半島冰室

营业中

休息中

聽聞半島冰室大件夾抵食，長期有人排隊，閒日下午茶時間黎到，都排成二三十人，好彩港式茶記翻枱速度好快，等左15分鐘就入得，睇下個餐牌，好多款式選擇，樣樣都想試。🥺🥺芝士煎蛋豬扒包，烤到熱辣辣外脆內軟，豬扒唔韌，半熟流心蛋加半溶芝士，下午茶而言，呢個質素我收貨。👍🏻👍🏻香煎豬扒蛋印尼撈麵。最出名既豬扒，好入味，真係好正。留意番，無論豬扒包定撈麵，佢隻蛋都係流心，呢點好重要！粗薯條，只要係即炸即上，夠熱夠脆內涵唔乾基本上就好食。🤤🤤你會話，車，咁佢有乜咁特別？特別在佢做到哂以上幾點仲咁大兜，跟餐價只係加 9 蚊，你話喇。😂😂

由於幾乎每日都會經過呢間半島冰室 又幾乎每次都見到佢大排長龍 兼且佢六點就打烊所以夜晚又試唔到 終於到一個星期六既中午就去排隊喇等左都唔洗五分鐘 比預期中快有位 咁當然都預左要搭枱 望望個好新奇既menu 個商務餐 好吸引 商務餐($48) 即係 炸雞脾 蒜蓉包 肉醬意粉 雞脾啖啖肉 外面脆 入面多汁！份量好大 蒜蓉包分開上唔會沾到啲汁黎個近鏡加凍飲+$2男友叫既全日早餐 雞扒大大塊 岩哂鍾意食肉既人埋單都係五十蚊一個人 好滿足係一間出色既茶記 一定會再黎！

半島冰室是一間長期排隊的茶餐廳, 不做晚市, 星期日及公眾假期也休息. 好受歡迎最主要是因為好食又抵食! 所以好多人都願意排隊. 今天是年初七它今天剛剛開市, 星期一, 我早上10點左右去食個早餐, 這個時間還好, 一、兩個人的話差不多可以立刻入座! 早餐有15個選擇啊, 簡單的、有營養的、豐富的都有！ 我叫了一份餐肉炒蛋三文治烘底加熱奶茶 （$29).這裏人流高, 服務都好有效率, 也有禮貌. 三文治好有份量, 烘底亦做得好, 讚！熱奶茶就中規中矩。下次再來試它的午餐！

半島冰室出名日日都要排隊，十分好奇有幾好。咁岩路過就試試他們的質素，當然門口都有一群人排隊，唔想浪費時間所以外賣。下午茶時段有好多選擇，我選擇了公司三文治，看看他們的真材實料。$41 價錢適中，仲要跟飲品三文治內有好多配料，麵包焗得脆脆的，配料包括有，半熟煎蛋、午餐肉、生菜、洋蔥、芝士、蕃茄、火腿、沙拉醬所有配料都恰到好處，剛剛好，外賣都好好食。平時其他茶餐廳外賣三文治，一係太濕一係太硬，半島冰室絕對不會有這情況，唔怪得咁多人排隊。好好味，下次再試其他食品

半島冰室成日排隊 ....... 如果唔係公司夜晚 5 點食飯就一定食唔到 .....下午茶時間，種類又好多 ..... A - K 都有 .....因為我已經當係晚餐 ..... 所以叫左蘚茄雞髀煎蛋飯 ...$36 連一杯飲品 ..... 店員手腳好快 ......唔使十分鐘已經有得食 ...... 賣相都好吸引 ....茄汁底幾好味 .... 雞髀炸得剛剛好 .... 外層脆卜卜，雞肉都幾滑 .... 呢個價錢真係抵 .....難怪成人排隊 ...

今日經過附近，見到平日都會人山人海排隊既餐廳，心諗應該都唔差吧，又唔想食d連鎖餐廳既早餐，就排隊等一下啦！我地一家三口等左10分鐘就可以入去食，雖然餐廳唔算好大，但勝在光猛，餐單又好多款式可以選擇，今日就試試牛扒餐同雞扒餐，另外加多個通粉比呀女！由落單到送餐既時間好快，唔怪得都唔洗排好耐就入到黎！30幾蚊一個早餐，塊牛扒同雞扒係大塊既，完全係大件夾抵食，而且佢果汁係好味，肉唔會咬唔開，全部都係熱的，真心覺得呢個價錢係非常合理，連呀女都食左我半塊牛扒，就知下次可以再黎幫襯PS 題外話，收錢果個應該係老闆哥哥，佢仲送左支糖比呀女，甘親民同有禮貌，真係值得支持

天后有不少排隊食店，我是慕名而來到半島冰室，想吃好東西就要來排隊哩～其中一個是日午餐是 胡椒豬肚花膠滑雞湯飯，我非常喜愛胡椒豬肚，加上天氣有點冷，胡椒豬肚湯可以暖胃！半島冰室給客人的都是真材實料，有很多很多花膠；而且豬肚清洗得徹底；湯底非常濃郁，喝了一口就停不了。光是喝湯已值回票價！份量非常多，抱歉我無法將所有飯吃掉，但我將所有湯喝完哩！午餐附送餐茶，我點了「茶走」，即是奶茶加添鍊奶。這裡的茶走非常好喝啊，茶不會帶有澀味且滑溜非常。雖然排隊等候了一段時間，但我覺得值得哩，份量多且美味，價錢更是超值，下次要再來吃哩。

