大師傅粥品 (同昌商業大廈)

营业中

休息中

早上去到佐敦，街上很多店舖還沒開門，行經彌敦道近佐敦道有間粥店已開，門面光線明亮吸引了我。店內裝潢廷新應該是新開業不久，兩邊是卡座，中間放置圓枱，適合唔同人需要。有即熟粥及生滾粥多達廿多款粥，亦可另加心水配料。🍲皮蛋瘦肉粥粥底綿滑，皮蛋及咸瘦肉都很充足。🥨油炸鬼唔係超級脆又唔會硬，炸到啱啱好，係外脆內軟嗰種，餸粥一流。🍽叉燒腸粉皮係厚嗰種，包住一粒粒大大粒嘅叉燒，啖啖叉燒好滿足。炸兩腸粉米漿皮包住油條，中和了油膩，我最喜歡加芝麻，甜醬、辣醬、麻醬，三色混醬先係最好食。這間大師傅粥品地點方便，出品很好，服務都很好。

而家唔淨只係朝頭早食粥，間唔中清清地都想食粥！咁啱喺附近做facial，就落去買咗個外賣試吓本身叫咗嗰個鮮玩魚腩生滾粥加生菜，可惜佢俾咗皮蛋瘦肉粥！皮蛋都算多嘅，但係就唔係生滾粥，味道偏清淡，材料偏小！另外叫咗個黃金沙潤生滾粥，啲粥好綿，好有味道，我唔清楚沙潤應該係咩質感，佢係偏軟腍腍唔會話好重口味！令另外叫咗油炸鬼，比較重口味，有少少陳年舊油味另外再要咗個炒米粉，都算炒得唔錯，味道都係偏清淡嘅！最後仲有一個叉燒腸粉，我諗唔算佢哋嘅特色嘢啦，腸粉比較厚身

.正宗廣府人既飲食文化白粥｜油炸鬼👻｜煎堆｜三大澱粉神物🪔☸️.⭐️ 佐敦📍絕對係食店必爭之地落雨陰天☔️口淡淡 又懶到連叫外賣都唔見到彌敦道🛣️🚏旁就有間非常光鮮｜整齊｜油器 油炸鬼 同 牛脷酥都好靚仔😍跟你就走入去試吓🕵🏻‍♂️🕵🏻‍♂️.📝 兩個人👬👬 當兩餐食🍽️ 中式早午餐1️⃣ 窩蛋碎牛粥｜Egg with minced beef porridge $36.2️⃣ 白灼生菜 🥬｜ Lettuce $22🕺🕺廣東人 就係要碟生菜先【夠廣東】🕺🕺3️⃣ 韭黃鮮蝦腸粉｜Leek shrimp rice noodles roll $27.4️⃣ 煎堆｜Fried cake $125️⃣ 油條｜Chinese fried bread stick $12.雖然有 即熟粥 cooked porridge｜生滾粥 boiled porridge 兩選擇 🎬 最後熟粥比較吸引.窩蛋碎牛粥🥣 好似幾吸引🤩半熟碎牛🥩同軟綿綿既粥底🥣｜堅係爽 夠米氣鮮蝦腸粉｜鮮蝦算大大隻 👍🏻🕺👍🏻煎堆上面 佈滿芝麻🔘🔘🔘🔘 夠香夠脆油炸鬼🧈就 外脆內軟｜浸入粥就更多層口感.兩個人 計埋差唔多 $50一位🎯 target goal 🥅 又食到飽飽

叉燒腸粉皮幼滑皮薄叉燒足料好食，油器剛剛炸好放涼一陣放收口時溫度岩岩好，脆口好食外脆內軟。肉丸粥粥底幼滑，自家制肉丸足料啖啖肉，入口多汁肉汁鮮甜。上菜速度亦不快不慢剛剛好，先上油器再到豆漿同咖啡，最後再上肉丸粥，令每樣食物嘅溫度剛剛好，可讓客人慢慢進食。員工禮貌亦值得一讚，因為本人都係較多要求的客人，但員工們都能一一滿足未有黑面。如果可加入常餐選擇就更好，可令客人有更多不同配搭。有讚亦有彈，我覺得咖啡有待改進，豆漿好飲，坐位都好坐餐廳一樣，環境都衛生，會再去

今日同朋友到佐敦食飯，去到餐廳不需要等位就可以入座 。我們叫了一碗鮮鯇魚腩粥追加滑雞，另外一碗黃沙豬膶粥，再加一碟炸兩腸，一碟牛肉腸和一支豆漿。首先先品嘗鮮鯇魚腩粥，魚肉鮮嫩，腩肉爽口彈牙，滑雞肉質細膩，粥水味道鮮美。而黃沙豬膶粥的豬膶大塊厚實，口感鮮嫩，帶著淡淡的香味，令人回味無窮。炸兩腸外嫩內脆，香味四溢，下粥配搭一流。而牛肉腸牛肉滑潤，味道不會太鹹 。豆漿清香爽口，與粥品完美搭配，解膩又開胃。總的來說，粥品味道不錯，價錢親民，但都非常之飽 。

