尚館活魚刺身火鍋 (已結業)

以前食過好幾次一直印象唔錯，今次去發現間舖似乎轉左手而且真係差左好好好多。😡朋友請食飯7點左右去到，見到樓面只係得兩檯人仲有成個海鮮魚缸係空嘅已經覺得有啲怪，然後入到去坐低開始叫野食先知道真係中左伏：1) 個餐牌叫十樣冇九樣 - 呢間舖本身出名做埋剌身，我地入到去坐低諗住即刻叫盤剌食，落哂單之後一直等左半個鐘，然後侍應哥哥行入嚟話啲剌身呢樣冇個樣又賣哂，叫我地應該下次打電話嚟留定貨，大佬啊家陣7點幾現場得個兩檯人你同我講話啲嘢賣哂，就算冇剌身其他火鍋餸都可以冇哂？貴店係咪諗住做到7點就收工大吉？另一個🔥位係，你啲嘢賣哂又唔一早講，我地落左單，然後你每15分鐘就行一行入房話乜乜乜已經賣哂，係有係冇你應該一早知，咁嘅態度我只諗到兩種情況，一係就係你間舖本身唔夠貨諗住即刻出去街市或者搵行家買但又買唔到，一係就係你將本身留比我地嘅比左另一檯人，然後又求其拎幾樣嘢入嚟敷衍我地，但冇叫過嘅我地一定唔會要！2) 當啲客白痴 - 冇剌身食唯有用佢「僅有嘅」食材打邊爐，係咁催佢上碟鱔片，個傳菜拎左入嚟結果係一碟脆肉鯇，你係咪當啲客白痴，定係諗住啲客太餓一定會照食？叫個部長入嚟，佢一睇知道衰左就尷尷尬尬地問我地可唔可以要埋佢，然後隔一陣又扮哂無知地拎返碟鱔片入嚟話原來個傳菜搞錯左，仲要再三確認問我地係咪可以計埋碟脆肉鯇嘅錢落張單度，個下真係扯火所以我地都係冇要到碟脆肉鯇，但我估佢轉頭都係拎去比其他客食。3) 衛生問題 - 打緊邊爐有位朋友突然話咪住點解個鍋有點黑色嘢浮浮下仲要有腳，撈起嚟睇確實係昆蟲，大家嚇一嚇即刻停哂手然後又係叫個部長入嚟，佢都冇講乜直接就拎左盆湯底出去，然後轉頭拎返啲渣入嚟話係我地搞錯左，佢話個粒黑色嘢係藥膳湯嘅花蕊不過都會照換過一盆湯底比我地，我頂你花蕊竟然會有腳你係咪真係當啲客白痴？4) 唔小唔做嘢 - 7點坐低點嘢食，叫左三文魚，龍蝦同象拔蚌剌身一直都唔上，然後等左個幾鐘先拎隻生蚌入嚟話而家切好快搞掂，結果係9點差不多打完邊爐都冇出現過，中間我地係咁催佢就一直話加工緊加工緊，我都係個句，全場得個幾檯人你咁都做唔掂到底你廚房有幾多人做緊嘢？等到9點幾我地已經冇哂心情話cut單唔食啦，當下個部長先知事態嚴重，然後轉身出去5分鐘左右拎左盤三文魚加龍蝦剌身入嚟話叫我地唔好嬲食住先，但最恐怖嘅係盤剌身啲冰已經溶左一半下面個玻璃盤成兜水，講真盤野都唔知擺左幾耐，身為部長你咁都可以照上比個客？我應該話你粗心大意定係又當個客係白痴？咁嘅質素我地當然冇要，之後佢不停求情話收收平啲叫我地要埋，見我地無動於衷又改口話收半價，老實講剌身呢啲高級食材本來就應該小心處理，新鮮乾淨係最基本要求，你盤野擺成個幾鐘先拎比我然後話收半價，算罷啦你送比我都唔要免得你話我地𢱑著數！5) 態度問題 - 其實個部長我地都好同情佢，因為做樓面好多嘢都唔係佢控制但佢一定係第一個比人鬧，但我覺得知衰就要認而且識得補鑊先係做部長嘅職責，唔係每次見個客係度小先係度sorry sorry然後又唔做嘢最後先出嚟求情，坐左成晚我淨係覺得比人玩，我都問到出口話點解你地成個場咁少人都搞成咁？阿部長竟然又口快快答錯話因為隔離房有檯大客係咁催所以做左佢地張單先，okay啦咁你繼續照顧你檯大客啦最好送埋碟過期剌身比佢地食，希望貴店淨做佢地一檯都揾夠啦因為我地真係以後都唔會再嚟！抱歉有啲位因為當下太嬲所以都冇乜影相留證據，我朋友好似影左隻昆蟲我睇下之後可唔可以補返張相比大家！* 深夜因為肚痛瞓唔著先打左一大編食評，但點解會肚痛我已經唔想再深究😑…查看更多

