天泰泰式海南雞外賣專門店 (已結業)

一行二人在新北江搵食，以前在樂湖站落車只會直上二樓，突然心血來潮試下行地下的一層睇下有冇新鋪頭開，點知被我地發現到這間隱世秘店。店鋪位置並不起眼，但看見”海南雞”三個字朋友便想起很久沒有食過海南雞飯，抱住陪朋友食飯心態決定一試。店鋪不大，由兩個泰國人及一個本地人包辦晒全店。朋友當然叫個海南雞飯喇，我就試左個咖哩牛肉飯，進食期間我地少有地靜靜吃完自己份午餐，到埋單都沒有兩句，心諗朋友可能食得唔開心。先講自己個咖哩牛肉飯，雖然我唔知係咪正宗泰國咖哩，但送到我面前就知道唔會差得去邊，因為香味四溢。再用匙羹初嘗咖哩汁，掂當！我立刻將碟飯整一個窿將全部咖哩倒晒入個飯裏面，數分鐘後已全部被我食晒。而埋單後仲有淡淡的咖哩味在口腔內，啖啖回味。行出此店後，心諗這鋪頭標榜售賣海南雞，而我個咖哩又相當好味，朋友個海南雞應該….都得掛，問佢個海南雞飯唔好食咩？點解咁靜既？原來我地兩人只顧食野冇理大家……….朋友話個海南雞飯啲雞起晒骨而且好有雞味，同埋點少少佢地個酸辣醬汁特別惹味，一啖雞油飯再一啖去骨雞肉，正！已約定朋友再去食，條件係下次會叫番對方的套餐，睇下對方有冇吹水，好食既野真係可遇不可求。