影片
减完肥之后我又多番quota四周围搜寻美食😛前几日阿哥话佢喺元朗食咗一间新开仲试业紧嘅小店，话佢炒饭好正就介绍俾我，点知我一食真系返唔到转头，仲一连帮衬咗佢几次，要知道我呢啲淀粉质怪最钟意嘅就系食炒饭饺子呢啲食物，我钟意食炒饭嘅程度系一日三餐食炒饭都唔厌，我仲有加入咗炒饭关注组添㗎🤣.呢间新开嘅小店叫做寻味润饼，新到OpenRice我见佢呢两日先啱啱有，呢个月佢仲做紧试业，招牌嘅红纸都仲未搣落嚟，我见佢个名虽叫做润饼，以为佢系食台湾嘢㗎啦，点知佢原来广东炒饭炒粉面呢啲先系佢嘅招牌菜，润饼都暂时未有，而且佢系主要做外卖Takeaway，位于元朗世宙入面一个小舖位，所以小店细细非常唔起眼，不过我就见到佢门口已经好多人帮衬，果次我就听阿哥讲完去买佢嘅炒饭嚟试下啦，点知我一试真系不得了！😍.其实佢嘅食物真系唔多主要得几款嘅炒粉饭，分别系家常炒饭，咸鱼鸡粒炒饭，扬州炒饭同埋家常炒米粉，另外佢仲有一啲炆鹅或者炆猪肉嘅饭，不过我就主要试左佢啲炒粉饭，之后有机会再试佢嘅炆鹅同炆猪肉。.我第一次系试佢嘅一款叫家常炒饭，一打开个饭盒已经俾个份量吓亲，$42即叫即炒嘅炒饭竟然装爆一个饭盒，劲大盒！而且佢做好细心喺饭盒上面整个窿透一透气，因为佢即刻炒好真系好热好够镬气，佢嘅家常炒饭嘅材料油肉片，餐肉，红萝卜，蛋，葱花，材料虽然简单但师傅好有技巧咁炒到啲炒饭粒粒分明，而且唔会太干身，仲好有镬气好香，材料嘅比例亦都好平均咁分布系成个炒饭，令到每一口都有炒饭之余又食到唔同嘅材料，而且呢个家常炒饭仲有少少辣味，我估系佢哋自己屋企嘅口味，我觉得非常之惹味，如唔食得辣可以同佢哋讲走辣。不过真系好耐冇食过咁有镬气同炒得咁好嘅炒饭，而且重点系只系卖$42😱即叫即炒㖞，仲要咁大盒咁好食㖞，性价比同个美味指数都非常之高！👍👍👍😍所以果次我帮衬完咗之后一直念念不忘😋.所以之后仲陆续去食咗佢几次，我再点咗佢嘅家乡炒米粉，咸鱼鸡粒炒饭同埋扬州炒饭，基本上已经试晒佢嘅炒粉饭面类，因为佢试业阶段但系都会担心佢嘅水准会唔会系好飘忽同埋时好时坏，答案系，每一次都可以保持水准！👍👍👍😍.家常炒米粉（$42）同家常炒饭嘅材料系一样，只系变咗做炒米粉但一样咁好味😋而且同炒饭一样佢嘅炒米粉非常之干爽而且配料十足，而且唔会好油同埋我钟意佢有少少辣好开胃食唔停！.佢个咸鱼鸡粒炒饭先真系不得之了！虽然比起一般嘅炒粉面饭贵几蚊，佢要$48，不过以佢嘅足料份量同埋即叫即炒来都系抵，其实佢系炒紧嘅时候我已经闻到个抽油烟机几将啲咸鱼香抽出嚟已香到爆！系𠮶只梅香咸鱼嘅咸香味道，返到屋企打开见到，我觉得佢简直可以系叫做黄金咸鱼鸡粒炒饭，因为鸡蛋花包住每一粒嘅炒饭，仲有佢嘅鸡粒非常之嫩滑而份量亦都好多，真系每一啖都有咸鱼，鸡粒，葱花，鸡蛋嘅香味，口感好丰富好咸香开胃，令人忍唔住一口接一口，食完我决定将佢嘅咸鱼鸡粒炒饭放喺第一位！真系要返去encore再encore👍👍👍😋.扬州炒饭亦都系唔错嘅选择配料方面有虾，叉烧，鸡蛋，葱花，红萝卜粒同埋粟米粒，唔好以为佢买$42材料就俾得好少，叉烧粒同埋虾嘅份量都唔少㗎，佢嘅扬州炒饭我觉得色水方面有别于一般嘅扬州炒饭，颜色有啲深，可能系佢哋家常上嘅做法，不过都冇影响因为味道依然系非常之好！.我见佢好似系一家3口经营的家庭式小店，前台会有个叔叔好亲切咁落单，跟住后面厨房个年轻人一收到order就会即刻炒饭，真系俾你见到佢即叫即炒，而且都算快，视乎多唔多人喺度排紧，我帮衬呢几次每次大概10分钟左右我就攞到外卖。.整体来讲我觉得佢哋嘅炒粉饭面无论色香味分量同埋性价比方面都非常之好，冇得输！👍所以下次我经开元朗都一定会去买返几个炒饭外卖返屋企慢慢食😋.而家我见到佢试业阶段都已经唔少人帮衬，希望佢日后正式开业就算好多客人帮衬水准都唔好下降啦，唔系嘅话我就食唔到好食嘅炒饭㗎啦🥲.店名：寻味 地址：元朗安宁路38号世宙商场地下34号舖
继续阅读