敏華冰廳 (德福廣場1期)

营业中

休息中

【下午茶摯愛🤤】呢排疫情開始嚴重 都唔係好夠膽食咁多堂食 好想食肉 諗起敏華嘅黯然銷魂飯同咖吔多士 拿拿臨叫外賣🥡～*三叔公馬來🇲🇾咖吔多士 $29試過百份百 其他茶餐廳 峇峇娘惹嘅咖吔 都係敏華最好食嘅 多士烘得適中 中間有牛油同埋咖吔醬 咬落入口即溶 又唔會太甜 好邪惡啊～*敏華黯然銷魂飯 $88呢個真係好食！最緊要係個叉燒 我試過食佢地堂食同外賣 都係堂食好食d 因為送上檯果陣 夠曬熱辣辣 又唔會凍左 d叉燒燒得適中（外賣會等耐左 同埋d肉無咁熱 同嫩）配埋佢地個雙煎荷包蛋 兩個都係半熟 可以一次過食 亦可以整爛佢 等d蛋汁留係飯到 配埋d秘製醬汁 撈飯一齊食 簡直令人回味 （感覺都係堂食好食d 同埋平d 可以配埋個套餐有油菜 葷素搭配 無咁濟～）*凍檸茶🥤+$3 正常茶餐廳檸茶 幾好飲（起碼唔會好似三哥咁 加$10蚊🥲）*外賣 +$1 整體評分⭐️： 5/5地址📍：敏華冰廳 （九龍灣偉業街33號德福廣場一期1樓F28號舖）

7月15號發現有昆蟲 攞返去問我退款定換 已經比佢嚇鬼死 所以退款算隔咗半個月 今日先敢再食 都係外賣 個湯本身係雞湯 但竟然比咗淨熱水我 好離譜 非常失望………………………….

🔖 西式早餐係好多香港人嘅選擇，除咗一般連鎖兩大快餐店，其實敏華冰廳喺香港亦有好多分店，主打公仔麵早餐 💬 沙茶牛肉公仔麵 拼煎熟雙蛋及歐式軟多士雙蛋嘅份量非常之大，大到鋪滿左大半個碟，比起其他茶餐廳算係幾有心，軟多士呢亦都好香脆，搽埋牛油之後外脆內軟，早餐一定要食返一塊。另外呢沙茶牛肉公仔麵嘅湯底沙茶味好香，餐廳用嘅係出前一丁麵底所以佢嘅索湯程度會比普遍嘅公仔麵好，所以每一條公仔麵都可以吸收到沙茶湯底嘅精華，同埋一碗麵牛肉份量呢都算合理，大概都有7至8塊牛肉，淥得有少少偏老，但係我覺得以普通茶餐廳嘅早餐來講算已經係合格有餘。

餐室的內部環境狹窄，枱面的面積較小，勉強足夠可以擺放兩份早餐。早餐有十多款，價格介乎於34元至42元之間。歐式軟多士是厚多士，外脆內軟。牛油是獨立包裝，清潔衛生。炒滑蛋是半熟的，口感滑溜，美味。煎荷包蛋兩隻，蛋大隻，蛋白味道正常，蛋黃半熟流心。潮式沙茶牛肉公仔麵，沙茶惹味，牛肉不太硬，公仔麵軟硬適中。惹味五香肉丁公仔麵，五香肉丁味道微辣。飲品熱奶茶，茶味濃，口感滑。熱鴛鴦多奶，是我的喜愛。總結：早餐保持水準，美味。

阿囡想食菠蘿油,咁啱去德福驗眼,就陪佢去敏華食,平日嘅時間去食個下午茶唔洗等位入到去叫我用QR code 落單, 但係入到去係好多嘢都冇得落單,都係叫侍應落,攞嚟攪菠蘿油嚟到菠蘿包都係叫熱同脆嘅,但係好奶酥味咁我就叫咗個蘇皮蛋撻,皮唔蘇蛋唔香,唔知想點再加個下午茶餐,我最會嘅西多士,但西多士超失敗,冇花生醬,同埋超油,食完直頭想講粗口,嘥我quota 總之就難食,根本就係貴到一個點同埋唔值呢個價錢,冇乜嘢都唔會再去

話說2022年1月5日於九龍灣德福敏華分店食中午飯，平時每次經過都見好多人排長龍等位，因為番工響九龍灣番13:45咁啱今次經過見有位又唔駛等咁就入去試吓，坐低時間中午12:45，用手機掃枱面QR code落單，揀好晒之後就按確定點餐，落單後12:50，點知坐到13:10都未有嘢食到發覺唔對路就睇吓落單有無問題，見”處理中”就問侍應，侍應用佢部手提落單機查完話我無落單，令我足足白坐20分鐘，浪費我嘅食午餐飯時間，無耐無時間再重新叫過又再等，就算再叫嚟到都差唔多夠鐘番工，搞到求其響附近食個包就算！！！估唔到咁多分店嘅敏華個落單系統咁垃圾！！！以後都唔駛旨意再去食午餐！！！無下次！！！

從來冇食過咁多油同咁難食嘅西多叉燒飯D叉燒好瘦好瘦，最大問題係燶吖嘛……今日食呢兩樣嘢真係不知所謂！價錢又貴，嘢又唔係話十分之好食，入面D樓面態度又唔好，下次都唔會再去囉！

