元朗學記粥麵 (已結業)

星期五雖然大代個場唔算好爆，但都不斷有食客黎幫襯，間間食肆既生意都差不多。聽班老闆講大代食水深無人性，佢地都唔捱得幾耐，吊住條命過得一日得一日！月租十幾萬仲要抽佣，水電煤自己交，公家地方各老闆要夾錢，又幾萬。強制一定要買大代出品既餐具、外賣用品，仲有文具、制服。強迫賣大代飲品，賣到賣唔到都要係各老闆營業額度扣除。十足十大地主吸血鬼，真係慘不忍睹！牛腩河搶錢價 $39 蚊加 $13 蚊多個小食，直係好很貴，離晒譜！我起身出去攞野食，唔夠 3 秒比條食小南國海南雞既粉腸霸那左我個窗口靚位，可恨！五香牛坑腩河走蔥，第一次學記。河粉滑溜而實淨，都幾喜歡，份量都幾多架喎，但碗湯唔夠熱呢，要剛剛燙口有煙出先最好食。原來全場禁用明火，只有電爐，唔怪得無鑊氣又無火喉啦。個湯底淡而無味，水汪汪，低沉而單調。坑腩？邊部份似坑腩呢？非常腍，腍到散，腍到霉。質地乾鞋帶點渣，味帶少少五香味，單評味道係合格既。本想食炸雲吞，但賣晒，唯有是但炸魚皮。質感似足炸蝦片，落脆勁咸真慳皮！試試浸湯會否好一點，豪無用作用，食左兩塊放棄。辣椒油只油又不香不辣，失望。食完好口渴呢，不停搵野飲呀！