影片
老板表示上面三楼熟食市场有舖头，可以坐低慢慢叹烧味，有机会我都乐意就去探访一下。豉油鸡半只，人善被人欺，利益权利系要靠自己争取既！要据理力争，有冤就要反抗！我指住要依边靓靓油鸡，师傅趁我行开买鸡翼，侧侧膊包第二边塞入袋！干干黑黑缩晒水唔知放左几耐无客肯要，越谂越唔甘心立即返转头换货！师傅叔叔我唔系要依件架㖞，唔该换翻那边比我，佢当无事发生换完算数！未算太肥还可接受，少少肥膏吐掉可以。鸡皮爽滑，豉油香甜彷似有阵云尼拿味道。极嫩清甜的鸡肉，甜甜肉汁滴滴，衬著豉油香坚好味食得过！白切鸡半只，斩鸡师傅继上次偷龙转凤，将我拣既靓油鸡换另一只干鸡后，再重施故技！我话要最边边件掤靓靓白切鸡，师傅唔知系边度包好件鸡话要收钱！我望望枱面刚才只鸡仲系度㖞，心谂应该无事既，上次比我发现，唔会再挑战我麻！点知返到屋企发现，鸡皮干争争鞋烚烚仲要脆皮，唯有全部皮去掉净食白肉。鸡髀白肉滑滑弹牙，凤脂甜美，鸡甜加咸鲜，味道不错令人回味，仲要有靓鸡先有既透明啫喱胶原蛋白！立即吸晒落肚，唔好走宝。去晒皮净食鸡胸，有鸡汁有咸鲜，咽咽韧韧不太鞋。卤水鸡全翼，发现新大陆，估唔到其貌不扬竟超优质！肥美胀卜卜，弹弹鸡肉有赵口，皮香肉滑，卤水入味舒服不过份。只虽 $10 蚊有 3 只，平靓正抵食到飞天！好食过珍苑，好味过林德记百倍千倍！就连联兴都望尘莫及。卤水鸡髀，大大只厚厚肉 $10 蚊有交易，最紧要好食！平系无用架。打开胶袋卤水飘香，不知味道如何。豪不犹豫成只那起，狠狠一口一扯！巨髀卤得清爽芳香不咸不浊，鸡皮油润，白肉结实，醒神开胃抢住食！蜜汁叉烧免切，索价 $40 蚊条还可以。少年时曾经有个女朋友话，识食叉烧梗系要免切成条揸住咬，原汁原味才是皇道！其实都要睇间烧腊档叉烧是否够高质㖞。依条冻冰冰，不是刚刚烧起，瘦猛猛叉烧偏硬偏干，唔热略咸，要大大力咬实扯出，听到撕裂声音十分悦耳过瘾！卤水乳鸽，虽然我要原只免斩，但婶婶您都唔系直接包比我麻？随便放系盘道都有段时间，都要掉落热卤水浸浸洗洗尘都要啦！而且叫卖时口水有否喷到落去架？眼见都有不少乌蝇飞来飞去。成只拿住咬最正宗最狂野食法！虽然不是乳鸽，供应中鸽唔系老鸽已经好幸福，每只 $40 蚊其实价钱属高水。室温享用，擘大口直接咬咬咬，坚嫩滑多汁！豉油清香吸引，卤得出色！就算胸肉都十分滑溜，阵阵鸽肉甜味，鸽皮薄薄爽脆不肥腻，金黄色调靓仔又好味！炸乳鸽，即叫即炸新鲜出炉滚烫烫！鸽脑补脑壮阳强身健体，鸽脑浆浆甘香，鸽颈香脆连骨吞掉。识食梗系拿住咬原汁原味！慢慢温柔地续少续少地脱下，直至一丝不挂！嫩滑鸽肉滴著汁，薄薄香口鸽皮，连皮带肉咬下，嘴嚼融合！味道夹得天衣无缝，每条骨都损得干干净净！烧鸭下庄，睇错以为系鹅髀，只需 $30 蚊就肯定系鸭唔系鹅。原只大咬最有野性最滋味，鸭汁喷射，鸭油爆发，舔舔脷！鸭皮咽韧香料味浓，鸭肉嫩嫩结实，散发阵阵鸭甜。烧肉，见到几靓仔仲只售 $20 蚊即买。半份脆皮五层肉，脂肪瘦肉均匀甘香甜美，几旧过肥，几旧韧皮。烧猪骨，初时老板话无，但转头改口称还有一份。点睇都系乳猪脚、烧猪脚仔拼烧猪髀，只需 $20 蚊？虽然不是我想要的烧猪桶骨，话晒啖啖肉熟都照要，肴起粥黎非常鲜甜香口，咸味香料味得宜。海蜇熏蹄，海蜇爽爽正常的咸味，熏蹄偏咸，皮爽肉咽韧，食完劲劲劲颈渴！甜醋味道单调，加麻油红椒蒜蓉会更美味。甜酸凤爪，还以为系酸辣，爽爽鸡皮脆脆筋骨，咸味太强不觉得甜酸。本来想买卤水鸭，但见斩定入晒发泡胶盒全部打开，乌蝇周围飞仲嬲下这盒嬲下那盒，梗系唔买啦！用发泡胶盘装立即用保鲜纸包住最好。胡须鸡，独独晚餐自撕鸡！原来不是白切鸡，咸鸡黎㖞。白雪雪浅黄的衣裳，鸡皮爽滑不肥腻，甜甜凤脂有著轻轻鸡甜散发咸香，结实弹牙鸡髀肉，绵绵多汁鸡胸肉，食得过。金钱肚、生肠、鸭肾、鸡中翼、玫瑰红肠。生肠极爽脆，唔似联兴腍劈劈，而且同爽弹金钱肚一样有玫瑰露酒香，味道神秘诱惑不禁追住食，越食越想食！其实好鬼饱，但真系好好食停唔到。鸡中翼有点咸但一样和味，鸭肾甜美微爽，脆皮玫瑰红肠甜美无比，好想有碗香香白饭一齐赵呢！以前去烧烤我都会系烧味舖买玫瑰红肠，特别甜美可口，冻肉舖冰鲜无得比！烧腩仔，条烧腩仔滴晒油，师傅您同我讲好瘦架㖞，您话您自己瘦乍麻？食落猪皮极脆卜卜，肥瘦参半不油不过咸，阵阵肉香肉甜，不能以貌取人呢！烧排骨，黏黏的外层，有著叉烧的味道，肉质瘦瘦，带著微弱肉汁，赵口十足！一咬一扯听到撕裂的声音。卤水鸭，卤味极淡，没什么味道。口快快说错了走卤水汁添，自己作孽！鸭仔细细都免强叫啖啖肉既，肉味麻麻地唔难食，不过近尾部膻到我反眼，吐都吐唔切！皮弹弹肉咽韧。甜醋甜味重而单调，加点浙醋希望有得救，无补于事！
继续阅读