小野人 (MONTEREY Place)

营业中

休息中

同老婆約咗朋友在將軍澳點知畀人放飛機。 行過見到間餐廳好似都整整齊齊就入去試下，門囗個waitress 好主動走出嚟打招呼。好啦就試下啦， 入到去 望下週圍環境好似都ok， 因為太肚餓基本上冇乜點睇就係咁點🤣入到去叫咗豬頸肉雞翼蟹柳韭菜同埋邪惡嘅 撈麵，豬頸肉都幾彈牙， 其他串燒例如蟹柳雞翼牛舌韭菜等都ok。越食越過癮再叫多咗份雞翼， 燒得唔錯，幾香口。我經常講在餐廳食嘢除了食物，就是態度。 啲員工都幾好禮貌，環境企理，味道都ok。啲嘢飲都唔錯，我哋飲咗一杯超大杯森林水果茶， 幾飲賣相都唔錯👍我認為呢度性價比都幾高，值得「返啅」。

帶個幾個月BB到餐廳食飯明明都放好BB車係BB車對面留好上燒烤位可能因為BB車個位有第二台客個侍應就貪方便喺BB車隔離向我哋同第二台上菜當時我已經反映咁樣十分之危險，我都預留咗空間俾佢鼻哥我的BB車上菜。向他們投訴，他們那位負責收銀有貌似阿姐的人完全態度惡劣地對待我們，話咁危險就唔好帶小朋友過嚟食。但實際上就讓我上面提及，以預留一個安全的位置給他上菜，他偏要貪方便，即刻惡人先告狀人品及心地差到極點，奉勸大家真的不要幫襯，有錢都唔好俾呢班垃圾人賺

店舖經理服務態度非常惡劣，小朋友想飲士多啤梨奶奶，但貴店已賣光，只是自帶一包奶昔，做完經理的呼喝，還經常望着我們，我好想做賊一樣，這樣的態度，在香港怎樣生存？食物質素一般，價錢不平，難怪香港人都北上消費了。

有日路過見到餐廳裝收幾好, 就搵日去左食比較早去到, 無訂位都安排到位置 電話下單, 餐廳服務員服務 非常之差 叫左幾樣野食酸辣粉 - 有落花生呀, 不過"益" 既, 叫佢地黎睇 叫足幾次, 叫佢入廚房試, 試完當無件事, 再叫佢黎問佢有無試, 係咪有問題, 又再搵主管, 攪左好耐先退番羊肉排 - 比較瘦, 都可以既, 不過非常重味精, 食完係咁飲水串燒 - 都係味精重飲品 - 平均都偏貴最後總結: 服務差 味精重 食完飲番幾日水會唔會再食? 一次就夠了

我哋成日都幫襯。 吾係第一次帶BB車去食。灰色衫嗰位manager見到我哋為餵緊BB，佢都依然堅持喺嗰個位度上菜，差點整親我哋BB。事後仲堅拒唔道歉。態度惡劣，擺明係因為我哋帶BB車黎，覺得我哋阻住佢做生意。我哋買單嗰陣時候，呢位灰色衫嘅服務完仲夠膽死黑我哋面。呢度都好多comment話呢間野服務好差，竟然冇深造落去，不如執咗佢。唔怪之得，而家個個都上深圳消費，起碼人哋啲服務態度好，唔使食飯都要受氣。

行完Donki之後，就行咗呢條食嘢嘅街，見呢度開咗間有串燒嘅嘢食就試吓😋叫咗唔同嘅串燒包括有雞肉、雞翼、牛舌、土豆🥔、雞軟骨，味道都幾好食，如果串燒份量可以大串d更好，另外仲叫咗薯條同埋酸辣粉！D staff 服務很好，環境正！

星期日既中午2點幾，一個人帶住剛3歲既小朋友黎食！當時餐廳有幾枱客但說不上是爆場忙碌！食到差不多最尾，叫侍應幫手斟杯水。佢叫我自己去斟出去水之後侍應走咗出店舖外面講電話！本身以為餐廳是自助形式，加埋當時只係自己一個人睇住小朋友，擔心小朋友坐唔定，所以選擇咗忍住口渴冇出去斟水！但埋單既時候發現店舖需要收+1服務費！當下我即刻問收銀嘅職員，點解要收+1服務費？我搵職員幫我斟杯水佢都唔幫我斟！本人並不介意，要付+1服務費，但我付費既同時都希望收到應有嘅服務！經過一番據理力爭餐廳職員豁免了服務費！想寫一個真正既食評係餐廳食物係茶餐廳質素，餐廳服務係茶餐廳都不如！