完全唔可以接受嘅食肆。19:00到食火鍋，先嚟一隻細曱甴係爐具走出嚟！算！明白好難避免。叫左食物，20:00先上到湯底同一碟牛肉，到21:00經多次投訴先上山筋、響鈴、蘿蔔，比多十分鐘時間佢，都係無野食，餓到連湯底皮蛋同芫荽都食埋都係無野食。唔會再有下次，不過佢都應該就執笠…查看更多

之前見門口貼了可以6人一枱，專門今天5人來飲早茶，點知等到位後卻要分2枱，職員說只可4人一枱，需然安排了隔離枱，但始終來這裏是為了見可以6人一枱才來，不然可以選擇其他餐廳啦。詢問又拒絕把門口通告除去，全心誤導吸引人流？？？…查看更多

母親節，開頭打電話去book話有998套餐（象拔蚌2斤，章紅三斤，牛魔塔)去到話冇（母親節唔緊要）散叫，象拔蚌498$一條，跟住話6個人加100要斤半先夠食（母親節唔緊要），我問佢一條章紅幾錢，佢話一條498$我叫一條，佢話一條好大條，要半條夠食，（唔緊母親節）埋單2320$當然有酒水其他，但條章紅半條都系498$，我問佢點解，佢話當例牌，不能盡錄,自己睇，謝謝…查看更多

又食火鍋喇，十日內已經第三次，肥死了。今次黎到街坊商場內嘅尚館，第三次幫襯，因為係質素唔錯嘅海鮮火鍋放題。 每人有一份海鮮一份靚肉一份刺身，其他配料（有脆鯇鮮牛等）都係任點任食，保證食飽飽！龍蝦係非常新鮮彈牙，應該係個龍蝦魚缸啱啱拎出嚟，非常正！服務非常貼心周到，主動加湯問你要不要飲品（任飲）同非常勤換碟，個個都係好笑容都好親切，係五星級服務態度，讚👍🏻👍🏻👍🏻…查看更多

自從上次撻著左副偈,一直都搜羅緊仲有咩類似既好地方餵飽個胃經同事介紹黎到呢間都幾偏既打邊爐, 係環宇海灣後面既海灣花園入左去又係番唔到轉頭,短短一星期食左2次第一次食係父親節(16/06),叫左隻3斤澳洲藍龍(要預早3日留) 好大隻!味道冇想像中咁鮮甜,不過都好食,3斤都係1900! 抵!鮮味十足!都係568!WELL,其它野食我都冇影,無咩記憶,因為眼中只有刺身父親節5個人去食,全部散叫,全單3931,想過口癮既呢間係唔錯既選擇第二次同友人撐枱腳,今次人少少叫左個海鮮火鍋半放題套餐平!靚!正!下半PART任食上面係2人份量(由廚師大佬執),全部都有驚喜,特別係海鮮全部都好新鮮,原來泥鯭打邊爐都幾好食食完呢度都半飽友人未試過,專程黎食龍蝦刺身南非龍蝦仔唔好睇佢細細隻,味道竟然仲鮮過3斤個頭當然唔好SAI,呢個咁細隻唔建議椒鹽,將D頭頭尾尾擺落去淥黎食都好正,勁多膏後尾追加個帶子,又係好鮮成餐飯都好滿足,2個人食左$8XX環境-闊落,坐得舒服食物-高質素海鮮價錢-抵食…查看更多