媽咪陪我手術覆診後, 順便係附近食埋個lunch先回家, 經過見到呢間粥品小店, 媽咪食過話唔錯, 就入去醫下肚餓。店內光鮮企理乾淨, 堂食不設加一。多款粥品選擇, 另有少量小食、腸粉類、油物等... 【艇仔粥, 追加豬紅】HK$37粥底綿密熱辣辣, 配有瘦肉絲、爽口魷魚、豬皮, 本身有牛肉碎, 不過自己暫時要戒口, 就要求走牛, 再追加豬紅, 口感彈滑。【狀元及第粥】HK$45同樣綿密粥底, 呢款粥更為豐富! 包括有豬心、豬肚、豬潤同埋豬粉腸, 其中豬肚偏有咬口感, 粥底中仲加咗些少薑絲, 令主要為豬內臟都唔會有腥臭異味, 整體滿足又飽肚。剛巧撞正油物新鮮出爐, 即向店員要碟即炸油炸鬼做炸兩。【炸兩腸粉】HK$23腸粉包住即炸油炸鬼, 可說是幸運遇上, 一咬內裡脆口, 再自行加入豉油、麻醬、甜醬, 味道更加正!【蝦米腸粉】HK$23腸粉混入了蝦米同蔥粒, 香口美味。【油條】HK$12真係要撞正咁岩先遇上即炸油條, 即炸唔會過於油, 香脆十足!【牛脷酥】HK$12外脆內軟熟, 中心位有少少甜, 配埋粥食, 夠哂飽肚!

每次老公陪我入完屯門探爸媽就必經這個車站返屋企，站前正是此店，睇住佢開張，今日終於入去試下。兩個人一起吃粥，簡簡單單就快樂。環境光猛，新淨整齊，兩邊都係闊落嘅卡座，坐得舒服。枱上有齊醬料、配料、用品等，又齊備又企理。餐牌亦清晰，有即熟粥、生滾粥、油器、小食、腸粉和飲品。我和老公分別叫咗生滾鮮牛粥（$39）和鮮鯇魚腩粥（$45），滾熱辣上枱，正！粥底好棉滑，加了薑絲，一點腥味都無，仲用料量多，抵食！牛肉大大件，又嫩又香；鯇魚腩鮮甜嫩滑，令粥變得鮮味，得！炸兩腸粉 （$23）大大碟，腸粉香滑，包着微脆嘅油炸鬼，再自行混醬和加甘香嘅芝麻，簡單而美味！叉燒腸粉 （$23）熱辣辣上枱，皮滑饀靚，用料十足，啖啖鹹香腍嫩嘅叉燒，滿足！白灼生菜 （$22）翠綠爽嫩，不錯！

同老公去佐敦護士協會買嘢，買完又到咗午餐時間，行出大街見到粥品連鎖店，老公話不如入去食碗粥，大師傅粥品是間人氣餐廳，店內地方寬敞，光猛整潔。狀元及第粥：粥底綿滑又足料，白米粥熬到米粒全化，加豬心、豬肚、豬潤和豬粉腸，滾熟後盛碗上枱，並以姜蔥調料為輔，品嘗起來鮮味爽滑，香濃可口，味道醇厚。黃沙豬膶粥：粥底以明火熬煮至爆花，綿綿滑滑，選用黃沙豬膶，份量不少，豬膶片片鮮嫩，有咬口。艇仔粥走牛：主要有魷魚、碎牛肉、炸豬皮、花生等食材，加上廣東粥口感絲滑的特色，讓這碗粥風味清雅卻富層次。走牛的意思係不要碎牛肉，店家通常會換上瘦肉條。炸兩腸粉：即叫即做，用腸粉包住油炸鬼，而用嘅腸粉係齋腸，然後切成一段段，淋上豉油，加上甜豉油、甜醬、辣醬、麻醬和芝麻來食，腸粉包著的油條仍能保持脆度，無論口感和味道都很惹味。油條口感吃起來外酥內鬆軟,越咬越香口，是廣東粥的最佳配搭。

「大師傅粥品」很多分店，我覺得彌敦道分店最方便我。光亮整齊的用餐環境，令我們感到十分舒適。天氣炎熱，我們晚餐點選粥、粉、麵。黃沙豬潤、鯪魚球雙拼生滾粥~黃沙豬潤爽嫩帶脆口，鯪魚球鮮香甜美，粥底綿密，味道得宜。炸兩~粥品與腸粉是絶配，腸粉米香滑溜，腸粉包裹油炸鬼，口感外爽滑內酥香，淋下豉油、麻醬和芝麻，真的百吃不厭了！豉油皇炒麵~豉油皇的鮮香帶出的味道，令平凡的麵條得到昇華，也是又便宜又好吃之選。飲品點選熱咖啡和熱豆漿，但原來店鋪祇供應凍豆漿，服務員特意為我將凍豆漿用暖水浸泡回温，真的很讚啊！

