星月樓

营业中

休息中

又係無飯主婦出動了🤣🤣🤣難得星期六唔使返工，當然休息要休盡佢，晚飯不煮了，當然搵返間中式酒樓食返個晚飯小菜食晚飯先，當然少不了飲返碗湯水潤一潤，出街揀湯水，梗係揀番啲喺屋企煲唔到嗰啲啦。呢個白肺湯超級足料，仲有好濃郁嘅杏汁味，飲落去仲相當潤滑👍👍👍好飲到我飲咗三碗咁多🤣🤣🤣出得街食，當然要揀番啲有水準的食物，花菇玉掌既出得廳堂，有相當美味，是一個唔錯的選擇。花菇同鵝掌都炆得好琳，再加上濃郁嘅豪皇汁，食到我舔舔脷😋😋😋先鳳梨生炒骨，呢個餸超正，真係有新鮮菠蘿🍍，味道仲好鮮甜，再加埋外脆內軟嘅生炒骨，真係我食過咁多生炒骨最好味嘅一個。同外邊嗰啲生炒骨絕對冇得揮，我肯定下次去食都會嗌返呢個餸食咗咁多肉，都係要嗌返個蔬菜嚟中和下嘅，呢個餸都還可以，黑毛豬都炒得好軟熟，味道都一般啦，冇乜特別🤣西蘭花花枝片呢個餸都唔錯，西蘭花飛水之後再炒，都算吵得幾惹味，再加上啖啖又軟熟又Juicy嘅花枝片，都算得上係一個上菜。最好味都係花枝片，啖啖都係肉，味道適中👍👍👍星月樓呢間酒樓嘅餸菜都算唔錯，有機會下次可以再食

之前一早打電話黎book 左同婆婆擺壽宴，講好哂食邊個餐，打幾多台麻雀要坐咩位置都定好哂，我地就通知屋企人日期時間地點，正打算去比訂金之際打多次去確認，點知佢話已經比左個場人地！！ 有無搞錯呀？ 我地一直有用電話wtsapp 聯絡緊！ 你一句話無記錄同話比左人就算，我地已經通知哂d 親人、有小朋友又老人家，個個預左果日黎，突然間話無就令我地失哂預算！仲一句唔好意思都無！仲講話人地比左訂先過我地？ 話以比訂金優先？ 即係有錢同圍數多就大哂？咁你比人落訂時都可以同我地講句掛？ 完全唔問就比左成個場人，為左賺錢就無道義，真係祝你生意興隆呀！ 之前是常客，而家我地成家都唔會再黎幫襯！諗起都嬲

一間餐廳即使食物更好，若服務態度惡劣，都唔會想去食。家老係上環分店常客，見荔枝角有分店，就去試試。到達門口，不用等位，我地三個人，佢叫我地坐門口位一張二人枱...好在最後都轉番張四人枱俾我地。店員鋪完枱派碗碟，碟上竟然有食物渣滓，店員收走隻碟，但一直都冇再拎新碟黎。見到咁ge情況，我地緊係再洗啲餐具。洗完，想叫店員幫手拎隻大碗俾我地倒水，一位戴眼鏡ge店員好大聲咁講「我地係不設倒水服務，啲碗我地全部用熱水淥過先俾你地，你地自己去個度倒!」首先，我地唔會知你地有冇淥過啲碗碟，而你地話淥完都仲可以有食物渣滓咁拎過黎食客點有信心! 食物其實唔算差，假日午市套餐$238有三款點心、一款灼菜、粉麵飯、小食，份量都唔細，算係抵食。

上次叫一位服務員拎甜醬，佢叫我返屋企囉，地方環境擠迫，叫啲侍應嚟執枱等咗五分鐘仲未到，啲嘢食最少等左九個字先上到，最緊要又唔係咁多人，叉燒酥啲酥皮唔脆。總括嚟講：服務不好衛生差環境擠迫

星期六返完晚堂崇拜， 同幾位教會弟兄姊妹去附近，經常吃的酒樓晚飯暢聚， 原來 年近歲晚，餐牌已經更新了， 散餐價錢大約 $1xx 一個餸, 所以我哋決定選半席 金鼠迎春全包宴， 一般酒席菜式沒有太大的驚喜， 反而 糯米飯做得好軟綿， 恰到好處，薑汁糕味道濃郁清香。由於當日太多訂座酒席， 所以座位比較擠迫， 加上有些公司食團年飯，咪聲聲浪太大， 第一次在星月樓感受到又逼又嘈嘅感覺。反而值得嘉許係員工嘅服務周到， 細心熱情嘅款待， 值得一讚。

1月1 日諗住同新年同家人飲個茶，點知撞著個李經理態度惡劣影響食野心情。 本身7個人去食飯，佢地比左細枱我地。 見到旁邊有張大小小既枱，就問一問佢可唔可以換一換。點知佢叫我地行可以行番出去，慢慢等。 其實啲野又唔好食...如果唔係遷就老人家，我真係唔會黎食。宜家仲要比錢買難受，真心唔建議黎食。無下次。

