囍慶酒家

营业中

休息中

今天在九龍活動，原本打算在九龍飲茶，但第五波疫情後，現在大家報復式消費，在九龍飲茶一定要排隊等位。故此，到科學園囍慶。一來不用等位，二來又有泊車優惠。我們好貪心，點了六個點心。鮑魚骨雞粥，粥底好綿，而且白切雞的雞皮出了雞油，令雞粥又滑又夠雞味。蝦餃做得好紮實，澄麵夠煙韌，蝦爽甜，肥豬肉不多，真好。叉燒包也好 ，餡不少，而且不是肥豬肉，也不是結撻撻的叉燒醬，Honey讚。六款點心最失色的算是酥炸魷魚絲，魷魚絲是爽脆的，但是漿粉太多，完全蓋過魷魚絲的爽脆。手拍青瓜非常好！醬汁酸甜味剛好，青瓜不會被浸得過度，仍保持青瓜的爽甜爽脆。鮮蝦腸粉一定要大讚！因為腸粉好滑，但用筷子夾又不會一夾就爛，師傅手勢真好。整個午餐都好好味。

媽媽生日，早兩星期 book, 落埋訂。近冬至，得兩個套餐選擇。因為近節日， 我跟足規矩 先付訂金， 而我亦一早講明個套餐上想再加餸。最後當日加左蒸鮑魚。點知食左第一道菜，之後等左兩個鐘都未再有食物送上。三番四次吹單，而且提埋吾好漏鮑魚。最後都係漏單，等左兩個幾鐘先話咁仲要吾要，要就再等多半個鐘，個經理仲要話大時大節係咁架啦！超級受氣！食物質素都超差！樓面都有幫手跟。但個經理完全吾理，態度惡劣。我明白大時大節係多人d,但一早訂定，佢應該預計好要準備多少食物。而且態度非常惡劣！一定吾會再去！

買咗蟹逅盛宴套票，諗住食大閘蟹。明白只係三百零蚊一位，畀兩隻蟹你，又有其他菜，都不能太苛求，但大閘蟹水準之低，真係令我大開眼界。先講蟹本身。望落去，正正常常，但一打開，一聞，大鑊，無蟹嘅香味，只有腥味。呢個時候，真係心知不妙。食落去，有腥味，無鮮味，啲肉係霉嘅，即係話，係死蟹，雪藏蟹。醋呢，就有啲求其，入面無薑嘅。講下服務，係人都知食大閘蟹會專心食蟹先，而唔係好似食炒蟹咁，可以食吓蟹，又夾下其他菜，係咪？囍慶就喺客食大閘蟹開始無耐，就不停上菜，要迫個客決定應該食凍蟹定凍菜好。除糯米飯外（又乾又硬又有陣唔知乜味），其他餸菜其實味道尚可，但大閘蟹係主角，但竟然最失敗。難食到完全唔想掂啲蟹腳。無下次了。

在綱上購買了海鮮盛宴餐，今晚一行四人來吃這個餐。星期六的晚上，科學園很靜，六時三十分到酒樓時食客不多，到七時三十分左右人客就多起來，我們坐下就起菜，上菜速度十分快，不一會已放了六款菜式在檯上，趕忙問待應可否之後的菜餚出慢點，待應也認同說會叫停一下，讓我們先品嚐了檯面上已上的佳餚。套餐有8 款食品，雖然按人頭給量，但食材件頭大，足夠吃得飽，最後來的兩個餸已吃不下，只免強吃下去。整個餐是不錯，海鮮鮮甜美味足料。乳鴿大隻有肉吃，皮脆肉嫩，鹹味不過份，入口有汁液滲出，不會乾身硬硬的。每人半隻，龍蝦肉彈牙爽口，上湯味足，湯汁掛上麵條同吃分份外滋味。蛋滑夠熱，粒粒魚籽吃起來有口感，蟹鉗大大隻，蟹肉鮮甜好吃。果皮香，鮑魚爽，易口不嚡口。蝦被鹹蛋黃包著，蝦身炸得甘脆，海蝦身型不大，全隻蝦可咀嚼並吞下，起沙的鹹蛋黃帶出鹹鮮味。生蠔用蝦片托底，蠔炸得乾身不油膩，脆漿不多，裏面的蠔肉仍保持濕潤。蔬菜嫩綠，野菌鮮甜，上湯夠味道。醬汁偏甜，沒有太大的胡椒味，蟹肉也不多，這個菜式是整個餐中唯一不太滿意的。