太垃圾了，以後不會再光顧 1）自己落單仲要收服務費2）午餐原價去食串燒仲要唔開爐3）侍應面口西 食幾條串燒 不值這個價錢。難怪啲人返曬大陸消費，一點也不值得！如果大家想食呢間嘢，請三思！

真係嬲鬼咗 今晚突然間想食多春魚，專登擺低個仔同老公一齊去食 多春魚一碟得三條 我食咗第一條 完全0春 ，再食第二條用筷子篤開嚟睇 又係完全冇春，另一條老公食咗就話得極少春，忍唔住問店員究竟係咪多春魚嚟？我唔介意叫多一碟 但會唔會又係冇春😰？得到嘅回覆係「條魚叫多春魚 但唔肯定一定有春」大佬 三十幾蚊碟得三條 竟然可以有兩條完全冇春 呢個根本係食材質量問題 呢道菜根本唔應該存在喺餐牌上囉😔之前幫襯過幾次都幾好食 但今晚所有食物都強差人意 冇下次👎🏻

隱藏於將軍澳海濱長廊附近的MONTEREY Place，是一間又一間的美食餐廳！當中主打夜市風味串燒的「小野人」，除了各款肉類、海鮮及菜類串燒外，亦有麵類主食選擇；桌上更有小爐一直為串燒保溫，十分適合與朋友聚會！🦪蒜蓉烤生蠔 ($38)：生蠔大隻肥美，配上蒜蓉極之惹味！🍆芝士蒜蓉烤茄子 ($48)：芝士與蒜蓉的配搭挺特別，茄子口感軟腍！🍢烤牛舌 ($28@2)：牛舌烤得偏熟，口感有點硬身！🍢Q彈小豬頸肉 ($42@6)：豬頸肉薄切，烤得較熟，口感同樣偏硬！🍢烤雞肉 ($28@2)：雞肉熟成度掌握得比較好，肉嫩入味！🍢烤娃娃菜 ($18)：調味粉較多，味道微辣，食完會有渴的感覺！🍢烤台灣小香腸 ($18)：不會出錯的台灣腸，十分美味！🍢烤雞翼 ($28)：烤得剛剛好，入味十分！🍢烤洋芋片 ($18@2)：烤得香脆可口，有食薯片的感覺！🍜重慶酸辣粉 ($45)：不算太辣，份量足夠2人分享！

烤牛舌（2串）$28食串燒就會叫幾爽口，偏薄身，大塊啲就好～大漠烤羊肉串（5串）$48烤羊肉串係食燒烤一定要食🤣烤小牛肉（5串）$48有牛味，有5串都幾抵食🤣比羊肉細少少，但都算抵食烤雞脆骨(2串）$28正常發揮～脆卜卜送酒一流清酒煮蛤蜊（1份）$68食到蜆嘅鮮味，算幾清甜蒜蓉烤鮮蟶子（1隻）$46蟶子幾彈牙，幾正😙不過偏貴重慶酸辣粉（1份）$48略嫌唔夠算，粗薯粉幾彈牙👍🏻飽肚之選原味乳酪奶昔 $40少少甜，又解辣，似稀身嘅酸奶我好中意飲😋😋唔太食得辣嘅我叫BB辣😂都夠辣了同埋會有個爐熱住啲嘢食👍🏻，但最好唔好一直擺住係度，熱得耐會乾～