個酒樓名就已經好合我心意，星月樓系食粵菜噶，有時同屋企人來哩度飲茶，地方好大，不過人都好多，我地去到都要排一陣對先至有位。次次都會點噶菜苗蝦餃，蝦皮不算太厚，蝦好大只呢，咬落去口感超好，仲有個南瓜蒸排骨，南瓜好粉好甜，排骨都好入味，我都好中意食，總體來講，都系幾ok噶。

日期：9月21日人數：5人話說一直都係去開上環嗰間星月樓。屋企人平日幾乎每朝都去飲茶。由於就喺地鐵站出口附近，加上點心唔錯，一直都係佢嘅首選。今次係因為相約住喺長沙灣嘅親戚食晚飯，所以為咗遷就佢哋，就揀咗嚟長沙灣依間星月樓食。屋企人之前以優惠價錢買咗乳豬券，今餐亦有使用。五個人好誇張咁樣用咗兩張乳豬券，另外點左杏汁菜膽豬肺湯，一條清蒸大沙巴龍躉，同埋一碟鮮淮山浸菜苗。重點真係豬肺湯，好好飲好療癒，實屬必點。煲湯嘅豬肺撈出嚟之後，點少少豉油就已經好好食。屋企人食埋雞腳同埋菜膽。我哋上年都有去星月樓食飯，亦都有點乳豬，我哋一致覺得今年嘅乳豬比較瘦，但皮脆肉多，亦都燒得好食。最後大家都只係食剩幾舊，連埋兩個豬頭一齊打包。沙巴龍躉新鮮，味道都幾好，稍為有啲過熟，但蒸魚本身就已經好好食，豉油汁好餸得飯，俾多啲蔥就更加好。淮山同菜苗比較林，適合老人家。環境方面，整體感覺同其他酒樓差唔多，裝咗好多電視機。地方比較大，可以擺唔同宴會，亦有幾個包房，房入面好似有卡拉OK。服務不過不失，當晚冇糖水送。價錢都係一般酒樓晚飯價，唔算貴。

爸爸話最近發掘到一間平靚正茶樓，一於嚟試試。中午前有抵食孖寶，所以10點幾就嚟到，門外有唔少人等位，但流轉都算快，大約10分鐘就可以入座。枱與枱之間無乜空間，好在2個人都可以坐4人枱有兩款特價孖寶，都係$26/$28喜歡食腐皮既一定會喜歡鮮竹卷，入面好足料，仲有少少莞茜味，唔錯唔錯。菜苗餃都好料，但個皮造得太淋，一咬有少少GEL住D牙，但都可接受的。炒米粉本身清清地，有菜絲蘿蔔絲同火腿絲，加埋辣醬就好惹味我同爸爸都十分喜歡燒賣，平時週末飲茶都要差唔多30蚊一籠，今次雖然係孖寶，但估唔到都係大大粒，味道都係正常以上，所以覺得好抵食。食特價嘢之餘都試下貴嘢，百花既蝦膠都算彈牙，加上面頭的蟹籽脆卜卜好好味。食完晒準備liu牙果陣發現哩間酒家用既牙簽包裝拍得住中高檔既食肆，再望下d餐具，雖然係街坊茶樓，但都唔碗碟杯都好完整無崩，所以相信哩間酒樓都有係細節到用心。2人食咗6個點心都只係139，我覺得都選係良心，而且整體味道都ok，絕對係可以再返轉頭既選擇。

之前聽朋友說星月樓味道不錯，但第二次及第三次去，就差咗d。我問有幾差，她話無第一次咁驚喜。竟然我都未試過，只係無驚喜啫，但仍可試一下，加上我地9大2小既飯局，也要找個舒適地方開懷大吃，所以我仍舊提出去星月樓。佢係荔枝角B1 出口直行10分鐘，1/f 係煌府，2/f 才係星月樓。6點半到，人不多。伙記也5多。睇完餐牌，發現散叫類不多選擇，於是叫個實惠全包宴。不過，我地將湯羮改為冬瓜盅，加多$100。今次無影食物相，只好筆述。乳豬拼盆：除咗又鞋又韌既鴨外，其他都好味。尤其係叉燒。龍蝦淮山面：味道好味，我食咗好多面螺片黑豚肉：炒得入味，真豚肉夠腍金薯咕嚕肉：好味。始終係沾粉去炸，所以勁多油。如過咗熱力，就見到好多油係底。哈。。。太5健康既美食冬瓜盅：好多料，有蟹絲、帶子碎，我飲咗2碗龍躉：廚師蒸得好正，魚大條又滑魚腐浸菜苗：魚腐好味，湯底也入味雞：5掂。無味又鞋欖菜炒飲：我真係食5落，超飽。朋友話香口。壽桃：細細隻，但都有少少蛋黃最後打包咗3盒野走人。。。。埋單$2088，好抵食，環境又舒適