有去過白石角既人都知道呢到係半個荒島......餐廳既選擇真係少之有少....同事今日勁有興致去飲茶 就係白石角是但揀左間茶樓3個人叫左8款點心1️⃣雪山叉燒包層雪山有厚度架😋 又唔會太甜 配埋啲叉燒餡 好好味包既中間又唔會剩係得啲叉燒醬 有見得到既叉燒2️⃣香茜牛肉腸茜既份量好足夠....所以唔係我既口味😂3️⃣XO醬炒蘿蔔糕真係落左好多XO去炒 名符其實既XO醬炒蘿蔔糕蘿蔔糕亦都勁足料 每啖都食到白蘿蔔4️⃣鮮蝦腐皮卷不過不失 做到應有水準 每一件都食到有蝦5️⃣鹹水角夠香口 餡既份量適中 但如果大粒啲會開心啲😂6️⃣黑金流沙包賣相好靚 漆黑既包 畫上幾條金色既線條 變到好高貴既點心 每一個都有流心效果 流沙餡好香 唔會太甜7️⃣香茜牛肉球因為香茜牛肉腸既茜太足料既緣故 我無食到🙊🙈8️⃣蟹籽燒賣中間有好大隻蝦 蒸既時間岩岩好 唔太硬唔太淋 好味3個都食到勁飽點知姐姐仲突然每人上左一碗糖水 話係送既係超級足料既紅棗雪耳龍眼肉糖水 女士因物可能太足料既緣故.....真係變左碗「糖水」要加啲熱水先入到口真係一個好甜既結尾🙈

沙田科學園是假日的好去處 有很多空間給小朋友玩耍 尤其是在吐露港旁 望著海景秋風送爽 更有各式各樣的食肆 今天我去了一間大眾化酒樓 - 喜慶盛讌事實是分別為2個店鋪 我去的是囍慶對面的盛讌 面積很大 有表演臺可以用作迷你演唱會 裝修光猛明亮 座位間隔闊落 有自動送餐機 穿梭往來 是一般酒樓少見的食物是常見的品種 點心價格比一般的酒樓略貴 味道不是很突出但合格 其中以燒腩仔最出色 收費不貴 其餘的XO醬炒蘿蔔糕 等等也不差只是炸兩腸內的油炸鬼很油膩 入口感覺一口都是油 蝦餃皮比較厚值得一讚是所有服務員都很好禮貌 執枱也快 工作效率很高 是一般酒樓少見的

科學園，一個北方人說“兔子也不去拉屎”的地方，坐公共交通工具 轉車轉到頭暈才到達的地方，要不是自己開車也不會來 ...但在東鐵沿線，於周末要找個不用等位，安靜，價錢公道，有點水準的港式酒樓，這裏可能是首選 ... 當天我們4個人，點了一些簡單的點心及一個孖寶套餐，有一份炒粉麵及一份“鮑魚雞煲”。百多元的孖寶本沒有什麼期望，但上菜時， “鮑魚雞煲”碟頭夠份量，四個人竟然也可分到原隻鮑魚，惹味，對不起，有眼不識泰山！ 其他菜式及點心，尚可，起碼沒有要投訴的地方，消費又有免費泊車， 難怪連岳母大人也認得我們反兜了這裏很多次！

想好好慶祝結婚12周年 但又唔想STAYCATION於是就試咗某個APP嘅優惠PACKAGE去咗科學園嘅囍慶食海鮮餐雖然佢帳面寫個餐只係六百蚊左右但原來有細字說明話唔包加一同埋仲要收茶錢前菜錢所以加埋都成720蚊左右 抵唔抵變成就有些許爭議首先 可能因為係優惠套餐嘅關係佢上菜嘅速度好似光速咁快咁無論咩嘢食都好啦 都要熱辣辣先好食架嘛所以變相就要食得好急 都有啲辛苦不過個餐都精彩嘅 起碼有兩樣美食係一定要讚嘅1 果皮蒸六頭鮑呢個係估唔到咁好食 個鮑魚一咬落口無論味道同口感都新鮮到不得了 好彈牙！！！而且個甜甜地嘅豉油都調味得啱啱好唔會死鹹 絕對值得一讚！2 上湯開邊龍蝦伊麵個龍蝦又係相當新鮮 龍蝦特有嘅鮮甜味相當濃烈而且開起上嚟啖啖肉 肉質又好彈牙個蟹鉗尤其係鮮甜龍蝦味嘅「集中營」 食到人好激動至於個伊麵 亦都好彈牙好入味 100分至於較為表現中庸甚至有少許中上嘅菜式就有乳鴿、酥炸生蠔、咸蛋王煎海蝦然後就要講吓佢最失色嘅兩味1 全晚最令人失望 絕對係嗰個蛋白蒸蟹鉗個蟹鉗霉嘅 個蛋白擦子膠咁 質感古怪又冇哩味道我哋咁有衣食嘅 食到一半都終於忍唔住要放棄 2 星州胡椒蟹呢個調味係相當正嘅

