影片
每逢星期六／日，都会想去饮茶，因为俾个借口同屋企人坐底一齐食野，一齐倾倾计咁。所以我地都去过好多茶楼。呢间富园丰，其实之前都黎过好多次。不过有一次见转左ｍｅｎｕ同埋又转左师傅，味道变左，所以就一段时间无黎了。刚好今日黎长沙湾买黎，见到个ｍｅｎｕ好似又转左，就再试试啦。最大变化系唔再分午市同下午茶，两个时段都系用同一张点心纸，唔似有Ｄ酒楼咁，午市一个价钱，下午茶会平ＤＤ，但要指定时间入黎咁。我地叫左孖宝＄１１８，可选一款粉面，另加三款点心。上汤焗海虾伊面，奶黄流沙饱，蒸凤爪，菜苗饺孖宝似系最抵兼最饱肚，不过缺点系点心未必样样岩食，有Ｄ难拣３野。粉面就好Ｄ，不过我地想食龙趸蒸饭，但不在ｌｉｓｔ。上汤焗海虾伊面，虾既数量多，面份量都唔少，抵食。不过味道方面，虾都合格，配上上汤，的确不俗。但Ｄ伊面就感觉好似食紧公仔面咁，唔知系咪伊面质素差。三款点心唔记得影相，不过奶黄流沙饱味就最好，真系做到流沙之余，有奶黄既香味，再融入包。凤爪同菜苗饺就不过不失咁，份量都正常。食完以上坐左一阵，见到隔离枱来左个煎堆，搞到我地忍唔到又叫多左份孖宝。孖宝＄28.8。 蟹子烧卖，南瓜炸煎堆南瓜炸煎堆，仲暖既，不过再热Ｄ会更好味。食落脆身，又唔会话太过份油味，芝麻好香，口感一流，系今日咁多种食物中最好味。烧卖唔知系漏单还是等埋其他枱一齐蒸，足足等了超过４５分钟。等到我地都无咩心情欣赏好唔好味了。我地埋单系１７９元，所以茶费应该是８元一位。比我地心目中算用多左钱，哈。其实系我地食多左份孖宝，否则是１４７元就可以埋单。
继续阅读
一班亲友大部分都喺住晌长沙湾一带，所以，做节饭都喺安排晌呢头，近年，食嚟食去都喺𠮶好几家，所以，都少咗写。但今次唔同，表姐拣咗呢家「新酒家」，其实都唔新，个铺位一直喺做酒楼，只喺转名又转名，依家新名字叫「富园丰海鲜酒家」，唔知可以做几耐！酒楼环境如一般酒家，虽然，个场就未吸引到人摆婚宴，但寿宴之类应会有捧场客，皆因啲装修新簇，光猛企理。今次表姐拣呢度，一来就脚，二来主因喺佢哋新推嘅全包宴确喺好超值，就算喺假期，一围都喺$2,288，除匀每人两嚿水都唔使，提早落订仲有烧鸡升级为烧鹅，坚喺俾成只鹅，包12位茶芥连加一服务费，8罐汽水，2支大樽装啤酒。红烧竹笙海皇翅我哋食头轮，估唔到唔喺啲烧味嚟先，一起手喺个翅，当喺广东人嘅习惯，先嚟食啖汤，不过，小弟无食翅多年，就只好睇住大家「起筷」先。个翅份量唔少，分足12碗都喺满碗，而且，用料十足，据大家讲，味道唔错，推得唔会太稀或太浆，但翅嘅份量就肯定有限咯！上汤焗美国龙虾（3只+伊面底）睇样你就知道龙虾无缩皮，坚喺落足3大只美国龙虾，啲钳大大只，够厚肉，又爽口，真喺意外地做得好㖞；至于啲伊面，亦煮得爽身，无过笼煮腍晒嘅问题出现。翡翠虾仁凤片继续保持大份量嘅出品，翡翠就用咗翠玉瓜，都贴题啦，而啲瓜都炒得仍有爽脆感；虾仁既大只，又鲜甜，食得出唔喺雪藏货嚟，而鸡肉亦都嫩口，唔会「嚡烚烚」，整体味道亦无酒楼常犯过咸嘅弊病。鲜淮山杞子浸菜苗再嚟又喺上多一道素菜，呢一味绝对喺健康菜式，因为有齐爽口嘅鲜淮山、木耳，又有少少杞子，不过，菜苗就喺较细嫩嘅白菜仔，配以清甜嘅上汤，其实，用料睇落就普通，但整得唔错呢！清蒸大金花尾趸菜单写得算老实，唔会就咁生猛海鲜，而喺花尾龙趸。睇外型应足3斤重有多，虽然咁大条，蒸得火候啱啱好，无熟唔透嘅问题，中心位一夹就离骨，肉质嫩滑，富鲜甜味，所以话呢，食鱼鲜，都喺清蒸最好。大红衣金袍食到中尾段，先至送上乳猪全体，只猪真喺好「乳」吓，因为睇其身形真喺好细只。师傅手势真喺烧得唔错，外皮十分之香脆，啲肉又无腌过咸；虽然睇落层皮下脂肪唔厚，但其实一口咬落都有少少油腻。日式沙律米网卷有别平常晌酒宴所食到嘅沙律卷，卷身用啲米网做，体形较大碌，入口却松脆不腻，呢一点已予人有个好印象；里面酿入嘅都喺啲杂果沙律粒粒，无话好惊喜，但胜在整体食起嚟有份清新感。潮莲烧鹅皇换咗烧鹅真喺正好多，睇落仲要喺原只狮头鹅，一来份量上就肯定比烧鸡多咗，二来烧鹅味道较特别，又富油香，的确，只鹅都烧得好好食，肉质细致，外皮极之香脆，赞！富豪炒饭最后，一次过上晒炒饭、蟠桃及糕点，所谓富豪炒饭，讲真就有啲似杨州炒饭，加入大虾仁及迷你带子粒，虽讲唔上惊喜，但就绝对炒得有水准，饭粒分明爽身，食到最尾都唔会见碟底有油，啲虾仁又爽，又混了啲翠玉瓜粒，添加咗口感。龙母蟠桃食咗咁多道菜，都觉得班师傅做菜无「求其」，就连呢笼「蟠桃」都做得似模似样。每个包，除满满嘅莲蓉，仲加有咸蛋黄，可以讲喺落足料，包身又蒸得软熟，真喺唔错呀。精美糕点而是夜嘅糕点喺红枣糕，糕身够挺，唔会太过软腍腍，入口带点烟韧嘅口感，最正喺𠮶阵红枣味，真喺几浓郁吓，用料不赖㖞。今晚餐饭，唔止抵，质素更比预期嘅好，除落足料，做菜都有心机。虽然出菜嘅次序有啲乱，中后段嘅时间都慢咗，但啲侍应阿姐经常唔好意思前，唔好意思后，非常有礼貌，唔会好似有啲酒楼咁，认为做节饭喺咁架啦，出菜乱，上菜慢，喺指定动作。
继续阅读