經常黎到九龍灣敏華食，未有qr code 果陣叫店主落單都叫好多次先應，回應左轉頭黎，轉頭又唔記得。落左單之後 一係杯野好早黎到 ，食完啲多士蛋個麵都仲未黎，總之每食兩次就會發生一次，要不停咁催。催啲呀姐就正如另一個評論咁啲呀姐會嫌棄。到轉左用qr code 之後，有時電話響接緊電話，示意姐姐幫忙落單，佢地又好惡咁要人用手機落，（如果我唔係講緊電話就唔會叫姐姐落啦）之後姐姐又會好嫌棄阻住佢咁..如遇到啲大叔 佢地又會好主動咁落單。對後生既就大大聲聲。其實貴公司整喱個qr code 落單都係哂鬼氣，整完啲姐姐亦唔會得閒左咁，就算轉左code 叫呀姐比杯熱水每次最少都要叫兩次先攞到杯水，總係好似好忙咁.把聲又嘈，既然貴公司咁多人幫襯不如請多個人手最實際啦！

每逢星期六日去德福到食早餐就會見到呢間茶餐廳都大排長龍，呢度最大嘅賣點就係佢會即製麵包🥯有時間唔中都會企喺度睇吓師傅整麵包。今次我就食咗佢哋嘅菠蘿包，外皮夠晒脆，入邊又唔算係空心包，最重要係佢嘅味道唔算太甜同埋新鮮出爐，真係幾好食，下次可以再試吓多啲嘅菠蘿油，越邪惡嘅嘢真係越好食。另一款就係佢哋嘅沙嗲牛肉出前一丁，沙嗲味非常香濃， 花生味重，牛肉份量麵算多嘅撈埋一齊食味道啱啱好嘅。奶茶就不過不失。

提提大家，這裡是qr code 落單，自己落單好啦！ 唔好搵亞姐！ 否則未食就會有氣其實食過多次，次次都是食同一樣 - A7餐 - 豬膶牛湯米 + 炒蛋多士。豬膶好食，大塊、又有厚度又爽，牛肉ok, 個湯有薑味（但可以再重些薑味），而且個湯好有細個嫲嫲煮豬膶水的味道，所以都喜愛久不久去食一碗回味下兒時。所以湯係必會飲晒的。炒蛋中規中矩啦，多士可以的。而這裡的杏仁霜係唔錯的，又係濃味的。因無諗住出post, 所以開頭無影相，就俾食完的相大家睇啦咁做咩最後要寫呢？ 係因為這裡的亞姐，由帶位就開始晦氣，我自動波未叫入坐就掃定安心又在佢面前do 溫度，但佢就當客係佢心內條蟲，語氣係嫌棄我哋行得慢、唔配合的感覺，所以作為客一開始就會有點不是味兒！所以勸大家自己do枱的qr code 落單，轉咩都得，免叫極都唔幫你落單，或回一句qr code 落單，或幫你落單時嫌棄你煩。搭枱2-3組在4人枱，有時亞姐上菜會是但放低，要客人自己領回，客人變傳菜。所以食物ok, service就唔好有期望。管理層見到post就搵人微服下就知㗎啦！

外買叫左沙牛面拼雙腸，腸不見了，變左米粉！還給我配個雞湯底！什麼鬼餐廳，樣樣都是錯的！打去問，又説再拎落去給她看，又來又回都吾洗食啦！這種服務態度，一定無下次。

之前有買過冰火菠蘿油, 菠蘿油係熱的, 牛油係凍的, 雖然個菠蘿包普普通通, 但熱包加凍牛油係無得輸的。但今次買, 個包好明顯無整熱到, 只係加左舊牛油落去。個包凍食已經麻麻地, 仲要成個凍的比我, 唔明點解叫冰火菠蘿油。𣎴如就咁叫菠蘿油, 等我唔使有期望。 超失望

好耐冇去過敏華，今日早上去食，入到去落單，店員叫我們用QR落單，起初我覺得進步咗，但係點餐的時候，我發覺係找不到麵包選項，後來我叫了個沙茶牛肉麵早餐，我朋友叫咗一個沙茶牛肉米粉早餐，鹹牛肉蛋三文治，到上餐的時候，我發覺牛肉非常少，只有四細片，我好奇問店員，點解份量少咗咁多，店員好識做人，立即在廚房俾多少少沙茶牛肉我，但係個鹹牛肉蛋三文治，非常失色，用隔夜麵包都不凸止，佢只係用蛋包住鹹牛肉，不是溝埋一起煮，味道相當之怪，好老實，如果你張服務質素提升了，然後把食物質素下降，這樣會令間餐廳口啤變壞，這間餐廳係我眼中，是一間好有潛力的餐廳，希望你們能夠改善一下!。

叫左3個常餐同2個菠蘿油，菠蘿包好脆，夾埋牛油食好正，好邪惡🤤五香肉丁麵同沙爹牛肉麵就正正常常，我比較鍾意佢個五香肉丁，辣辣地，而且都幾欣賞佢個炒蛋，蛋味都幾香同炒得幾滑🤩

敏華嘅早餐去到12點，啱晒平時晏左又想食早餐嘅我！呢日嗌咗忌廉雞湯火腿通粉拼炒滑蛋烘多士，跟餐包熱飲一杯。▪️忌廉雞湯火腿通粉拼炒滑蛋烘多士套餐 $39因為我係嗌外賣，通粉同火腿會分開上，唔會浸到淋哂👍🏻湯底係用上香濃忌廉雞湯，通粉索晒雞湯嘅味道，食完一口接一口😋略嫌通粉嘅份量有啲少，食完都係唔夠飽。炒滑蛋非常嫩滑有蛋汁，而且有濃郁嘅蛋香，一流👍🏻烘多士好特別，係厚身嘅白麵包，面頭烘到脆一脆，入面非常鬆軟，搽埋牛油食非常香口！📍敏華冰廳Men Wah Bing Teng九龍灣偉業街33號德福廣場一期1樓F28號舖