因為團購有特價，所以去呢間試吓。地點其實都頗為唔就腳，如果夜晚放工嚟交通又唔方便， 由沙田港鐵站，行出外面落斜路坐27號或者27A小巴 15分鐘左右到， 不過等車都差唔多十分鐘。🤔 最終同朋友選擇咗星期六下午嚟食，可以由早上十一點食到下午四點，冇限時同朋友聚舊傾餐飽就最好，食完可以行吓科學園。😚 其實佢同黄埔 海雲天個套餐都有啲相似。食物味道還可以，但係上菜都係好急， 未食完就不停咁上， 最慘佢張枱又細，搞到有啲食物要即刻放埋同一碟。 環境好似一般嘅酒樓，面積唔係好大， 有啲逼夾 。 上湯蒸龍蝦半隻好新鮮多肉， 皇子鴿就冇乜肉， 胡椒蟹煲都ok惹味， 紅梅白雪蒸蟹鉗，個鉗好細。 不過開頭有啲混亂，我哋訂咗兩份餐， 但係就上咗一份 ，後尾查清楚原來佢哋攪錯，補番上。 侍應服務都可以 。

今個夏天不能外遊，原本預訂了Hyatt Hotel Shatin，在港Staycation，怎料疫情第三波來襲，Staycation 取消了……惟，來科學園海傍逛逛，藍天白雲下吹吹海風。疫情下，仍要覓食的，到了喜慶飲茶。座位擺得疏落，桌與桌距離遠。窗外一片綠油油。原個椰皇燉鮮奶燕窩：好好味！椰皇燉得熟透，用膠匙羹一杓，便能將椰皇裡的椰肉全吃了，沒有浪費。燉奶滿滿的，好滑好甜！即使有沒有燕窩，已物超所值！非常好味！叉燒腸粉 / 紅油抄手：同樣非常好味！叉燒腸粉的腸粉，蒸得非常薄，薄得透明，但夾起來，又不易「穿」，很有韌性，非常嫩滑！抄手的份量也很多，有五粒，是菜肉餃。菜的份量不少，啖啖的菜肉。蝦餃 / 棗蓉糕：蝦餃，一籠四粒也可，一籠兩粒亦可。Honey選了兩粒裝蝦餃，和兩粒裝燒賣，那麼，就可以多嚐不同款式的點心。蝦餃皮很有韌性，啖啖蝦肉，爽口。Honey最喜歡吃棗蓉糕，這裏的棗蓉糕棗味濃厚，而且，放了一段時間，糕仍沒有變硬。還是軟軟的，好煙韌，好好味！Honey讚不絕口。燒賣 / 叉燒飯：同樣好味！叉燒份量不少，足夠「送」飯。叉燒不肥，肉夠鬆。(有些茶樓的叉燒飯，叉燒少得連半碗飯都「送

Dun sum: 叫左腸粉黎食，兩條腸粉有成6隻蝦，蝦仲要幾大隻，好抵，服務一般般佢地較好忙，環境麻麻，因為冷氣太凍，而且都比較嘈吵鬧聲，只係偶爾陪下長輩食中式野。

由於疫情關係，佢哋已經好似冇開成一個月了，冇得食佢哋啲孖寶或者海鮮套餐，咁啱今日諗起想過嚟開餐，於是即刻打電話睇吓有冇開門， 好開心結果可以坐得好舒服又可以泊車嘅食嘢好去處今次叫咗自選晚餐及散嗌兩個小菜，三個人食啱啱好，龍蝦伊面絕不求其，10分足料！另外花膠螺頭湯也分量十足，我掛住食所以今次影相唔夠靚而魚香茄子煲，火喉十足，不太鹹，送飯或者清楚一流！到食到尾聲，佢哋依然照舊送紅豆沙而服務態度依舊非常之好

由於沒有預早安排晚餐地點，所以直接入去科學園食中菜，泊車方便！已經唔係第一次試食，因為除咗會擺婚宴之外，一般都會有位，今次選擇了全部海鮮為主！由於疫情關係，酒樓好細心，全部餐具用熱水煲滾消毒，才給我們，並且安排座位方面，非常窩心！每一枱隔一枱！我哋三個人，可以叫特價餐及指定優惠餐，所以我哋決定每人半隻龍蝦，之後叫了兩款套餐！😋包括兩款鮑魚做法、薑蔥炒蟹、燒鵝！其中冇諗過椒鹽鮑魚咁好食！大滿足！最後送給我們每人一碗糖水😋

服務水平、態度欠佳，做野唔小心整污糟晒客人嘅袋又扮唔知、唔道歉！D前菜又無問客人要求，自己加辣，菜單又列明，點食呀？你估個個係四川、國內客人咩！ 激死激死激死，唔會再去幫襯！

不愉快的經曆- 我同老公今天去到等位，個知客話無位，我等咗大約十分鍾，見到有張枱有兩個人埋單，入去睇睇，見到除咗個張埋緊單的枱，入面原來還有張二人枱，同個知客理論一番，點知個知客仲贈咗句"等下都唔得"。其實當時入邊明明有位，我仲坐咗10分鍾。之後同經理投訴，就連句"sorry"都無。我同老公幾乎每個禮拜六. 日都會去呢間酒樓飲茶，覺得食物係好食，過服務實在有待改善，尤其係門口個知客，係門面來，成日板起塊面，簡直係趕客。我都知呢行難請人，不過對客人都唔可以咁㗎~