今日咁啱好想打边炉，经过呢间餐厅，见到佢话食满$400有公仔送，咁就一于嚟试吓啦。虽然我哋嚟嘅时间只系六点几，但系入面已经好多客人，大家上嚟亦记住book位或者早啲到啦。虽然好多客人，但系呢度嘅装修好开扬阔落，就算多人都坐得好舒服。侍应好细心咁介绍话原来呢度嘅汤底系亲自煲出嚟嘅，而且就算加水都系加真正嘅汤底，咁就一于试个双拼啦。我哋就叫咗椰子鸡汤拼冬阴功虾汤，佢叫我哋未打边炉前就要饮咗啲汤底先，因为好香甜。我自己就最欣赏呢个椰子鸡汤底，佢真系同屋企煲出嚟嘅一样。椰子非常清甜，而且饮落唔会太腻，越饮越开胃。朋友就话冬阴功虾汤比较出色，因为佢比较钟意食辣，酸酸辣辣咁又系好开胃。我哋见到好多台都有叫呢个海鲜宝盒，一开盒佢仲加咗唔少干冰，有好多烟喷出嚟，非常适合打卡。而且入面仲有好多唔同种类嘅海鲜。我最欣赏嘅就系呢个生蚝，因为佢除咗好大只之外，而且非常新鲜，渌一阵就食得啦，完全唔使点任何豉油酱汁，都食到佢海水嘅清甜。另外呢个手打虾丸都非常出色，喺呢度自制嘅虾丸。而且食落好多虾，唔会好似好多面粉嘅感觉，又系唔使点酱汁都好好食。因为朋友唔食牛肉，所以我哋就拣豚肉。平时我唔系特别钟意食猪肉，但系呢个豚肉非常大块，而且食落肉质好好，食落简直可以媲美牛肉，非常推荐唔食牛嘅大家嚟试吓。甜品方面，我哋就叫咗呢个椰皇奶冻。佢嘅卖相非常好睇，估唔到食落唔会太甜，而且份量好多，食完奶冻之后，仲有好多椰子肉，简直为呢个晚餐画上一个完美嘅句号。…查看更多