因為約咗朋友去長沙灣睇電影早場，所以喺開電影之前，特登去附近飲過茶呢下肚先。 而依間茶樓啱啱就喺戲院隔離。煎薄餐：呢個煎薄餐， 不過不失，同出面啲酒樓差不多，唯一好處係佢嘅蝦米都放得比出面多D。牛肉腸個腸皮蒸得好滑，而且就咁睇已經見到啲餡，D餡幾足料，而且牛肉幾新鮮。呢個五穀粗糧糕係第一次喺酒樓食到，幾得意，咬落去煙煙靭靭，又有粗糧嗰種爽脆，又好食又健康。個白花魚肚都幾大件，啲料都幾新鮮幾充足，值得一試鳳爪排骨飯就同出面其他酒樓差唔多，冇乜值得特別講，不過用嚟充餓就係我嘅至愛。

媽媽生日一家十六人訂了一席壽比南山宴，酒樓預備了一間房給我們，並提供卡拉ok及電動麻雀枱。當日爛賭鬼四點先行到酒樓開枱，房間舒適，特別是房間外連接小露台，可自由出入，家姐細佬非常開心，因為他們是食煙的，可以出小露台煲煙，非常方便， 家姐還說下次一定要訂這間房，方便食煙。因為要去尖沙咀取蛋糕，我大約五時半才到酒樓，當時非常肚餓，一去到酒樓已即叫小食， 掌翼，手撕雞，燒腩仔，叉燒， 原來在打麻雀 的爛賭鬼都非常肚餓，小食嚟到大家都即時放下手上麻雀，狼吞虎嚥，掌翼非常入味， 之後都再叫多一碟，叉燒夠鬆軟， 手撕雞，燒腩仔 一般。七點半人齊開席，先來的乳豬全體， 皮脆不太肥， 龍蝦伊麵份量偏小， 味道普通， 好彩沒有加大。原本菜單已有蟹鉗，我們16人， 大家又鍾意食， 所以加多了一碟，上枱時24隻蟹鉗場面壯觀 ， 蟹鉗又大隻又夠脆，大家食得非常開心。之後的碧綠蝦球桂蚌，沙巴虎杉斑，金錢鮑魚 都夠大碟， 味道不過不失。另外加了三碟餸，椒鹽豆腐，甜薯咕嚕肉，腰果肉丁，都是一般菜式。可能 大家都開始飽了，之後的家鄉鹽焗雞，櫻花蝦海皇炒飯， 鮑汁伊麵，壽包，紅豆沙都覺得麻麻地。總結: 一大班人在公眾假

假日下午茶時段，酒樓食客如雲。這兒的點心、燒味質素不錯。牛肉腸粉皮薄又滑，但就有點削。叉燒飯，叉燒很稔，好味！鮮蝦菜苗餃皮薄晶凝剔透，饀多，但皮很削。蘿蔔糕煎得不太燶，有蘿蔔味，料就不多。

飲茶係每個週末假期同屋企人既指定動作茶樓除左要坐得舒服食物質素固然好重要今日黎試下呢間新嘢·唔知係咪新開人特多不過等左陣好快有位檯與檯之間不算闊落但張櫈越坐越舒服👍🏻·飲茶不外乎點心小食呢度款色差不多有齊但剛好過左早市時段就沒有特價和蒸飯了·<百花魚肚> - 特點呢款點心已經食唔少竟然呢度算係幾高質魚肚蒸得爽滑又唔睲百花起碼有四隻蝦肉又爽又彈牙超好食😍·<山竹牛肉> - 中點牛肉蒸得過左火侯肉有少鬆唔夠彈牙但味道尚算可以～·<翡翠米網腸粉> - 特點腸粉拉得夠薄又滑裡面包裹住炸蝦肉再點少少甜豉油～內脆外軟滑好正🤤·<炸魷魚鬚> $48魷魚鬚好大條有咬口可惜炸粉太多太厚😕另整個小食失色不少·<瑤柱蛋白炒飯>睇賣相已經與別不同顏色和配料都好豐富炸瑤柱絲蛋白菜心粒粒粒飯好鮮明好香口果然炒得好夠鍋氣👍🏻推推推🥳🥳🥳·<總結>食物質素大致上不錯特別係有鍋氣炒飯😍

叉燒超好食，夠蜜味，入口鬆化，肉質夠軟唔會過火又有炭燒味又唔會死鹹食完又唔會覺得好肥膩，超推！必點！另外環境一流，乾淨，光猛，侍應服務不錯👌碗具又乾淨！另外佢嘅燉湯味道都唔錯，有機會都要一試！湯料足味道夠