沙魚孟炸得外脆內嫩, 椒鹽上味亦得炒得有火喉, 不用醮o急汁或淮鹽也很好味. 再加一碗白飯及一罐汽水, 埋單$103, 不收加一及茶錢.

好耐冇嚟，兩公婆叫了兩餸加蕃茄紅衫魚湯。湯到，飲咗半碗，發現碗中有小強腳嘅物體，再睇大湯碗內嘅湯，亦浮游數隻大小不一嘅強腳，但就冇屍身，於是打算同伙記講，睇吓可否換第二味湯。伙記+老闆兩人一睇，不斷話只係煎魚嘅皮屑，完全冇更換嘅意思。研究成條煎魚，再望吓一隻隻屈曲嘅強腳，好明顯唔係煎魚嘅皮屑啦，我又唔係博唔收錢，其實邊個廚房冇小強吖，眼不見為乾淨，但死口唔認咪仲老土。最後我哋成兜湯冇飲到，費事有事時自己攞嚟衰。本來呢間飯店係本人區內至愛之一，而家唯有另覓新歡。

6月30日晚3人來,姐姐請客,叫咗:1)椒絲腐乳唐生菜-熱騰騰,有d紅椒絲,蒜粒-唐生菜清甜-不錯2)油泡田雞-田雞非細細隻,size每件都有番咁上下,肥美,尤其腿位,啖啖肉-好亮麗,火喉捉得剛剛好,所以好嫩滑-跟埋d冬菇+鮮草菇同炒,紅蘿蔔雕花片作點綴-十分讚3)洋蔥豬扒煲-用煲上,打開蓋d熱氣就立即"供"出來-豬扒雖然碎上,但切得大大片,但唔夠入味。同煲的洋蔥條亦切成粗段,很清甜-豬扒肉不"鞋",但肯定不是鬆化,姐夫說因它們用了新鮮豬扒-基本所有食物都很有鑊氣(因坐近廚房聽到和聞到),即叫即做,不乏街坊客。用料亦新鮮,是靚貨。見到不少人叫煎釀三寶-不過環境同衞生真喺要攪攪佢喇。店舖可粗略分為前後段,前段較為企理。後段其實是長走廊位,通往舖頭末端,不過就放了單邊枱(只能2人坐),望住廚房,洗碗地方,感覺上不是味兒-我們的洋蔥豬扒煲用了1個用錫紙包住滕藍盛着熱瓦煲,姐姐初見到2隻類似小曱甴的昆蟲從藍底爬出,過多1陣再有1隻,於是要求店員更換另1滕藍再上過枱。幸好昆蟲的爬行路線非我視線範圍,否則便倒胃-服務唔差,店員似1家族,聽到會不斷向無嘜頭緒點菜的客人作建議-若不是衞生問題,1定比笑

星期六晚7點鐘到，已經將近爆，好彩重有兩個位，即刻坐低。要咗啫啫雞煲($48)同生炒骨飯($26)，再加碗白飯($7)。個煲都算夠分量，幾多料，豬潤同雞都好味，啲雞亦似係新鮮雞。生炒骨亦整得好，舊舊帶骨，唔算肥，粉槳唔多，咬落鬆化，個汁就ok酸，開胃。冇加一，埋單只係$81，唔錯！

一連五日OT完都係出街食, 開始有點吃不消.是日早點歸家, 致電家姐原來也差不多同時間返到屋企附近.倒不如一齊去食埋飯, 俾佢去太興抑或呢度二擇其一, 就來到這裡.不要看此店細細不起眼, 不時也高朋滿座; 好多阿怕或者一兩人黎食都會叫個湯, 食條蒸魚叫個白飯咁.小弟也不時買外賣飯盒, 又搞掂一餐.打算要兩個小菜; 最後家姐點了南乳什菜煲, 老闆介紹埋荷葉蒸雞.廚房不算大, 也等了20分鐘先有得食: 先來什菜煲, 料足又多種類: 冬菇, 粉絲, 粟米仔, 紅蘿蔔, 絲瓜, 雲耳, 菇(似是雞肶菇但不肯定) 等.熱辣辣, 幾香. 立刻叫返兩個白飯撈汁.至於荷葉蒸雞, 味道唔錯, 味道似家庭餸, 冬菇吸收了雞汁好入味, 雞估都是雪雞, 都不錯, 但肥左D.此店街坊格局, 味道不錯, MSG唔會多, 可以試試.