十足料火煱，牛肉粒超正,三寶丸超新鲜，價錢同料出面起碼貴一倍，不用排隊，樣樣新鮮，雖然餐廳樣子老土，不過講實力。之前都唔想試，不過近屋企，試過一個月食咗3次年。希望多啲人黎，等佢做長啲，我應承一個月最少黎一次…查看更多

Lunch hour 與同事一行四人到海濱花園食lunch，本身不是打算食這間餐廳的，但經過時發現了這間未見過的餐廳，於是決定一試。餐廳環境高貴典雅，令人仿佛置身於高級食府中。餐廳設有set lunch，食物選擇算是多。我們點了三文魚三色刺身丼、三文魚海膽丼、日式咖哩牛腩飯及日式黑豚肉飯。三文魚丼飯的比例比材料多很多，而且刺身味道較淡；咖哩飯外型不錯，牛腩味道不俗，唯咖哩味道不夠濃郁；豚肉飯則比較普通，但也不過不失。整體而言，尚館活魚刺身火鍋的環境高尚，但午餐的食物仍有待改善。…查看更多

探朋友剛好入來海濱花園這邊，於是想穩個環境好少少的地方聚聚舊食下dinner，環境坐得舒服，傾計自由啲就十分滿意了！咁岩係openrice “look”到“尚館活魚刺身火鍋”聽個名都夠曬新奇！活魚刺身喎！評論就真係幾少，但環境好似唔錯，食物相又幾精緻，咁我就本住勇於試新野嘅精神，拉住我果位對宜間新店信心不大的朋友入黎試下啦！一到門口忍唔住影相，哈哈哈哈哈呃like專用！紅色地毯，黑色sofa椅顯得個場都幾high class嘅～我同朋友一啲人就食得辣，一啲就唔食得，好彩宜度大枱有兩個鍋選擇，唔洗就黎就去。我自己好中意食辣，一邊就叫左個重慶麻辣鍋，覺得個麻係好香之餘係香港人都接受到嘅麻辣鍋，如果食得辣真係可以試下！另一邊朋友叫左海鮮鍋，入面竟然有係有魚、海蝦同蟹仔，呢個係最驚喜既，真係名副其實落足料。叫完湯底之後，有位經理好熱心提醒我地豉油碟可以落啲調味料，有多款調味料俾你自己加，放得整整齊齊又企理，唔錯。講返啲料，打邊爐第一樣嘢梗係食肥牛，呢間值得一讚既係佢用新鮮本地手切肥牛，色水靚、牛味特濃、好快熟，趁熱放入口食個下真係好正！我同朋友人少少都食左好多！仲有見佢有美國桶蠔，當然要食返夠本！隻隻都好肥，新鮮。原本食之前都好擔心有腥味會臭，之前係其他地方中過太多次伏，但佢呢個又唔會喎！所以我個人都幾中意呢個～朋友就好中意食鵝腸，呢個真心唔係間間都有，有都未必好食，但呢間竟然有，朋友二話不說就叫左黎試，我原本又係唔太敢試，但見佢粉紅色又幾新鮮，所以最後都試左，個口感比我原本想像中好好多喎，而好快就食得，太耐就Un喇哈哈～最後想講係呢間既服務誠意真係好好！佢好多都係自家製材料，佢啲四寶丸全部都係手打、新鮮足料，食落係好有口感，佢啲豬肉韭菜倨餃子又係鋪頭自己包嘅餃子，真係誠意滿分。識食仲要係最後飲埋佢地啲湯底！真係無落味精，奶白色好香濃的豬骨味！我朋友仲話一定要打包走😂服左佢！最後總結就係，環境同服務好值得再入黎食，唔同旺區咁逼咁嘈，唔會俾人催/趕，特別對於新界人，唔洗出到咁遠都可以享受咁高質既火鍋，簡直係恩物哈哈！…查看更多