同朋友喺調景嶺體育館打完羽毛球，朋友話想食燒烤，咁我就諗起呢間小野人，如果喺調景嶺行過去就大約15分鐘，舖頭位置有啲遠，但係為咗食好嘢，行遠少少冇乜所謂，其實之前都食過，今次朋友話想食咁就帶佢試吓啦，落單方面，佢哋就係用自助落單，所以唔使怕落錯，同埋佢哋上嘅速度都好快，食物質素方面呢，食物嘅溫度都仲係保持得好高水準，佢哋最細心嘅地方就係會用一個熱嘅爐，幫你暖住啲串燒，唔駛怕啲串燒凍咗唔好食，同埋呢度抽風都做得唔太差，唔會好大煙.鋪頭主打川式串燒，串燒真係燒得唔錯，而每串份量都唔算太多，而我自己就推介金針菇牛五花卷和香蔥豚肉卷。香蔥豚肉卷就喺將香蔥和嫩豚肉卷放埋一齊烤到外酥內嫩，口感豐富，而金針菇牛五花卷就喺將金針菇同埋嫩牛五花肉卷放埋一齊，經過烤製後呢，肉質鮮嫩多汁，而金針菇同肉質的鮮美完美組合.同埋店舖嘅擺位，都令到人坐得幾舒服，唔會好大擠迫，但係就要早啲去攞位，如果唔係晏咗就會好多人.

話說有日平日去食lunch, 兩個人叫左一個lunchset再加一堆串燒，話曬呢間嘢都係出名串燒。上次食覺得唔太飽，所以今次就叫一人份lunchset墊胃。後來見佢每份串燒上菜所隔嘅時間有啲耐，過往經驗呢到嘅串燒都好快變涼，所以就問佢可唔可以俾個保暖爐。我地諗住如果唔夠就邊食邊叫，點知店員一開始唔肯比，話我地叫得太少，然后我地同佢講想邊食邊叫多啲串燒，想食物保溫，佢拎完比我地之後黑面黑到我地走，整個用餐體驗好差。佢味道唔錯，但係份量少，性價比低，加上當時全店只有3枱人但全店嘅員工都係黑口黑面咁。如果係一樣價錢，有好多其他嘅串燒店選擇。

烤肉串位於我居住的附近。首先，我嚐了大漠烤羊肉串。羊肉不會有羊羶味，烤至外酥內嫩。每一口都散發著濃郁的肉香，令人垂涎欲滴。接著，我品嚐了烤牛舌。牛舌經過精心處理和烤製，質地細嫩，口感十分頂級。肉質的鮮美和烤焦的香氣相得益彰，令人回味無窮。我也試了了金針菇牛五花卷和香蔥豚肉卷。金針菇牛五花卷將金針菇和嫩牛五花肉卷在一起，經過烤製後，肉質鮮嫩多汁，金針菇的脆勁與肉質的鮮美完美結合。香蔥豚肉卷則是將香蔥和嫩豚肉卷在一起，烤至外酥內嫩，散發著誘人的香氣，口感豐富。另外，他們還有Q彈小豬頸肉。這道菜使用優質的小豬頸肉，經過特殊的處理和烤製，肉質鮮嫩有彈性，帶有濃郁的肉香，讓人愛不釋手。最後，我試了烤娃娃菜走辣。娃娃菜經過烤製後，保持了脆嫩的口感，並搭配了辣椒調味，增添了一絲辣味的刺激感。

這家餐廳位於將軍澳，是少有的燒烤店。首先，我點了清酒煮蛤蜊。這道菜以清酒為基底，將新鮮的蛤蜊煮至鮮嫩，帶有一絲酒香的味道。每一口都散發著海鮮的鮮美，令人回味無窮。接著，我嘗試了墨西哥烤玉米。這道菜以新鮮的玉米烤至金黃色，塗上特製的調味醬，然後灑上芝士。玉米的甜味和烤焦的香氣在口中交織，給人一種獨特的口感。我也品嚐了烤新鮮臭豆腐。這道菜將臭豆腐烤至外皮酥脆，內裡仍然保持著豆腐的柔軟口感。另外，我點了重慶酸辣粉。這道菜以傳統的重慶酸辣湯為基礎，湯的酸辣味道與麵條的彈性相得益彰，帶來一種獨特的滋味。還有奶油烤小饅頭，小饅頭經過烤至外酥內軟，表面抹上奶油，再撒上芝麻。每一口都散發出奶香和芝麻的香氣，給人一種濃厚的口感。最後，我試了蒜蓉金針菇，金針菇鮮嫩多汁，蒜蓉的香氣與菇類的鮮味相得益彰。而KOKA麻辣薯條則是一道辣味十足的小吃，薯條外酥內軟，配上麻辣調味，非常開胃。