喺佐敦發現了呢間新開粥店 店面寬敞乾淨又夠光猛😌一個人或者三四個人食都坐得舒服叫左兩碗生滾粥🥣粥底好綿 而且大碗到滿瀉😆！窩蛋鮮牛粥 大大隻蛋黃好搶眼🍳撈埋粥底更鮮甜 牛肉仲好嫩！生滾肉片粥 肉片都一樣超嫩滑！有啲估唔到額外加左生菜粟米🌽口感上更豐富特別推介加瑤柱粒 好多粒 又好濃味 仲有鮮蝦腸粉腸粉皮幾滑 食落比較結實 蝦仁好爽脆 簡單點啲豉油已經幾好味👍見到幾乎每枱都有嗌油器 油炸鬼牛脷酥煎堆都非常大嚿 不過今次太飽就冇試到 下次再食😂

我親眼喺門市，見住個女職員帶住對藍色手套清理所有垃圾。然後再用同一對藍色手套包外賣比客人，完全冇衛生常識😤！再好食都會趕客走😏！而我叫嘅外賣的確有小動物囉😤！差評！！！！！！強烈建議，應該先更換一對新手套，再包外賣比客人啦！強烈要求所有職員，改善衛生問題😤！唔改善，只會有機會爆發感染。

天氣雖然好熱，但間唔中食吓粥都可以清下腸胃。剛巧見到附近有間大師傅粥店，於是就走去試啦！室內的座位相當光猛，衛生情況也是理想。粥品方面分咗即熟粥同生滾粥，另外仲有油器類、腸粉類和小食，也算得上多元化。鮮鯇魚腩粥粥品綿密細緻，鯇魚鮮美滋味，肉質鮮嫩又不失彈牙口感。我刻意地搭配上清脆爽口的生菜絲，為這碗粥增添了層次感和清爽感。蝦米炸兩腸粉腸粉薄滑，內𥚃的油炸鬼外層焦黃酥脆，咬下去能感受到輕微的酥脆感，而且上面鋪有蝦米和蔥花，幾款食物夾埋帶來豐富的口感層次。另外豆漿質地細滑綿密，醇厚可口，一邊食炸兩一邊嘆豆漿的確唔錯。

一向都有幫襯屋企附近的「大師傅粥品」，食物質素不錯。而這間粥店越開越多分店，今天在佐敦附近逛街，就在莊士倫敦廣場附近又開了一間，朋友突然想食粥品，我就建議到這間分店試吓。我們點了狀元及第粥及艇仔粥，用料豐富新鮮，粥底很綿滑，份量足夠。小食方面，我們也叫了韭黃鮮蝦腸粉、炒米粉及牛脷酥，特別要讚一讃牛脷酥，鬆脆得來帶有少少甜味，送粥一流！這裏還可以優惠價加配飲品，例如豆漿、凍檸茶等，夏天的確想多飲一杯解渴呢！

好耐冇食菜乾豬骨粥，今日路經佐敦見到新粥店而要乘搭的巴士站又在粥店對出；雖然大熱天時，又無乜胃口，即管去試試。舖面亁淨企理，待侍應姐姐、妹妹又有禮貌。我就點菜乾豬骨粥，家人就要生滾粉腸粥，再要多支豆漿同煎堆。菜乾豬骨粥：用料足，菜味濃，食後唔口喝。生滾粉腸粥 ： 粉腸新鮮無異味，爽滑。煎堆：12蚊大大個，甜度及軟靱適中。豆漿：少甜。好飲。😋總括嚟講，值得支持！好味、價錢合理粥品連鎖店。題外話，中途還有一位金髮外藉年青人幫襯，應該係常客。可見粥店品質連外藉年青人都可以吸引。

天氣悶熱，沒有太大胃口，想吃清一點。途經佐敦這一間新開的粥品舖，今天就入內試試。裝修簡單闊落，窗明几淨，全店以木系傢俬裝潢，坐得舒服。黃沙豬潤粥很大碗！端上來熱騰騰的，幸好這裏冷氣充足！粥底很綿滑，豬膶新鮮又厚實，更沒有腥味。窩蛋鮮牛粥同樣份量十足，牛肉大大塊，又夠新鮮和厚實。粥底綿滑，適量的薑絲和蔥絲令到這碗粥十分好吃。叉燒腸即叫即整的腸粉，脹卜卜的，十分飽滿。皮薄滑嫩，而且同樣份量十足！淋上鮮味的豉油，滋味加倍。蔥花炸兩腸粉腸粉皮厚薄度恰到好處，炸兩仍很鬆脆，加上甜豉油和甜醬，味道出色。這間少少的粥品舖，食物味道好食材新鮮，而且每樣食物都大大份，份量十足，實在很抵食！