前排同朋友係荃灣出來跑步經過海灣商場。見到有間新餐廳，招牌就真係唔太覺眼，但見到有日式刺身又可以打邊爐，環境又幾闊落，所以今日約埋班中同學仔一齊過去試新野！我地8個人坐咗張大台，餐廳入面嘅 sofa 櫈坐落去都幾舒服。入到來第一時間見到有加拿大象拔蚌優惠$498！我地都好好奇點解咁平二話不說即刻點左條試下。試左第一啖，好甜好爽口！係出面八百幾蚊嘅質素！認真抵食！每台限叫一條，唔叫就笨啦！加埋個海膽刺身一齊上。之後湯底叫左沙爹鴛鴦同埋麻辣拼香茜皮蛋鍋。一半濃味一半淡味，火鍋料的香口同新鮮原味都可以試到。本地手切肥牛好新鮮👍🏻牛味好濃，肥瘦都啱啱好。佢地嘅水餃皇同野菌餃都幾正，足料同埋夠新鮮。店員好熱情同我地講係師傅自己手包嘅。我地掛住食同埋傾計，其他食物好多都無仔細再影，但睇得出廚師嘅用心同埋食材新鮮！本身無打算留言，但打開openrice見到咁好的服務同餐廳被樓下的食評影響曬形象，真係鄧佢地唔抵，所以我地成班friend都話要為佢地平反一下！服務態度咁好的餐廳被一位已經離職的員工影響聲譽真係認真唔公平！我啲同學仔都話要幫手post 上Facebook宣傳下佢地哈哈！可能新開張暫時未有人知，但環境同服務就真係無得頂，我地睇唔明白餐單上嘅食物店員都好耐心解答，有時仲同我地講下笑。過幾個星期有個同學仔差唔多生日，佢地仲好nice咁同我地講免開瓶費同切餅費用，下次有同學聚會我地帶埋蛋糕過來飲翻杯！最後店員歡送我地離開，大家呢餐飯都食得開心又滿意。…查看更多

今天家人因些事誤會去左尚館。我到達後，向那位男經理作初步了解。在整個了解過程，男經理的態度極不像一個有經驗的經理，反而黑面走開，不理此事。我明白整件事係一個誤會，但身為一個經理用以甘既態度對待客人係絕對容忍唔到。當然我地全家都無係尚館食午餐，走前我只係向另一位職員說經理的態度好有問題，反而那位女職員向我道歉，我替這間新開業既餐廳，請到甘既經理而可悲，俾幾多錢我都唔會去試。說真，一間幾好食既店鋪，如果令到客人食都未食就已經甘不滿，真係食完都嘔番出黎。…查看更多

上個月頭屋企樓下開左間新餐廳，尚館活魚刺身火鍋。聽落去仲以為係用刺身來打邊爐問翻員工原來唔係！係既可以刺身，又可以打邊爐！好似日頭仲有點心、小菜、粉麵飯。環境都幾舒服，卡位有成張梳化坐，上次仲同仔仔一齊坐魚缸邊睇魚魚添！仔仔見到d魚都好新奇，掛住睇魚唔食野我果日同老公仲有班姐妹一齊落黎，8個人去坐獨立廳房睇埋TVB，食左兩千蚊左右。人均大約$250蚊一位，同放題差不多，但食物水準絕對無得比～貴精不貴多嘛！極力推介本地手切牛肉，象拔蚌刺身、同生蠔！d刺身真係幾鮮甜，牛肉又切得夠薄，一碌轉色就食得！之後唔洗成日揸車出去都可以食好野…查看更多