上次同老公食過覺得好好食今次行開北角特登帶埋媽媽嚟試吓媽媽叫咗個全日早餐我叫咗個商務餐同平時一樣份量都係超大份我個商務餐肉醬意粉 嗰個肉醬真係好好食。蒜蓉包好香口其實依間野嘅奶茶真係冇得頂好香滑今次你就要排隊架不過都係排左幾個字啫

本身諗住嚟朝聖蔥油豬扒飯，好唔好彩撞正冇蔥油，又唔知食乜好，就揀咗廚房上面啲圖而響個menu唔見有嘅兩款嘢食😗有唔知咩係扒丹佛嘅扒丹佛芝蛋治，包身烘得靚靚仔仔，芝士同炒蛋融為一體，入面夾雜火腿同搞蔥碎，成個感覺幾好，不過食落有啲淡味，同埋蔥怪覺得蔥花多返少少會開心啲😛另外有西多士，但唔係一般口味，平時最多都係見到沙嗲牛做餡，今次呢個係咖喱鹹牛肉，有啲似咖喱角咁更加過癮，不過姐姐好似預我鹹食，其實問佢拎支糖漿加埋食，甜鹹兼具互相抆嵌個感覺比淨食更開心，而且唔落糖漿有啲dry😌

公司同事經常去這冰室午膳，今日終於適逢無帶飯過來一試，餐牌上有些套餐名字很特别: 型男餐、索女餐、頭等餐及商務餐等，感覺有趣，店內裝修算豪華，皮製的梳化椅及凳，我叫了個牛脷焗飯+熱好立克，焗飯大概10mins便到了，熱辣辣、香噴噴，應該是即叫即焗的，份量不是太大盒，但一人份量剛剛好，味道適中不會太濃又不會焗得太濃。

今日黎開北角 就順便試吓依一間半島冰室比一幅好多蔥既圖吸引 叫咗個蔥油豬扒飯午餐 配一杯忌廉熱咖啡老公就叫咗個下午茶餐炸魚柳配沙律加杯凍奶茶我個飯嚟先上邊真係勁多蔥油 正呀豬扒好正又勁大塊點知原來個炸魚柳重有驚喜大塊過我塊面呀 真係好誇張啊佢杯忌廉咖啡飲落真係好香濃我都有試過老公個杯凍奶茶真係好好飲依間冰室呢特別早閂門。今日冬至仲要未夠五點就last order添 你哋比員工早啲返去做冬真係好有人情味啊下次再嚟試下其他嘢

尼間冰室經常午市大排長龍，而且沒有晚市，聽職員說LAST ORDER大概是下午五時五十分左右吧而對上果次午餐黎食左佢既常餐大概排左十五分鐘，不過職員會先為客人落左單先，有位就好快上餐有效率對上果次揀左個常餐-「索女餐」$44其實就係烘牛油多炒蛋配茄牛通，雖然配搭都係普通經常食既常餐，但佢既牛油多士就超級足料，牛油塗得滿滿，多士烘得好脆雖然不是厚身炒蛋都夠滑，而茄牛通番茄🍅牛肉夠新鮮、而牛肉同通粉份量都好多價錢就不特別平而佢既下午茶☕️亦食過兩次下午茶款式超多，全部都係廿幾至三十幾蚊為主，超抵食仲要份量好大今次同兩位朋友都係黎食尼個《炸魚柳配沙拉》配熱飲 $33 魚柳炸得好薄仲要好脆，入面既魚柳肉仲保持住嫩滑，而且超大塊沙拉🥗好新鮮而且勁多沙拉同沙拉醬邪惡配搭，尼個餐經常大賣飲品方面就無乜特別，每個餐都包熱飲，凍飲加$2埋單不用加一

半島冰室食品水準好飄忽，有時好有時不好 ，而且炒旦味道一般，無以前好，最差的就是個位高瘦四眼的男仕應生無內性熊度差差，落單完全不聽客人講嘢就用無耐性態度差回答客人，完全不明白老板為何會請他來做，其他侍應生也可以的

下午茶都會去附近試下，成日都見到半島排長龍，今日見吾洗排就入左去，因為吾係好肚餓，所以淨係叫左個奶醬多。多士夠厚，即烘所以都夠脆，上面佈滿煉奶同花生醬，啖啖都食到，好滿足！

幫襯這個茶餐廳應該有兩年多了，一直都懶得去寫食評哈哈 可惜這個茶餐廳只有一間就是在炮台山。每次都是特登過去吃的，而且無論什麼時候去都一定要排隊！陽光普照還是傾盆大雨都是很多人排隊的這裏的食物10分好吃，價廉物美，物超所值 我最愛吃的是型男餐，他們的蔥油雞髀也是頂呱呱的！不過就不是經常有呢⋯⋯今天下午吃了炸魚撈麵，這個份量簡直是驚天地入鬼神 這個炸魚超級大份，最令我驚喜的是入面是十分鬆軟的魚，完全做到外脆內軟的效果，魚肉也十分好味 這個炸魚令我愛不釋手！